لەندەن؛ دژو هجوومو پۊلیسی پەی سەرو کۊمەڵێوە کوردیی، چالاکیی ناڕەزایەتی کریا
دژو هجووم و ڕاگێرییەکاو پۊلیسو هارینگەی جە چالاکییەکاو کۊمەڵەو کوردینە، وێنیشانەداێوە ناڕەزایەتی لەندەننە لوا ڕاوە.
شەوەو ٢٦ تشرینو دووەم / نۊڤەمبری پۊلیسو هارینگەی هجوومش کەرد سەرو کۊمەڵەو کوردی، کە چا وەختەنە بۊنەو ئەرەمەرزنای پەکەکەیۊ ئاهەنگێوەش دلێنە کریۍ، چا هجوومەنە ژن و زارۊڵۍ فرۍ بریندارۍ بیۍ.
دژو ئاهجوومەو پۊلیسو بەریتانیایە و ڕاگێرییەکای تەری پۊلیس جە چالاکییەکاو کورڎانە سەرو جادەیۊ، وێرەگاو هیزی یەکشەممە سەرو داواو یۊبییەی ڕێکوزیا دیموکراتیکەکاو بەریتانیای چالاکییەکاو ناڕەزایەتی وەراوەرو ورسونیشت و مامەڵاو پۊلیسو بەریتانیای لەندەننە کریا.
چالاکاو کوردی هارینگەوە بە ڕاپیمای بەرەو جادەو ویدگرینی لوۍ و چا کوۍ بیێوە و چندین دروشمێشا دژو "مامەڵەی نادیموکراتییانەو پۊلیسو بەریتانیا"ی وەراوەرو چالاکییەکاو کورڎا واتێوە.
حەر جە چالاکییەکەنە بروشەرۍ بە زوانی ئینگلیزی سەرو خەڵکیرە بەشۍ کریۍ و دلێشانە ئاماژە پانەیە کریابۍ، پۊلیسو بەریتانیای بە بەهانۍ جیاجیۍ هجوم و تندوتیژییەکاش دژو ناوەندە کولتووری و هەرپاسە چالاکییە دیموکراتیکەکاو کورڎا سەرو جادەیۊ زیادۍ کەرڎێنۍ.
هەریۊ جە یانەو گەلی بەریتانیانە، جڤاکی ئازاڎ، کەژار و تەڤگەرو ئازاڎیی گلێرگەو کورڎسانیچ بەشدارییشا چالاکییەکەنە کەرد و چندین چالاکۍ و کەسایەتیۍ ئینترناسیۊناڵێچ، کە بەشدارۍ بێنۍ قسێشا کەرڎۍ و بە دروشمەکاو پێسە 'مدرامان ژیواین'، 'ژەنی، ژیوای، ئازاڎی'، 'پەکەکە گەلا، گەل ئینا چێگە'، 'بژیوۊ سەرۊک ئاپۊ' و ' گەشمەرڎێما ڕۊشنایی ڕێنۍ، چالاکییەکە دماییش ئاما.
