تاریخو گەلێوە قارەمانی کە پەی دادپەروەری و ئازادی وێشا فیدا کەرد تۆمار مکەرۆ. یۆ جا قارەمانا ژەنێوە ئازاو گەلوو کوردینە لەیلا قاسم. ئاڏ نەک تەنیا کەسایەتیێ، سیمبولێوەنە کە جە مڏرامان و، بڕوا و شکۆو گەلەکەیش بەرکەوتێنە.

لەیلا قاسمە جە ساڵەو ١٩٥٢ جە شارو خانەقینی پانیشتوو کوردەسانی جە ئەڏایا بیێنە. لەیلا جە جوگرافییوە سەخت و ئاڵۆزەنە ژیوێنە، زاڕۆڵەیەتیش چێرو زوڵمی و زۆدارینە ویەرنان و گۆرێ بیێنە. لەیلا زانکۆو هەولێرینە بەشو کۆمەڵناسیش وانان. جە تەمەنێوە کەمەنە قەرارشدا پەی گەلەکەیش ئەوەکۆشای بکەرۆ و بەشداری یۆبییەو ونکارا کوردەسانی (YXK) بۆنە.

ساڵەو ١٩٧٠نە ڕژێمو بەعسو عێراقی بە شێوێوە سیستەماتیک زوڵمش جە گەلوو کوردی کەرد. زوان، کلتوور و شوناسو کوردا حسابش پەی نەکەرێ. دەنگوو گرڏ ئۆپۆزسیۆنەکاش کپ کەرێ. لەیلا قاسمە جە دژو ئی فشارا بەرەکەوتە و بێدەنگە نەبییە. بە بڕوا و، ئازایەتی و ئیرادۆ بەشداری مڏرامانی بییە. ئاڏە تەنیا کۆششکارە نەبێ، جە هەمانکاتەنە کەسێتیێ سەرمەشقە بێ کە جە مێڏانو سیاسیی پیاسالاری پێسەو ژەنێوە لوێبێ وەڵێ. ئاڏە نیشانەش دا کە ژەنێش متاوانە جە دژو زوڵمی مڏرامان  بکەرا.

لەیلا قاسمە ساڵەو ١٩٧٤ زینانییە کریۆنە و ئەشكەنجەی فرە قورس دریۆنە. داواش چنە کریێ داواو ویەردەی بکەرۆ و پەشیمانە بۆوە، بەڵام ئاڏە هیچ ساتێ دەسش جە مڏرامانی هورنەگێرت. لە

جە ١٢ ئایاری ١٩٧٤نە لەیلا قاسمە جە لایەنو ڕژێمو بەعسیۆ جە قەنارە دریا. لەیلا قاسمە پێسەو یوەم زینانییەی سیاسیە ژەنێ کە جە عێراقەنە جە قەنارە دریا، جە تاریخەنر یاگێش گێرتە.

بە دووژمنیش وات "کوشتێم، بەڵام مشۆم ئی حەقیقەتەیە بزاندێ، بە کوشتەیم هەزاران کوردێ هۆشیارێ باوە. دڵوەشەنا و شانازی مکەرو کە گیانو وێم پەی ئازادیی کوردەسانی فیدا مکەرو" مۆرەو وێش جە تاریخی دا. ئا ڕووە نەک تەنیا ژەنی، بەڵکو هیواو گەلا، ئێش و حەسرەتو ئازادیشا وەردەمو ئا جەقەناردەایە دەنگش داوە.

لەیلا قاسمە پەی گەلەکەیش تەنیا یادوەریێ نییەنە، جە هەمانکاتەنە بانگەوازس ئەوەکۆشاین. نامێش تا ئیسە جە مێڏانەکانە، جە سروودێ، شیعرەکا ئازادیینە دەنگش دانۆ. پەی نموونەو ئازای، شکۆ و بڕوا، ئارۆ ئاڏە پەی گرڏو ژەنا کوردی و گرڏ گەلا ئازادیوازی سەرچەمەو ئیلهامینە.