بەنداوو تشرینی بیەن بە قەڵاو مڎرامانی تاریخی. هەرپاسە بی بە پێگەو ۋێپارێزنای گەلی و خاکو هەرێمو سەرنیشت و ۋەرکۊتوو سووریای. هەرپۊکەی ۋەرو ئینەیچ ​​گەل خاک و شکۆمەندی ۋێش پارێزنۆ و ئینا چنی جەنگەوانا ۋێش. چی مڎرامانەنە گەل جە تەماموو نەتەوەکاوە پەشتگیریش مکەرا و بەشدارۍ ئی ئەوەکۊشایە با.

یۆ چانیشا کە لووا پەی بەنداوو تشرینی پەی ئانەی پەشتگیری جە هێزەکاشا بکەرا، مەلا عومەر ئەل حەمید بۍ و پی جۆرە پەی ئاژانسوو هەواڵوو فوراتی (ANF)ی قسێش کەردۍ.

مەلا عومەر ئەل حەمید ئاماژەش پانەیە کەرڎ کە بەنداوو تشرینی، بەنداوو ژیاۋایا پەی گەلا هەرێمو سەرنیشت و ۋەرکۊتوو سووریای و واتش: "پەی پەشتگیری جەنگەوانەکاما جە بەنداوو مڎرامانینە ئاماڎێنمۍ. بەنداوو تشرینینە مڎرامان مکەرمۍ تا هرووژمەکا مردنمۍ. حەجگیز دەس چی مڎرامانیە هۊرنمەگېرمۍ و ئی مڎرامانە پەی ئێمە مەنەی و نەمەنەین. ئی مڎرامانەما جە ئایینو ئیسلامی و ئاشتییوە هۊرگېرتەن. داواو ئیسلامی ئانێنە کە گرڎو نەتەوەکا ڕێزو  یۆی بگێرا و پېوەرە بژیوا، بەڵام دۊڵەتو تورکی بە نامۍ ئیسلامیوە هەرمانە مکەرۆ، ئاڎ دژو یاساکا ئیسلامین".