مەخمورنە گێچەڵەو ئەفسەرە تورکەکەی شەرمەزار کریا
مەجلیسو ژەناوعەشتاری کەمپو پەنابەراو مەخمورینە دژو گێچەڵەو ئەفسەرێوی تورکی پەی بۆ سەرو ژەنێو شەرناخنە، ئەرەیاوناێوی ونیاوە، دلێشەنە سڵام وەنەو ئیرادەو گەلو شەرناخی کریا.
دژو گێچەڵەو ئەفسەرێوی تورکی پەی سەرو ژەنێو شەرناخنە، مەجلیسو عەشتاری کەمپو پەنابەراو ڕۆستەم جودی (مەخمور)ینە، کۆنگرێوی ڕۆنامەوانییش بەست، ئەوەخوای کریاوە کە ئینە هجوومێوا پەی سەرو تەمامو گەلی و ژەناو کوردی.
کۆنگرە ڕۆنامەوانییەکەنە، مامۆستا بێریڤان ئیشلەکە واتش ئی هجوومە دژوو تەمامو گەلی و ژەناو کوردین، ستایشو ئیرادە و هەڵوێست و وێپارێزنای گەلو شەرناخیش کەرد وەراوەرو هجوومەکا، واتش: "دەوڵەتو داگیرکەرو تورکی دماو ئانەیە زاناش نمەتاوۆن ئیرادە و هێزو گەلو شرناخی بماڕۆ، پەوکای هەوڵێ مدۆ ڕاو گێچەڵێ و دەسدرێژی و ئاردەی جەندرمەی و سەرواز و سیخوڕاوە، کەلتوورو سیخووڕیکەردەی بارۆنە و بە وەڵاکەردەیوە ماددەی هۆشبەری ئیرادەو گەلی بماڕۆ".
مامۆستا بێریڤانە واتش پێسەو ژەناو کوردی بەتندی ئی هجوومەیە شەرمەزار مکەرانێ و داواش جە گردو ژەنا کەردە بە درووشمو "ژەنی، ژیوای، ئازادی"ی ئەرەپڕا و پەشتیوانی وەنەو گەلو شەرناخی بکەرا، جەختش کەردۆ ئی هجوومو ئارۆیە شەرناخنە کریان، سەوای گرد یاگێوی کوردستاننە دووبارە مبۆوە.
