گەلوو کوردی و دۆساشا هەڵمەتەو 'ئازاڎیی پێ عەبدوڵا ئۆجالانی، چارەسەری سیاسی پێ پرسوو کوردی' کەرانێ بە ڕۆژەڤوو وڵاتەکاشا. یووە چا دۆسا پەرلەمانتارەو پارتوو سۆسیالیستی سویسرای لاورەنجە فەهلمان ریلەیەنە. ریلە چن ڕووێ چێوەڵتەر سیاونوسوو پرسێوەش پێشکەش بە ئەنجومەنی فیدراڵی سویسرای کەردەبێ و سەرنجش وستەن سەروو گۆشەگیری ئیمراڵی. حەرپاس داواش جە سویسرای کەردەبێ جە مژاروو ئازاڎیی عەبدوڵا ئۆجالانینە هەنگامەبنیۆ و جمۆوە.

پەرلەمانتارە لاورانجە فەهلمان ریلە سەبارەڎ بە گۆشەگیری ئیمراڵی و هەڵمەتەو ئازاڎیی پێ عەبدوڵا ئۆجالانی پێ ئاژانسوو هەواڵی فوراتی(ANF) هۆرسەنگنایش کەرد.

'هەڵوێسوو سی پی تی یاگێ ویرچنەکەردەیۆین'

پەرلەمانتارە ریلە ئانەش دەسنیشانکەرد پێویسا سەروو سی پی تی و وڵاتا ئەوروپای جە ۋەراۋەروو گۆشەگیرینە هەنگامە بنیا و واتش: "وڵاتوو سویسرای و گلێرگەی میان نەتەوەیی جە مژاروو گۆشەگیری ئیمراڵینە متاوا کاریگەری وەشکەرا و فشار وزا سەروو حکومەتوو تورکی. جە ماوەی وییەردەنە سی پی تی سەردای تورکیایش کەرد، بەڵام جە سەرداکەیشەنە نەلا پێ زینڎانوو ئیمراڵی، پۆکاتی مشۆم بواچمێ تورکیا فشارش جە سی پی تی کەردەن کە سەردای  عەبدوڵا ئۆجالانی و زینڎانیا تەری سیاسی نەکەرۆ جە زینڎانوو دورگەو ئیمراڵی. سەرەڕاو ئینەیچ سی پی تی هیچ پاگیریێش پۍ سەردانیکەردەی ئیمراڵی نەکەردەن. فرە مەزانمۍ جەبارەو سەردانیەکەو ئی دماییەو سی پی تی پۍ تورکیای، بەڵام ئی ئاژە یاگۍ سەرنجێن."

'عەبدوڵا ئۆجالان سیمبلا پۍ کوردا'

پەرلەمانتارە لاورەنجە فەهلمان ریلە باسش چانەی کەرد عەبدوڵا ئۆجالان سیمبلوو کۊشیای ئازاڎیی گەلوو کوردین، هیواو گەلوو کوردیا و واتش: "عەبدوڵا ئۆجالان دلۍ گەلوو کوردینە یاگێوە گرنگە و ئێژاش هەنە و گەلوو کوردی گۊشش چنەگێرۆ. ۋەروو ئینەیە جە چارەسەرکەردەی پرسەکا کوردینە پێسەنە کارەکتەرێوە بنەڕەتیی. ئا گفتووگۆیۍ وییەردەنە کریۍ ئی حەقەتینەشا بەروست."

'ئازاڎیی عەبدوڵا ئۆجالانی پۍ چارەسەرکەردەی پرسەکا گرنگا'

لاورەنجە فەهلمان ریلە یۆ جە ئامانجەکاش جە پێشکەشکەردەی سیاونوس و پرسەکەیشەنە، جە مژاروو ئازاڎیی عەبدوڵا ئۆجالانینە ئانەنە کە سویسرا چی ڕوۆ هەنگامە بنیۆ و واتش: "گۆشەگیری سەروو عەبدوڵا ئۆجالانی و جەنگ، بە تایبەتی ئا جەنگەی جە ۋەرنیشتەنە کریۆ، پێوەرە لکەدریێنۍ. موزیڕبیەی سەروو گۆشەگیری موزیڕبیەین سەروو جەنگی. ئازاڎکەردەی عەبدوڵا ئۆجالانی پۍ گەلوو کوردی، پێسە بەشێوە جە چارەسەری قۊرتەکا تەماشە کریۆ."

'پێویسا گرڎ کەسێ بەشداری جە هەڵمەتەو ١٠ی تشرینوو یووەمینە بکەرۆ'

لاورەنجە فەهلمان ریلە باسش چانەی کەرد دەسپنەکەردەو هەڵمەتەو ١٠ی تشرینوو یووەمی پەی ئازاڎیی عەبدوڵا ئۆجالانی هەنگامێوە گرنگەنە و واتش: "جە ۋارا ۋەروو گۆشەگیری سەروو ئۆجالانی و پەی مسۆگەرکەردەی ئازاڎیی ئۆجالانی پێویسا وڵاتا ئەوروپایی دلۍ گلێرگەی میان نەتەوەینە هەنگامە بنیا. جە ۋارا ۋەروو ئی ئاژەینە پێویسا گەلوو سویسرای هەڵوێس برمانۆ. هەڵمەتەو ١٠ی تشرینوو یووەمی پی جۆرە ماناڎارتەرە بۆ.

'عەبدوڵا ئۆجالان ماندێلاو ئی سەردەمەینە'

پۍ مسۆگەرکەردەی ئازاڎیی عەبدوڵا ئۆجالانی مشۊم بە چەند قۆناغێوە هەرمانە بکەرمۍ. سەرەتا گۆشەگیری سەروو عەبدوڵا ئۆجالانی و زینڎانیا سیاسی لابریۆ. دماتەر گرنگی زیاتەر بڎەیمۍ بە هەڵمەتەو ئازاڎیی عەبدوڵا ئۆجالانی، کە پێسە ماندێلاو ئی سەردەمیە موینیۆ. هەڵمەتەو ئازاڎیی پۍ عەبدوڵا ئۆجالانی نیشانۍ هیواینە، بەڵام ڕێوە دور و درێژەنە پێویسا چی ڕوۆ بەشێوێوە سەفەربەری بەردەوام بۆ."