"محەمەد مسەفازادە، یادت بە بەرزی هەر مەنؤ"

"حەز کەرېنې ئارؤ کاکە محەمەدی مسەفازادە چەنیما بیێ و بە ئەژنەویەی ئانەی کە زۉانی هۆرامی بە تەمامی ئامانۆ وېشەراۉە کەمېۉ جە شەکەتی ڕۉە سەختەکاش بەرشیێ".

چی ڕۉانە تەلەفونېۉ جە هۆرامانۆ ئاما و برادەرېۉی سەرەبەرشیە جە مېدانو زۉان و ئەدەبیەنە دەمو باساۉە ۉاتش ": ... ئیسە وەشبەختانە زۉانی هۆرامی بە تەمامی ئامانۆ وېشەراۉە و جە سەراسەرو هۆرامانیەنە بە هەزاران کەسې جە یاگە جؤربەجؤرکانە بە هۆرامیانە منۉیسا و بە زۉانی هۆرامی هەرمانې کەرا."
ۉاتم : دەست وەش بؤ پەی یاۉنای هەۉاڵەکەی و ڕاسا و هەر جە بنەڕؤۉە بەرگنې کە قەڵەمبەدەسې هۆرامانی جە ڕاو پارېزنای زۉانەکەیشانە ئینێ گوزەرېۉی درؤس و زانست پەسەندەنە و دیار بې کە ڕۆتو دنیایشا ئینا چەنی و ئادېچې وەشبەختانە، وېشا ئاسایی، بە ژیرانە مامەڵەشا چەنی کەرد. 
بە دڵ حەز کەرېنې ئارؤ کاکە محەمەدی مسەفازادە چەنیما بیێ و بە ئەژنیەی ئی باسا کەمېۉ جە شەکەتی ڕۉە سەختەکاش بەرشیێ. یاد بەرزش بە گرامی هەر مەنؤ.

ڕؤ ٢٦\١٠ک، ساڵڕؤ مەرگو کاکە محەمەدی مسەفازادەی‌ا، ڕؤ ( ١٣٩١/١٠/٢٦) و جە ڕؤزگارېۉی هەر فرە سەختو زۉانی هۆرامیەنە، بە داخۆ کاکە محەمەدی وەشەۉیس پەی دماجاری سەرەش نیاۉە. لۉای کاکە محەمەدی زەدېۉی گۆرە بې پەی زۉانی هۆرامی و یاگې هاڵیەش جە گرد سەنگەرېۉو پارېزنای ئی زۉانیەنە وېش ئەرمانې، بەڵام هەماڵەکېش خاس زانېنې مشیؤ چېش کەرا، عەزمشا جەزم بې کە نازا ئاۉاتەکې کاکە محەمەدی زەمین گیرې با. پەی ئانەیە شەۉ و ڕۉېشا دێۉە دەمو یؤی و بە تەلاشی بەردەۉام کارېۉشا کەرد کە مەگەر هەر وېشا کەردە بؤ. بە ۉیر و بە قەڵەمی ۉیرمەندانۆ، کەندېشا پەڕې کەردێ و لېژېشا ئاردێ ڕاسە و ۉەربەسېشا دێۉە لا و ناسشا کارۉانەکە لەنگیش بێنە ڕا. ئەڵبەت زۉانی هۆرامی هەڵای فرەش ئینا ڕانە بەڵام ئیسە ئیتر ئا زۉانە نیا کە ناحەزېش تەمێۉە بینانە میرات کەردەیش. گەردەو چند دەیەیش سەرو رؤخساریۆ لا شیېنە و خەریکا شۆق مرمانؤ، وزەش کۆتەنۆ کار و سەمەرېش ئینێ ڕاۉە.
حەیف کاکە محمەد نیا دلېمانە تا ئی وەزعې ۉینؤ و پەی ساتېۉیچ بیەن دڵ جە ورکەو فۆتیای زۉانەکەیش ۉەر دؤ.
یادت پەی هەمیشەی بەرز و گرامی بؤ هەماڵی وەشەۉیس، کاکە محەمەدی مسەفا زادە.
زیندە بؤ ئازادی
زیندە بؤ بەرابەری
ئافەرین پەی پارېزەرا زۉانی هۆرامی

نویستەی: سیامەند هۆرامی