کەژەکە بە ڕێزدارییوە ئەنداما کۆردیناسیۆنو کۆنگرە ستاری سالیحە ڤیان (هێڤا عەرەبۆ)ە و ئەندامەو پەیەدەی و هۆگر دەرباسیە (دلاوەر عەرەبۆ)یش یاڎۍ کەردێوە و واتش: " شۆڕشو ژەنا سەرنیشت و ۋەرکۊتوو سووریای بەربڕو هەڤاڵ سالیحەیا."
کۆردیناسیۆنو کەژەکەی بە ئەرەیاۋنێوە نویسیا یاڎو هەردووە گەشمەرڎا هێڤا عەرەبۆی و دلاوەر عەرەبۆیش کەردۆ، کە جە ئەنجامو هرووژمی دڕندانەو فڕۆکەی بێفڕۆکەوانو دۊڵەتو تورکی ئەرەگیرینە جە کاتو ئەنجامدای ئەرکەکاشانە جە پانیشتوو کوردەسانینە گەشمەرڎۍ بیۍ.
ئەرەیاۋناکەو کۆردیناسیۆنو کەژەکەی پی جۊرەنە:
"بەڕێزدارییوە یاڎو ئەندامەو کۆردیناسیۆنو کۆنگرە ستاری سالیحە ڤیانە (هێڤا عەرەبۆ) و ئەندامو پەیەدەی هۆگر دەرباسیە (دلاوەر عەرەبۆ)ی مکەرمېوە کە جە ٢٧و کانوونو دووەمی جە پانیشتوو کوردەسانی جە کاتو ئەنجامدای ئەرکەکاشانە بە هرووژمو فڕۆکەی بێفڕۆکەوانو دۊڵەتو تورکی فاشیستی تیرۆرۍ کریۍ. سەرساغی ۋێما جە بنەیانەی قارەمانو گەشمەرڎا، گەلاو سەرنیشت و ۋەرکۊتوو سووریای، ۋەرنیشتی و گەلوو کوردەسانی موازمۍ. ئی هرووژمە دژمنکارانەو سەرو کوردا و ژەنا بە تنی شەرمەزار مکەرمۍ، قەول مڎەیمۍ سەرو بنەماو پێکئاوردەی کوردەسانی ئازادی خاوەنداری جە یاڎکەردەیۆ ئی هەمڕا ئېژایاما بکەرمۍ.
هەڤاڵ سالیحە کە جە تەمەنێوە جوانیوە بەشدارەو دلۍ ڕیزەکا تەڤگەرو ئازادی بۍ، بە فەلسەفەو ئازادی ڕابەر ئاپۆی پەرەش بە ۋێش دا و پېسە دەروێشێوە ژیوا، کە عەوداڵەو ژیوایۍ ماناڎاری بۍ. تا دما نەفەس پەی ژیۋایۍ ئازادی و بە شكۆی ئەوەکۊشا. خوڵقنای مرۆڤێوە تازەگەری کە هەرمانێوە فرە زەحمەتەو ژیۋای ئازادیا، کەرڎ بە بنەماو ۋێش. دلۍ پەکەکەینە بە هامڕایی، ڕەنج، کرێکار، ئەوەکۊشای ۋێش سەرجەنۆ وەشکەرڎ. هەرمانەکێش پېسە بەشێوە جە بنیاڎنیای ژیۋای ئازادی دیۍ، گولانە یا گۊرە، گرنگ و ناگرنگ گرڎ ئەرکێوە بە باوەڕی و عەشقۆ جابەجێ کەرۍ.
وەختۍ شۆڕشو ۋەرنیشتی ئاما ئاراوە، بەبێ دووە دڵی ڕووەش کەرڎە مېڎانوو ۋەرنیشتی. جە لېوە دژو داعشی دژمنو ژیۋای و ژەنێوە ئەوەکۊشا، جە لېوەتەرۆ جە هەرمانو کارو بنیاڎنیای شۆڕشینە ڕەنجێوە فرەش کېشا. بە تایبەت پەی ئانەی شۆڕشو ۋەرنیشتی بە شێوەو ژەنۍ گەشە بکەرۆ و ۋەرفراوان بۆ، کۊششی فرەش کەرڎ. هەم جە ۋەرنیشتەنە، هەم جە مېڎانەکا سەرنیشت و ۋەرکۊتوو سووریاینە بە کاروبارو هۆشیارکەردەیۆ و ڕێکوزیاکەردەی ژەنا کورد، عەرەب، سووریانی، تورکمانی و ئەرمەنی دەوری چالاک و سەرمەشقش، دی. پەی پارادایمو ژیۋای ئازادی ڕابەر ئاپۆی بیاونۆ دلۍ ژەنا سووریای و گەلا، بیە بە سردێوە. پی مەرامۆ جە گرڎ یوەسێوە خاکو سەرنیشت و ۋەرکۊتوو سووریای و ۋەرنیشتینە جە گېڵاینە بۍ. جە ۋەرا ۋەرو گرڎ جۆرە هرووژمېوە دژ بە ژەنا و گەلا بە زیرەکییوە ئەوەکۊشا، هەوڵوێسش نیشانەدا. پەی ئانەی شۆڕشو ۋەرنیشتی پېسە شۆڕشو ژەنۍ جە جەهان و هەرێمەکەنە وەڵاو و گەشە بکەرۆ، پەی ئانەی شۆڕشو سووریای بۆ بە شۆڕشو ژەنۍ هەرمانۍ فرە گۊرێش کەردۍ.
گەر ئارۊنە جە هەرێمەکە و جەهانەنە شۆڕشو ژەنۍ جە ۋەرنیشتەنە بیەن بە نموونێوە، ئانە وابەسەو ڕەنجو هەڤاڵ سالیحەینە. پۊکەی شۆڕشو ژەنا سەرنیشت و ۋەرکۊتوو سووریای بەربڕو هەڤاڵ سالیحەینە.
ئارۊنە جە سووریا جە لېوە جە لایەنو هەتەشەیۆ سەرجەنۆ فشار سەرو ژەنا مکریۆ، جە لېوەتەرۆ بە هرووژمە فاشیستییەکا دۊڵەتو تورکی هەوڵ مڎریۆ دەسکەوتەکا شۆڕشو ژەنا ۋەرنیشتی بێ کاریگەر بۆنە سەرو ژەنا جەهانی و ۋەرکۊتوو مېیامینی. مەرامی سیاسییانەو ئی هرووژمە فاشیستییا جە بەینبەردەی ئیرادەو ژەنێن. دۊڵەتو تورکی فاشیستی جە ڕاو ئی هرووژماوە جارێوەتەر تەنگەتاوبیەیش جە ۋەرا ۋەرو ئیرادەو ژەنۍ و کوردی ئازادینە نیشانەدا. بەڵام ئەوەکۊشای هەڤاڵ سالیحەی حەقەتینەو گەلیش خوڵقنا کە جە هرووژمەکا دۊڵەتو تورکی فاشیستی و سەپنای مەردەی گۊرەتەرا. پۊکەی ئا بەهایۍ کە هەڤاڵ سالیحەی خوڵقنۍ، فرە جە مەردەی گۊرەتەرێنۍ و نمەتاویۆ بە مەردەی دلېنە بریا. یاڎ کەردەیۆ ئاڎۍ، بە دڵنیاییوە بە سەرکۊتەی شۆڕشو ژەنۍ مېیاوۆ بە ئامانج. ئەرکی ماناڎارو ئێمەی ژەنا ئانەنە ئی بەهایا پارېزنمۍ کە هەڤاڵ سالیحە بە کەسایەتی، ئەوەکۊشای و ئیرادەو ۋێشۆ خوڵقناش و جە مەردەی گۊرەتەرا. ئەرکما ئانەنە ئی بەهایا بکەرمۍ بە گەرەنتی ژیۋای ئازادی.
پېسە کەژەکەی بە حیچ جۊرۍ ئی هرووژمەیە قبوڵ نمەکەرمۍ و داوا جە تەمامو ژەنا جە ۋەرکۊتوو مېیامینی و جەهانی، بە تایبەت جە ژەنا سەرنیشت و ۋەرکۊتوو سووریای مکەرمۍ جە دژو ئی هرووژما مرداوە، وەرگری جە شۆڕشو ژەنا ۋەرنیشتی بکەرا و گۊرەتەرش بکەرا.
داوا جە گرڎ لېوە مکەرمۍ پەی ئانەی دۊڵەتو تورکی پېسە تاوانبارو جەنگی و دژمنو ژەنا داداگای بکریۆ هەڵمەتە ڕاوەبەر بکەرا، ئی سیاستە پیسۍ جە گرڎ یاگۍنە نامزڕۍ بکریا، پەی ئانەی جە دادگای مېاننەتەوەینە دادگای بکریۆ ئەوەکۊشای هامبەش ڕاوەبەر بکەرا و بە شۆڕشو ژەنێوە ژیۋای ئازاد وەش بکەرا."
