جە پەیاموو کۊردیناسیۊنوو کەژەکەینە ئامان: "ساڵەو ٢٠٢٤ینە، گردوو کۊشیایما پەی سیستمێوە دیموکراتیکی و ئازادیی ڕابەر ئۊجالانی بۊ".

ئەرەیاونایەکەو کۊمەڵەو ژەناو کوردستان (کەژەکە)ی، بۊنەو ساڵۍ تازێوە ئینەن:

"ئەوەڵوو سەدەو ٢١ینە پارادایموو شارستانییەتی دیموکراتیکوو ڕابەر ئاپۊی و پارادایموو شارستانییەتی دەوڵەتپارێزنی ئینۍ جەنگەنە. ئی جەنگە جە مەیدانی سیاسی و سەروازی و چاندوو کوردستانی و وەرکەوتی دلێڕاسینینە ئاستی حەرە بەرزەنە دەقۊمیۊ. سەروو بناغەو ئازادیی ڕابەر ئاپۊی پەی سەرکەوتەی شارستانیەتی دیموکراتیک، زیاتەر جە جارا بە ئیرادێوە گەورەوە جەخت سەروو هجوومەکاو دوژمنی کەرمێوە. ئێمە هێز جە گەشمەرڎەکاماوە ورگێرمۍ، کە سەروو ئی ڕێوە گیانشا فیدا کەرد و پا ئیرادەوە کە شایەنیوو یادکەرڎەیۊنۍ، خێرامای ئێساڵی کەرمێ. گەورەتەرین سەرمەشقەکاو تەڤگەروو ئازادیی ژەنا سارا (ساکینە جانسیز)، شیلان کۊبانۍ، شەرڤین دێرک، ڤیان سۊران، بێریتان (گوڵناز کاراتاش)، زیلان (زەینەب کیناجی)، لەیلا ئاگری، لەیلا سورخوێن، ئاخین ئامەد و هاوڕۍ ڕۊژهات، ئەرداڵ، ڕوکەن و سارانۍ، کە ڕابەرایەتی ڕۊحی گەردوونیی خەتۍ فیداکارییانۍ ئاپۊییانێشا کەرد. بیۍ بە سەرمەشق پەی سەرکەوتەی ئێساڵی. ئێمە جە کەسایەتیی ئەحمەدی و مەلسا موشینە، کە دژوو هجوومە ئەرەگیرکارییەکاو دەوڵەتوو تورکی جەسەو وێشا کەرد بە قەڵغان، هەرپاسە هامڕا هەڵمەت و مەمیان و وەڵات و حوسێن و وەڵاتپارێزنەی گەورۍ یوسرا دەروێشە و یادۍ عەگید و دیا هۊگر، کە پانیشتنە مەخمورنە گەشمەرڎۍ بیۍ، شەهیدبوون؛ سوهەیل خورشید عەزیزە و ئەبوزێد عەبدوڵا و سەرجەموو گەشمەرداو شۊڕشی بە ڕێز و سوپاسۊ یادۍ کەرمێوە.  وەعدەکەما پەی سەروستەی کۊشیای ئەوەخوای کەرمێوە.

ئا ئامانجۍ سیستموو ئەشکەنجەو ئیمراڵییشا خولقنا، پووچەڵۍ کریێوە

ئا کۊشیایە ٢٤ ساڵێن لاو ڕابەر ئاپۊیوە کریۊ، ئامانجەکێش ئەرەمەرزنای سیستموو ئەشکەنجەو ئیمراڵییش پووچەڵ کەرڎۊ. سیستموو ئەشکەنجەو ئیمراڵی بەنایاسایی ملۊ ڕاوە و جیهاننە نموونەش نییا. ڕابەر ئاپۊ واتش، ئەگەر پەرسەو کوردی چارەسەرە نەکریۊ، ئیتر ژەنی و گەلاو وەرکەوتوو دلێڕاسەی تووشۍ قڕکەرڎەی باوە. ئا جەنگۍ ئێساڵ ڕووەشا دێنە، نیشانەشا دا. وەرکەوتوو دلێڕاسەی فاڕیان پەی دۊزەخی و ئیدارەی فاشیستوو تورکی، تورکیاش کرڎەن بە زیندان. بێگومان ئی یاگۍ ئیدارەو فاشیستییەو تورکی بێچارەن وەرانوەروو ئیرادە و شێوازوو مدرامانوو ڕابەرێتی.

ڕابەر ئاپۊ سەرمەشقوو فەلسەفەو ژەنۍ ئازادێن

فیکر و فەلسەفەو ڕابەر ئاپۊی هەرێمەکە و جیهاننە ددانش نریان پۊرە. ڕابەرێتی بە ورشانایوە گرڎوو هەلومەرجەکاو گۊشەگیری کاریگەریی وێش زیاد کەرۊ. چی ڕووەوە ڕابەرێتی بە سەرمەشقوو گەلا و ژەنا مشناسنیۊ. سەروو بناغەو ئازادیی ڕابەر ئاپۊی هەڵمەتێوە وەڵۍ وزیا و جە سەدان وەڵاتانە داواو ئازادی بەرز کریاوە، ئینەیچ پامانۍ کە فیکروو ڕابەر ئاپۊی چی جوگرافیانە و دلۍ جڤاکەکانە قبووڵ کریان. ئینە پا مانێچە مێ، کە هێزەکاو سیستموو دەسەڵاتدار-دەوڵەتپارێزنی کەوتێنۍ چێروو وەنەپەرسایۊوە. سەروو ئی بناغەیە، ڕابەر ئاپۊ سەرمەشقوو فەلسەفەو ئازادیی ژەنێن، جڤاکی ئیکۊلۊژیک و دیموکراتیکوو سەدەو ٢١ ین. سەرەڕاو ئا گرڎوو ئەشکەنجە و هجووما جە جەنگی جیهانیی یەرەمنە سەپیێنێ، ڕاسیینە ئینە سەرکەوتەێوە گەورەن.

پارادایموو شارستانییەتی دیموکراتیکی دماڕۊنە ئەزموون کریۊ

هەڵبەت کۊشیای ئازادیی ژەنا بە کاریگەریی شۊڕشوو ژەنا و تەڤگەرەکەیما  گرڎ ساڵێوە تازێنە، هێزێوە یەکلاییکەرەوەی کاریگەر و فاڕیایش جیهانەنە دا نیشانە مدۊ سەروو ئی بناغەیە ئەگەر بە شێوێوە ڕێکوزیا کریۊ، بۊ بە مایۍ فاڕیای وەڵێئامایەکا. بە سەرمەشقایەتیی هێزوو ژەناما دژوو دەوڵەتی فاشیستوو تورکی و داعشی، دەسکەوتۍ گرنگۍ وەڵتەرنە دەس وزیێنێ. ئی سەرمەشقایەتییە هەرێمەکاو پارێزنای مەدیای و زاپنە یاوان قەلاپۊپە. کۊشیای ئازادیی ژەنا خەتەو ڕابەرێتیینە جە ڕاو ئا شۊڕشەیۊ، کە دماو کوشتەی ژینا ئەمینی-ێوە دەسش پەنە کەرڎ، فاڕیاێوە ڕادیکاڵش کەرڎ و مۊرەو وێش دا وەنەو ساڵۍ تازۍ و وەڵێئامایەکا. دروشموو "ژەنی، ژیوای، ئازادی"، کە فەلسەفەو ڕابەرێتیما جە سادەترین فۊڕموو وێشنە گێروو وێش، نەوەک تەنیا پەی ژەنا، بەڵکوم پەی گرڎوو گەلا داواو خاوەندارێتیینە جە پارادایموو ڕابەرێتی، سەرچەمەو شناسی و مدرامانوو گرڎوو گەلاو جیهانین.

بە ئامانجوو گەورەکەرڎەی ئی ڕۊح و باوەڕییە کۊنفرانسی جیهانی ژەنا کریا. کۊنفرانسەکەنە سڵام وەنەو ژەنە گەریلاکا کریا و کۊنفرانسەکە کریا سەوقاتیی ژەنە مدرامانکەراو هەرێمەکاو پارێزنای مەدیای و وەرنیشتی. ئی ڕووەدایۍ سەرکەوتەی خەتەو ژەنۍ ئازادۍ نیشانە مدا.  پی مانۍ هەڵمەتەکۍ کەژەکەی "بە ژەن، ژیوای، ئازادی" بەرەو شۊڕشوو ژەنا"  پەی بەرزکەرڎەیۊ ئاستوو کۊشیای و یەکلاییکەرڎەیۊ گرنگ بێ. چی خاڵێنە ڕابەرێتیما جە سەدەو ویس و یەکینە ژەنی و گەلی پێسە سەرمەشقوو شۊڕشی نامۍ منیا. پێسە چەنی گرڎوو گەلاو دنیۍ تەڤگەرێوەشا پەی ئازادیی وێشا وەش کەرڎەن، چی چوارچوەنە شناسنامە و ئایدۊلۊژیا و ئامانجەکێشا دیاریۍ کەرڎێنێ، ئیساتۍ هەڵوێستی هامبەش و هەڵوێستوو کۊشیای حەر چوار لایەنوو دنیۍ لە پارادایم و هزر و ڕێبازوو ڕابەرێتیینە وەڵۍ گنۊ. پەنەوازا ئینەیە پێسە بەرجەسەببیەی کارەکتەری گەرڎوونیی ڕابەرێتی بیاومێنە. بەتایبەت جە چوارچوەو هەڵمەتەو ئازادیی ڕابەرێتیینە، ڕێکوزیێکۍ کەسۍ نامدارۍ و جڤاک، بەتایبەت تەڤگەرەکاو ژەنا،  سەدان وەڵاتانە داواو ئازادیی جەستەیی ڕابەر ئاپۊیشا وەڵا کەرڎۊ. جگە جە  فەلسەفە و فیکروو ڕابەرێتی، کەمپەینوو "وانایوە کتێبەکاو ڕابەرێتی"  کریا. ئینەیچە  بەڕاسی فرە بەنرخا و کاریگەریی هەقەتینوو ڕابەرێتی نیشانە مدۊ. چی خاڵێنە پێناسەی دروسوو تەڤگەر و کۊشیای ئێمە و بەشداریی هێزی سەرمەشق و جەنگاوەروو ئی حەقیقەتەینە، بەشێوێوە شینەبەر پارادایموو شارستانیەتی دیموکراتیکی جە چوارچوەو ئازادیی ژەنێنە میاونۊ دماڕۊی. ئا کۊشیایە کە ئێمە گرڎ مەیدانێونە کەرمێش، کۊشیای ئازادیین دژوو پیاسالاری. بە ڕێکوستەی کۊشیای ئازادیی ژەنا جەنگی جیهانیی یەرەمنە پێسە لایەنێوە دژەجەنگی بۊ بە ئامرازێوە پەی دماییئارڎەی  زووتەروو ئی جەنگی و ئەنجامنە ملۊ خزمەتوو بەرژەوەندیی ژەنا و گەلاوە.

پێسە تەڤگەرێوە کە گرڎوو مەیدانەکاو کۊشیای ئازادی ٤٠ ساڵەیمانە سەرکەوتەیۍ خاسێما دەس وستێنێ، ئێساڵیچ  جە کەسێتیی ژەناو کورڎینە ئی کۊشیای و ڕاپیمایە دژوو پیاسالاری پەیتا پەیتا بەرەو وەڵۍ بەرمێ. ئێمە دەوری سەرەکیما بە زیهنیەتوو ئاشتی و یەکسانی و دادپەروەریی ژەنا گێڵنمێ، کە سیاسەت و جەنگ و ژیوای و خەباتوو ڕێکوستەینە گرڎ گلێرگێوە ڕەنگمج کەرۊ.  

بە میراتوو کۊشیای ٥٠ ساڵەو ڕابەر ئاپۊی، پارادایموو شارستانیەتی دیموکراتیکی و سەرمەشقایەتییە شکۊدارەکەیش، بە ڕەنج و هەوڵۍ سەدان ژەنە قارەمانا، بە ژیری و فیداکاریی گەلوو کورڎستانی و هەرێمەکەی، مەیدانوو شۊڕشوو وەرنیشتی، کە داراو شناسنامەو ژەنان، دژوو سیستمی دەوڵەتپارێزنوو پیاسالاری کۊشییۊ و هومێدوو ئینسانیەتی قەوەتتەر کەرۊ. سەرکەوتەیما جە وەڵێوستەی شۊڕشوو وەرنیشتینە، کە بە بەهاکاو پەنجا ساڵەو کۊشیای ئازادیما بەرجەستە بییەن، جە سیستەموو کۊنفیدراڵی دیموکراتوو کورڎستانی و وەرکەوتوو دلێڕاسەینە سەروو بناغەو نەتەوەی دیموکراتیکی ئەرەمەرزیان. ڕا  پەی شۊڕشی هەرێمی  کەرۊوە و هەنگام بە هەنگام کاریگەری وزۊ سەروو سیستمی جیهانی.

جیهانەکەیما فاڕمۍ پەی بەهەشتێوە

سیستموو نەتەوەی دیموکراتیکی، کە ساڵەی تازێنە سەروو بناغەو شۊڕشوو ئازادیی ژەنا پێک مێ، بە سەرمەشقایەتیی ژەنا کۊشیاێوە  قەوەتتەر دژوو زوڵم و هجوومەکاو فاشیزمی  بریۊ ڕاوە. ساڵەی تازۍ  مەبارەکە کەرمۍ جە ئەندازیاروو ژیوای ئازادی ڕابەر ئاپۊی، کە تارێخی تاریکوو ئێمەش ڕۊشن  کەرڎۊ، تا جە ساڵەو ٢٠٢٤ دا چەمێما بە ڕابەرێتی گنا، هەرمانەو سەرمەشقایەتیما میاونمۍ یاگۍ و ڕابەرێتیما زیندانەنە ڕزگار کەرمێ. ساڵەی تازێنە تەڤگەری ئازادیما کە وەرپەرسا چی هەرمانێ، وەنەو گرڎوو ژەنا دیموکراتیکا کە ئازادی کەرا بە فەلسەفەو ژیوای، وەنەو ئەدایاما کە ساعیبوو هەڵوێستێوە بەنرخی و شکۊدارینێ، وەنەو گەنجە ئازایەکاما مەبارەک کەرمێ.