"فرە زەریف ڕوداوەکێش لکەدێنێ یۆکدرینیۆ"

دەسوەشیم پێ نویسەر و جنەکۆڵەر مامۆ  ئیبراهیم میکە علی، بەڕاستی فەنتازیاو ڕۆمانەکەی چێوێ لەزەتیو خیاڵبەر بێ، ئینە جگە ئانەی هەنگامێ ئەدەبی هەورامی گەورێ بێ پێ ئەدەبی کوردی بەگشتی و ئەدەب و هەورامی بە تایبەتی کەمێژوو ئەدەبینە ملۆنە خانەو دەسپێشخەری و داهێنانیۆ ، فرە زەریف ڕوداوەکێش لکەدێنێ یۆکدرینیۆ کە یاگێ وێشا پەنە زانایما بۆ پێش و دەس وەشیش جنە کەرمێ ، وەلێم هیچ کارێ بێ سەرنجو هەڵوێستەکەردەی سەرش ناتەمام بەرمشۆ ، ئی ڕۆمانێجە یۆن چانیشا کە ئیسەون دماتەریچ نەک سەرنجە بەڵکەم ڕەخنەیچش ڕوبەڕو بۆوە.

بەندە پێسەو وێم ئەوەوانایێوە سەرپایی و متەوازعانەی کەپێم کەردەن چن سەرنجێم لاوە گەڵاڵێنە بینێ کە هۆمێوەوارەنا یاگەگیرێ با !

سەرەتاوە ئەگەر هەرکەسێ ڕۆمانەو ( چنارە ) و مامۆستا ( ڕەزا بەهمەنی ) کە یەکەمین ڕۆمانەنە کە بە هەورامی نویسیێبۆ وە ڕۆمانەو ( مەولە ) و نویسەریچ ( ئیبراهیم میکە علی ) کە دووەم ڕۆمانەنە کە بەهەورامی نویسیێبۆ چنی ئی ڕۆمانەیە ( گێچاوەو ژیوای ) جیاوازیێ فرە گەورە زهنو خیاڵشەنە دروسە مەبۆ وەرو ئانەی ( پاڵەوان و کات و یاگێچ ) کە یەرێ بنەمێ گرد ڕۆمانێنێ ئەگەر پێسەو یۆی نەبا فرە نزیکێنێ جە یۆکترینیۆ:

ـ مەردەی ژەنەکا بە یەکجۆر کە مەردەیا سەرو لەمێوە .

ـ هەتیم کەوتەی کارەکتەرەکێ ( زاوڕۆڵەکا ) و هۆرگێرتەیشاوە ( تبنی ) کەرتەیشا لاو خەڵکی بێگانەی بەوێشا یۆشا فارس و یۆچشا عەرەب جگە مەولەنە مامۆیش هۆرگێرتێنێ، وە بەردەیشا پێی شارەکا فارسی و عەرەبی کە دماتەر تاران و بەغانە گیرسیاوە

ڕۆمانەو ( گێچاوەو ژیوای )نە نویسەر وەڵینەکەشەنە نویستەنش  ڕازەکێ باس جە ژیوارێوە بەرو هەورامانی کەرۆ ..... نویستەنیچش، هەرچندە ڕۆمانەکێ بە هەورامی نویسیێنە وەلێم ژیوارو قۆمیایەکا و دلێ ڕۆمانەکێ بەرو هەورامانین .... وەلێم کە سەعیدە کە پاڵەوانەو ڕۆمانەکەینە چنی زاڕۆڵەکەیش کە ملا پێ دەگێکێشا سەرو هانەکەو دەگێ لامانە ئیسراحەت کەرا نویسەر نویستەنش، پاڵشدا پا تەوەنێوە هەکە سەرو هانەکەیۆ بێ و پەنەش واچێني : تەوەنەکێ پیرشالیاری.

"نەژنەویێنەم بەرو هەورامانیۆ پیرشالیار پێ هیچ مەبەستێ بەکار ئامابۆ"

هەڵبەتە پیرشالیارو هەر چێوێوە کە نامێ پیرشالیاریۆ بۆ تایبەتا بە ناوچەو سنورو جۆگرافیاو هەورامانیۆ ، لانی کەم بەندە شکەمەبەرو یان نەژنەویێنەم بەرو هەورامانیۆ پیرشالیار پێ هیچ مەبەستێ بەکار ئامابۆ واتە ڕۆمانەکێ یان واچمێ نویسەر نەتاوانش جە کەش و ئاووهەوا و تابلۆکا هەورامانینە دور گنۆوە هەرچنە وەڵینەکەشەنە ماچۆ ڕوداوەکێ هنو بەرو هەورامانین

نویسەر منویسۆ، چون کوچێ خۆندەواریش بێ یوەیوەی وانیشاوە و وزێشا لاوە.

دماتەر مێ پنەما ماچۆ و منویسۆ ( دماو نان واردەی زیێرە مارفشا بەرد پەی مۆزەخانەی و دماو ئانەیچ لوێ پەی باخچەو ئاژەڵا.

جێگەنە وانەر هەست بە فرە لوایێ (مبالغە) نویسەری کەرۆ چون سەردای مۆزەخانەی پێی کەسێ خۆنەواری تەمامیچ کە ڕۆشنبیریێ تەمامش نەبۆ چێوێ لاوەکین و نمێ خیاڵشەرە کە سەردایش کەرۆ ج چای پێ کەسێ کەم خۆنەواری یان کەسێ نەخۆنەواری دوورە دەگێوە ئامابۆ پایتەخت پێسەو (مارف) ی، وەلێم سەرداو باخجەو ئاژەڵا یان شار و گەمەکا

مدینە العاب  یان سینەما کە جاوەختەنە پایتەختەنە بینێ چێوێ ئاسایین بەڵام مۆزەخانە یاگێ تێڕامانینە ! چونکە وەڵتەر هیچ وەڵینییێ (باکگراوند ) هیچ کام چا کارەکتراشە بەیان نەکەردەن.

دماجار گرد کارێ یاگێ سەرنجینەو بێ ئانەیە مەلۆ خانەو نویستە زیندەو کاریگەرەکاوە ، دیسان دەس وەشیم هەن پێی نویسەری و پی هەنگامێشە تەکانێوە جۆری (نوعی) یش دا بە نویستەیو ئەدەبو هەورامانی و وێش و ڕۆمانەکایچش ملانە دلێ مێژووی.