کۆردیناسیۆنو کەژەکەی بۆنەو ساڵڕۆو کۆمکوژی دووەمو پاریسیۆ داواش جە گەلی کەرد تا دادگاییکەردەو بکوژا حەقەتینەی پەرە بە ئەرەکۆشای بڎانە و پەی بەشداری جە چالاکییەکا ٢٣ۍ کانونو یوەمی تا ١١و کانونو دووەمی بانگەوازش ئەرەیاونا.
ئەرەیاوناکەو کۆردیناسیۆنو کەژەکەینە ئامان، "جە ٢٣ۍ کانونو یوەم و ٢٠٢٢ جە پاریسو پایتەختو فەرەنساینە، بکوژێوە سەر بە دۆڵەتو تورکو فاشیستی ویلیام جە مییانو کلتورو کوردی و کارگێوە کوردینە هرووژمش کەرڎ و پا مەڵامەتۆ ئەڤین گۆییە (ئەمینە کارا) کە ژیواو وێش بەتەمامەتی پەی شۆڕشی تەرخان کەردەبێ و پەی ماوەو ٣٤ ساڵا جە گردوو مەنتیقەکا کوردەسانینە ئەرەکۆشۍ بۍ، هونەرمەندو کوردی میر پەروەر (محەمەد شیرین ئایدن) و وڵاتپارێزنو کوردی عەبدولرەحمان کزل گەشمەرڏۍ بیۍ. جە دووەم ساڵڕۆو گەشمەرڏەبیەیشانە ئێمە بە رێز، وەشەویسی و پنەزانایۆ گەشمەرڏاما ویر مارمێوە و قەول واوەی مکەرمێوە کە مەرامو گەشمەرڏاما کە بریتی بێ جە ژیوایێ شکۆمەندانەی و ئازادی بارمێنە دی".
ئەڤین گۆییە هاوارو ژیۋای ئازادو ژەنا کوردیش یاونا بە جەهانی
ئەرەیاوناو کەژەکەینە ئامان، "هامڕێما ئەڤینە دلێ نەریتو مڏرامانو بۆتانینە گۆرێ بییە، وڵاتپارێزیش بە قووڵتەرین شێوە هەستش پنە کەرد و پێسەو هێماو ئا وڵاتپارێزیە بیی بە نمونێوە هەرە جوانو دڵسۆز و وەفاداری ژەنا بە خاکیۆ. پەی ئانەی نەریتو مڏرامانو بۆتانی یاونمێنە بە گردوو مەنتیقەو جەهانی، بە تایبەتیچ یاونمێش بە ژەنا کوردی و گردو ژەنا، بێ مڏرای ئەرەکۆشایش کەرد. جەماوەو ٣٤ ساڵێ پەڕ و پیمانە هەر یاگێنە پەنەوازیش کەردێ چا ئەرەکۆشای کەرێ، پەی ئانەی فەلسەفەو ژیوای ئازادیی ڕابەر ئاپۆی یاونۆنە بە گردوو ژەنا، هەوڵەکێش وستێ هەرمانە. تۆمو ژیواو ئازادی کە جە ڕابەر ئاپۆیش هۆرگێرتەبێ دڵو گردوو ژەنانە نیاش. پەی ئانەی ژەنێ سەرو ژیاوای ئازادی پاگیرێ بانە و ئا ژیوایە سەوز بکەرا، ئەرەکۆشا. بە دەسنیشانکەردەی ڕابەر ئاپۆی سەرو ئانەی 'ژەنی ئازادە، کوردەسانی ئازادا' دەسشپنە کەرد و کۊتە ڕا و پەی ئازادبیەو گردوو ژەنا کوردی ئەرەکۆشا. جە پارتیبییەو ژەنا کوردیۆ تا وێپارێزنای و سازکەردەی سیستمو دیموکراتیکی جە گرد کاتێنە بە شێوێ چالاک بەشدارە بۍ، هاوارو ژیواو ئازادی ژەنا کوردیش بە گردوو جەهانی یاونا.
وڵاتپارێزنی ئازاما میر پەروە وەراوەرو هرووژمەکا قڕکەردەی و کلتوری دوژمنی، جە ئەوروپانە بەشداری کارو خەباتو کلتوری بیی، پارێزگاریش جە زوان و هونەرو کوردی کەرد و دژو جینۆسایدی ئەرەکۆشا. گۆرانییەکاشەنە ئا ئێشەی دۆڵەتو تورکی فاشیستی بە کوردەسانیش چەشۍ و هەرپاسە مڏرامان جە دژو ئا کردەوە فاشیستیا گێڵنێوە.
وڵاتپاڕێزی ئازاما عەبدولرەحمان کزل ئەوروپانە بەردەوام دلێ ئەرەکۆشاینە بێ و کلتورو وێش پارێزنێ و بیی بە نمونەو وڵاتپارێزنی. ژیواو تاراوگەیش قەبوڵ نەکەرد و وەراوەرو ژیواو ئەوروپای چۆکش نەنامنارە، پابەندو بەها کوردستانییەکا بێ، بەردەوام دڵشەنە وەرمو ئانەیش بێ کە روێ گێڵۆوە پەی کوردەسانی.
دۆڵەتو فاشیستو تورکی مروڤکوشی جە کەسایەتی ئی مرۆڤە بەنرخانە، هرووژمش کەرد سەرو کلتوور و وڵاتپارێزنی کوردی.
٩ساڵێ دماو ئانەی جە ساڵەو ٢٠١٣ی یەرۍ ژەنە شۆڕشگێڵێ کوردی پاریسەنە گەشمەردێ کریێ، ئی ڕووەدایێ کە پێسەو دووەم کۆمکوژی پاریسی جە تاریخەنە مشناسیۆ، یۆن جە کردەوە فاشیستیەکا دۆڵەتو تورکی کە ئەوروپانە سەرو بنەماو هرووژمو جینۆسایدی لوا ڕاوە.
دۆڵەتو تورکو فاشیستی پەی تەمامکەردەو جینۆسایدو کوردی پەنا پەی گرد جۆرە گڵاوێ بەرۆنە و جە کوردەسان و ئەوروپا و وەرکەوتوو دلێڕاسەینە کۆمکوژیی ئەنجام مرۆ بەتایبەتی ژەنا شۆڕشگێڵی و سەرمەشقێ بەئامانج کریا. هرووژمەکا ئی دماییە پەی سەرو وەرنیشتی، کە هەڤاڵەما ئەڤین گۆییە چا جەنگ چنی چەتەکا داعشی بەرێ ڕاوە، گەرەکشانە وساش دلێ تاریکیۆ. چی دمایانە، ئەنجامو هرووژمە قیزەونەکەو ١٨و کانوونو یوەمی، خەباتکارێ و ڕۆنامەوانێ ئازاد جیهان بیلگینە و نازم داشتان گەشمەرڏێ کریێ. جە کەسایەتی ئی دووە ڕۆنامەوانانە، گردو گەشمەرڏا ئەرەیاونای بە ڕێز و حورمەتۆ ویرمارمێوە و ئەرەیاونمێش بەدڵنیاییۆ 'ژەنەڕاڵەکا ئاپێ مووسا' و شۆنکەتاو گوربەتەلی ئەرسۆز قەد دمایش نمێ.
دۆڵەتو تورکی بەمەبەسو تەمامکەردەو جینۆسایدو کوردا جە گرد بوارێنە پاڵپەشتی چەتەکا مکەرۆ کە هەڕەشەنێ پەی سەرو گردو مرۆڤایەتی. بەتایبەتی جە دژو شۆڕشو وەرنیشتی، شۆڕشو ژەنا وەرنیشتی، کە هیواو گەلان، زیاتەر جە ١٠ساڵان پەی ئانەی هرووژم سەرو وەرنیشتی کەرا چەتەکێ پەرەوەردە و ڕاهێنانشا پنەکریۆ. کورد هەریاگێنە گەرەکش بۆ بە ئازادی و شکۆمەندییۆ ژیو بەکارشا مارانە و بی ئامانجۆ گەرەکشا چەتەکاش بەرەو هەر یاگێوە جەهانی ڕەوانە کەرۆنە.
چی ڕووە چارەسەرنەکەردەو کێشەو کوردی نەک تەنیا پەی کورد و کوردەسانی، بەڵکووم پەی گردو وەرکەوتوو دلێڕاسەی و ئەوروپا و جەهانیش بییەن بە پرسێوە گردی.
دەسەڵاتی حەقەتینەو پەشتە و بکوژەکا، دۆڵەتو تورکین
بێدەنگی وەراوەرو کۆمکوژییەکا دۆڵەتو تورکی فاشیستی جە ئەوروپا و کوردەسانەنە، چەتەکا تورکیای بەقوەتەر مکەرۆ و با بە مەڵامەتوو ئانەی ئا چەتێ بابە بەڵا پەی گردو مرۆڤایەتی. هەرچنە بکوژەکێ ئشنازێنێ، هەرپاسە دانپۆرەنییای سیخوڕەکا میتی بەڵگەی زیاتەر سەبارەت با کۆمکوژییا دۆڵەتو تورکی وساڕووە، حکوومەتو فەرەنسای سیستمو یاسا و دادپەروەری وەرو چەما مەگێرۆ و دۆڵەتو تورکی وەرەوڕوو یاسێ مەکەرۆوە. ئینەیچ بۆ بە مەڵامەتو قەوەت کەردەی چەتەکا و ڕاگیری چی هرووژما مەکەرۆ. دەسەڵاتو پەشتە بکوژەکا خودو دۆڵەتو تورکی فاشیستی ومیتا. دۆڵەتو تورکی و میتێ جە کوردەسانەنە و گرد یاگێنە تاوانەو جەنگی ئەنجام مرا. جە پاریس و گرد یاگێنە تاوانەو جەنگی بەرۆ ڕاوە. ئارۆیچ جە سەرنیشتوو وەرکەوتوو سوریائ بەهەمان شێوە بە کوشتەو کەسانی مەدەنی تاوانەو جەنگی ئەنجام مرۆ و هامشێوەو داعشی ژەنی سەرەبڕا و دەستدرێژی و کوشتەو ڕۆنامەنوویسا ئازاد ئینا چا چوارچێوەنە. پۆکەی دۆڵەتو تورکی و ئەردۆغان کە تاوانبارینێ، پەنەوازا دەمودەس وەرەو ڕوو دادگای کریاوە و سزا دریانە.
پەنەوازا گردوو چالاکیەکانە بەشدارێ بیمێ
پەنەوازا گردو جوانا و ژەنا بزانا کە ماناو حەقەتینەو دڵسۆزی پەی ئەڤین گۆیی و گردوو گەشمەرڏا پارێزناو و بەهێزکەردەو شۆڕشو ئازادین، شۆڕشو ژەنا و بەتینتەرکەردەی ئەرەکۆشاین. سەرو ئی بنەمێ، بەبۆنەو٢هەمین ساڵو، دوومین کۆمکوژی پاریسی بەتایبەتی داوا جە ژەناو و جوانا و گردوو گەلەکەیما مکەرمێ هەتا بکوژە حەقەتینەکا دریانە دادگا و بەردەوامێ بیدی جە ئەرەکۆشای و بەشداری گردوو چالاکییەکا ٢٣ی کانوونو یوەمی کەردێ، کە تا ١١و کانوونو دووەمی ئەنجام دریا.
هرووژمەکێ پەی سەرو سەرنیشتیوو وەرکەوتوو سوریای ڕوانە ئینا پەرەساناینە. داوا جە گردوو گەلەکەیما و دۆساما مکەرمێ خاوەنداری جەشۆڕشی بکەرا گرد یاگێ کوردەسانی و جەهانینە بەهاکا شۆڕشی وەرفراوەنتەر بکەرا."
