کۆمیتەو چاندی و هونەری کۆداری سەبارەڎ بە گەشمەرڎەبیەی هونەرمەنڎوو سینەماکار مەنسور کەریمیانی جە ۋەرنیشتوو کوردسانی ئەرەیاۋناشا، ئامانجوو ئا هونەرمەنڎەیە فاڕایۆ تەجرووبەو دیموکراتیکی ۋەرنیشتی بۍ پۍ ۋەرکەوتی و ئێرانی.
کۆمیتەی چاندی و هونەری گلېرگەو دیموکراتیکی و ئازاڎیی ۋەرکەوتوو کوردسانی (کۆدار) ئەرەیاۋنېوەش سەبارەڎ بە گەشمەرڎەبیەی هونەرمەنڎوو سینەماکاروو ۋەرکەوتوو کوردسانی، مەنسور کەریمیانی وەڵا کەردۆ، کە مانگەی ویەرڎۍ جە ئاکاموو بۆردومانێوە دەوڵەتوو تورکینە پۍ سەروو شاروو قامیشلۆی گەشمەرڎە بی.
ئەرەیاۋناکەو کۆمیتەو چاندی و هونەری کۆداری پی جۆرەنە: "بەهەزاران کەسۍ جە ڕۊڵەکا گەلەكەیما بەژەن و پیاوە جە گرڎ چین و توێژەكا حەر چواربەشوو كوردسانی و بەروو وڵاتی و بەبەشداری ئازاڎیوازا جەهانی سەروو بنەماو خەتەو یەرەمی و نەتەوەبیەی دیموكراتیكی و پېوەرە ژیۋای گەلا، هەم سەروو ئاستی نەتەوەیی و هەم سەروو ئاستوو گەلا ئازاڎیوازی بەهەزاران كەسۍ بەشدارۍ مدرامانوو ۋەرنیشتی بیۍ. ئا كەسە ئازاڎیواز و نەتەوەیۍ حەر کامشا بەشێوېوە بەشداریشا جە بنیاڎنیای و پارېزنای روومەتوو نەتەوەیی و نیشتیمانی و دیموكراتیشا جە ۋەرنیشتوو كوردسانی و سەرنیشتوو سوریاینە کەرڎ. سینەماكار و كەسایەتی نەتەوەیی”مەنسور كەریمیان” كە ۋېش خەڵکوو شاروو سنەو ۋەرکەوتوو كوردسانیا، ماوەو چن ساڵێوەن بەئامانجوو فاڕایۆ حەقەتینە و ئاخېزی جە ۋەرنیشتوو كوردسانی و سەرنیشتوو سوریای و بەتایبەتی ئەرەمەرزناو ۋېڕاوەبەری دیموكراتیكی و پېوەرە ژیۋای گەلا سەروو بنەماو لوژیکی و فەلسەفەو نەتەوەی دیموكراتیكی پۍ ۋەرکەوتوو كوردسانی و گەلاو ئێرانی لووابۍ پۍ ۋەرنیشتوو كوردسانی و چا چنی ناوەنڎوو سینەماو ئازاڎی و دیموكراتیكی ۋەرنیشتی كاروخەباتش بەرد ڕاوە و ژمارېوە بەرهەمۍ سینەماییۍ و هونەریۍ ناوازېشا بەرهەم ئاردۍ".
ئاماژە پانەیچ کریان: "سینەماكار و بەرئاوەر، مەنسور كەریمیان بەبەشداریش جە خەباتوو سینەماو ئازاڎیی ۋەرنیشت و سەرنیشتوو سوریاینە سەلەمناش كە خۊتان هەستێوە بەرزی نەتەوەیی و نیشتیمانی و ئازاڎیوازانەن و چنڎە عاشقوو ئاخېزوو گەلەكەیما جە ۋەرنیشتەنە بۍ و گەرەکش بۍ جە ڕاو سینەمای و هونەریۆ بۆ بە سردېوە پۍ فاڕایۆ تەجرووبەو پېوەرەژیۋای گەلا و ۋېڕاوەبەری دیموكراتیكی پۍ گەلاو ئێرانی و بەستەیۆ ئاخېزوو ۋەرنیشتی و ئاخېزوو “ژەنۍ، ژیۋای، ئازاڎیی” گەلاو ئێرانی و ۋەرکەوتوو کوردسانی بەكردەیی خەباتش کەرڎ. بەڵام بەدرێژایی دووە حەفتەی ۋیەردەی و جە ئاکاموو هجووم و ئەرتەشوو ئەرەگیری توركی و بەئامانجوو دلېنەبەردەی چێرخان و سەرخانوو ۋەرنیشتی و سەرچەمە خزمەتگوزاریەكا گەلاو مەنتیقەکەی، بەفڕۆكەی بێ فرۆكەوان فرەو یاگاش بۆمبۋاران کەردۍ و حەر چا بۆمبۋارانانە بەدەیان هاموڵاتیۍ مەدەنیۍ گەشمەرڎۍ و زامڎارۍ بیۍ، یۆ چا كەسا کە چا بۆمبۋارانانە گەشمەرڎە بی، كەسایەتی نەتەوەیی و سینەماكارو بەرئاوەروو گەلەكەیما “مەنسور كەریمیان”بۍ".
حەر جە بەردەوامی ئەرەیاۋناکەو کۆمیتەو چاندی و هونەری کۆدارینە ئامان: "مەنسور كەریمیان چنی ئانەی ساحیب كەسایەتیېوە بەرزی نیشتیمانی و نەتەوەیی و ئازاڎیواز بۍ جە هەمان وەختەنە ئەندامێوە سینەما كارا ئازاڎییی ۋەرکەوتوو كوردسانی بۍ. پۊکەی پېسە كۆمیتەو چاندی و هونەری كۆداری بۊنەو گەشمەرڎەبیەو بەرئاوەر و سینەماكار مەنسور كەریمیانی و ئەنداموو جەمەو سینەماكارا ئازاڎیی، پەرسە و سەرەوەشی ۋېما جە کەس و كار و بنەیانەو كەریمیانی و گەلەكەیما جە ۋەرکەوتوو كوردسانی و سینەماكارا ئازاڎیی و نەتەوەیی و دیموكراتیوازا جە ئېرانەنە کەرمۍ و جە دەسدای كەسایەتی وڵاتپارێز و ئازاڎیواز و هونەرمەنڎ و بەرئاوەروو گەلەكەیما چی وەختە هەستیارەنە بەخەسارەتېوە گۊرەش مزانمۍ. حەرچنڎە كەریمیان پەی بەدی ئارڎەو ئامانجەكاش گیانی پیرۆزش بەخت کەرڎ، بەڵام پېسە چاند و هونەری كۆداری سۆز و پەیمان و وەعدوو ئانەی واوەی کەرمېوە تا یاوای بەئامانجوو گەشمەرڎە مەنسوری بەبێ مرڎای گوڕ بەخەباتی و کۊشیای بڎەیمۍ. بێگومان بەئامانج گێرتەیش جە لایەنوو فڕۆكە بێ فرۆكەوانەكاو دەوڵەتوو ئەرەگیری توركیوە بەمەبەس پێكئاما، چونكی ئا رژێمە فاشیست و دیكتاتۆر و ئەرەگیرە گەرەکش نیا كورد بۆ بە ساحیب و تەجرووبەی جە ۋېڕاوەبەردەی و ژیۋای تازەینە، ئینەیچ ئا مەڵامەتەنە كە فرۆكەكۍ دەوڵەتوو توركی بە ئەنقەس بەرئاوەروو و سینەماكاروو كوردی کەرا بە ئامانجوو هجوومە وەحشیانە و نامرۆڤانەکاشا".
کۆمیتەو چاندی و هونەری کۆداری داواو خۊتانکەردەی جە رەنج و مانیایی ئا هونەرمەنڎە گەشمەرڎەیە کەرۆ و ئەرەیاۋناش: "مەنسور كەریمیان بەهەڵوێس و خەبات و نزیكبیەیۊیش پۍ ئاخېزوو گەلەكەیما جە ۋەرنیشت و پېوەرە ژیۋای دیموكراتیانەو گەلا جە سەرنیشتوو سوریای جەبەرزتەرین ئاستەنە هەنگامەی كردەییەش نیا، حەر پۊکەی گەلەکەما جە ۋەرنیشت بە گەشمەرڎە بیەو ئا هونەرمەنڎەیە فرە دڵگرانۍ بیۍ و بەمەراسیمی بەشكۆوە خۊتانکەردەیشا جە گێڵایۆ جەنازەو گەشمەرڎەی کەرڎ پۍ شۊنماو جە ئەڎابیەیش...دماو چن ڕووۍ جە گېڵایۆ جەنازەو گەشمەرڎە کەریمیانی بەڵام رژێموو فاشیستی ئېرانی ڕاش بە گێڵایشۆ نەڎا".
جە ئاخروو ئەرەیاۋناکەینە ئامان: "پېسە كۆمیتەو چاندی و هونەری كۆداری داواكارێنمۍ جە گەلەکەیما بە تایبەت هونەرمەنڎا، خۊتان جە رەنجی و مانیایی گەشمەرڎە مەنسور كەریمیانی بەرگنا و پەی بەدیئامای فەلسەفەو ژیۋای ئازاڎیی ۋەرپەرسی ۋېشا بە یاگۍ بیاونا. ڕاو گەشمەرڎا بە دەسەبەرکەردەی ئازاڎیی پۍ گەلوو کوردی بەردەوام بۆ".
مەنسوور کەریمیان جە ئاڎابیەو ١٩٨٤و شاروو سنەیا جە ۋەرکەوتوو کوردسانی نزیکەو ٢٠ ساڵا بۍ جەبواروو سینەماینە هەرمانە کەرۍ و پۍ چن پڕۆژېوە سینەمایی جە ۋەرنیشتوو کوردسانی بۍ. ڕۊو ٢٣/ ١٢ / ٢٠٢٣ جە ئاکاموو بۆردومانێوە دەوڵەتوو تورکینە پۍ سەروو شاروو قامیشلۆی مەنسور کەریمیان گەشمەرڎە بی، دماو چن ڕووېوە جەنازەکەش بە مەراسیمێوە جەماوەری بەرەو سلێمانی ڕایی کریا و چایچۆ بەمەبەسوو بەخاک ئەسپارایش جە ماواو ۋېشەنە رەوانەو ۋەرکەوتوو کوردسانی کریا، بەڵام بە مەڵامەتوو ڕاگیریەکاو دەوڵەتوو ئێرانیوە، جەنازەکەشا گېڵناوە و ڕۊو ٧و ئی مانگۍ شاروو سلێمانینە ئەسپەردە کریا.
