دەوڵەتی ئەرەگیرکەرو تورکی بە مەبەسو دەسپەنەکەردەی ئۆپەراسیۆنێوی  تازەو ئەرەگیرکاریی  پەی سەرو پانیشتوو کوردستانی، دیدارەکاش چەنی پەدەکەی و عێراقی پەرە پەنە دان. پەدەکە، ماوێوی فرەن خاکو پانیشتوو کوردستانی ڕووەو ئەرەگیرکارییەکاو دەوڵەتو تورکینە کەردەنۆ، بە گرد شێوێوی خەریکو ئامادەکاریی جەنگی، هەرپاسە حکومەتو تورکی گەرەکشا عێراقی بوزۆنە دلێ ئی پیلانەو جەنگیوە وچا چوارچوەنە فشار موزۆ سەرو عێراقی. ئەردۆغان سەرۆکۆمارو تورکی جە سەردایەکەو ٢٢ێ نیسانینە پەی  بەغدای، ئینا هەوڵێ ئانەینە عێراقی کێشنۆ دلێ پیلانەکاش.

باسو ڕۆی و پلانسازییەکاو دەوڵەتو تورکی پەی پەرە پەنەدای بە ئەرەگیرکارییەکاش سەرو پانیشتو کوردستانی و بەتایبەتی سەرو گلێرگەی ئێزدی و پارێزگەو شەنگالی، تەرسەی تازێ شۆنیی وێشرە مارۆ. گەلو شەنگالی پەی دەسپەنەکەردەی قۆناغێوی تازەو مدرامانی دژو سیاسەتو ئەرەگیرکاری ئامادە مکەرا.

سەرۆکو لوجنەو عەشیرەتەکاو شەنگالی، عەمر ساڵح واتش، جە پەرسەو ڕۆو دەوڵەتی ئەرەگیرکەرو تورکینە سیاسەتو میساقی میللییش هەن و سەرو ئا بنەمێ سەردای بەغدای مکەرۆ، ئامانجی سەرەکیی دەوڵەتو تورکی پێسەو ویەردەی ئەرەگیرکەردەیۆ خاکو عێراقین. گەرەکشا کەرکوک و موسڵ ئەرەگیر بکەرۆ.  دەوڵەتو تورکیای باسو گارێ و مەتینا و ئاڤاشینی مکەرۆ، بە دەیان جارێ هجوومش کەردەن، بەڵام قەت سەرنەکەوتەن و شکستش ‌ئاردەن."

'فرەو هێزەکاو عێراقی چەنی ئەردۆغانی نییەنێ'

عەمر ساڵح ڕۆشنش کەردۆ، حەرچندە دەوڵەتو تورکیای باسو ڕێککەوتەی چەنی عێراقی مکەرۆ، بەڵام ڕاسییەکە چا ئاستەنە نییا، عێراقنە دلێ دەوڵەتینە هێزێ فرێ بەشدارێنێ، ڕێکوزیای سەروازیێ هەنێ. فرەو ئا هێزا چەنی قەرارەکەو ئەردۆغانی نییەنی. ئەردۆغان ڕووەش چکۆوە بۆ، پانەیچۆ نمەمردۆ. پەی نموونەی باشیکەنە، ئامێدی و شێلادزێنە بنکێش هەنێ. ئیساتی نە عێراق و نە هەرێمو کوردستانی نمەتاوا بکەرانێش بەرۆ. عەفرینش ئەرەگیر کەرد و ئیساتێ هێزەکا پێسەو داعشیش چا بنێ پەنە وستێنێ. هەرپاسە حکومەتو تورکی گەرەکشا موسڵ و کەرکوکیچ ئەرەگیر بکەرۆ. پەوکای پی سیاسەتیوە هەڕەشێوی گەورێنە پەی سەرو مەنتێقەکەی و دەوڵەتو عێراقی. پێویسا گەلو عێراقی دژو سەردایەکەو ئەردۆغانی پەی بەغدای ٢٢ێ نیسانینە کاردایۆشا نیشانە بدانێ.

'عێراق ئیسفادە جە  سەردایەکەو ئەردۆغانی نمەکەرۆن '

عەمر ساڵح سەرۆکو لوجنەو عەشیرەتەکاو شەنگالی، سەبارەت بە دەرئەنجامەکاو سیاسەتو ئەرەگیرکاری هۆشدارییش دا بە عێراقی و درێژەو قسەکاشنە واتش: "جە سەردای و کۆبییەیۆنە چەنی ئەردۆغانی عێراق حیچ ئیسفادێوە نمەکەرۆ چونکوم حیچ کام چا داواکارییاو دەوڵەتو تورکی کە سەرو عێراقیرە مسەپنۆشا، نییەنێ بەرژەوەندیی عێراقینە. سەردەمو سەدام حسێنینە دەوڵەتو تورکی تەنانەت پەی دەیەقێویچ نەتاوێ ئاوەو عێراقی گێرۆوە. ئەگەر دەوڵەتو عێراقی ئیرادەش بۆ، هەڕەشەکاو دەوڵەتو تورکی قبووڵ نمەکەرۆن. فڕۆکەکاو تورک ٢٤ سەعاتە سەرو شەنگال، مەخموور و پانیشتو کوردستانیرە مسووڕیانێوە، مشۆم دەوڵەتو عێراقی ئا چێوا قبووڵ نەکەرۆ.

'پەدەکە دوژمنو گەلو کوردین و هەم دوژمنو عێراقیچ'

عەمر ساڵح سەرنجەش پەی بۆ هامکارییەکاو پەدەکەی چەنی دەوڵەتو تورکی کێشتە و واتش: "پەدەکە هاگادارو هجوومەکاو دەوڵەتو تورکین پەی سەرو شەنگالی و کەشە ئازادەکاو کوردستانی و چا بوارەنە  هامکاریییش مکەرۆ. فوئاد حسێن و ڕێبەر ئەحمەدیچ سەر بە پەدەکەینێ. دەوڵەتو تورکی کە کێشەش چەنی زوانی کوردیی هەن، چەنی ددان بە پانیشتو کوردستایرە منیۆ؟ ئارۆ وەرپەرساو  پەدەکەی شەریکێ و یاردیدەرێ دەوڵەتو تورکینێ، پەدەکە پی سیاسەتاشە دوژمنایەتیی چەنی گەلەکەیش مکەرۆ، هاموەخت چەنی دوژمنو گەلو عێراقین. دەوڵەتو تورکی فاشیستا و جگە وێشا هیچ دەوڵەت و نەتەوێوی تەر قبووڵ نمەکەرانێ.

'کەمپەکاو پەدەکەی بە ئێزدییەکا تەرسناکتەرین یاگێنێ'

درێژەو قسەکاشنە، عەمر ساڵح، پەی قەرارەکەو حکومەتو عێراقی سەرو گێڵنایۆ ئێزدییەکا و دۆسیەو دادگای فیدڕاڵیی عێراقی، کە وەراوەرو وەرپەرساو پەدەکەیۆ کریاوە، ورسەنگنایش کەرد و واتش: "پەدەکە بۆنەو ورچنییەکا و سیاسەتەکاو ڕێ پەی ئەوەمەنەی ئێزدییەکا کەمپەکانە کەردەنۆ، ئەگەر کەمپەکێ چۆڵێ بکریانێ، پەدەکە خەسارێوی گەورەموینیۆ. پەوکای هەوڵێ مدانێ ڕاو گێڵایۆ ئێزدییەکانە قۆرتێ وەش بکەران.  گەلەکەما گەرەکشا بگێڵۆوە، بەڵام بۆنەو فشاری و هەڕەشەکاو پەدەکەیوە نمەتاوۆ بگێڵۆوە. حەروەختێویچ گەل مگێڵاوە دەوڵەتو تورکی بە هامکاریی پەدەکەی هجووم مکەرانێ سەرو شەنگالی. ئێمە گەرەکمانە گەلەکەما خاس بزانۆ، کە کەمپەکاو پارتی تەرسدارتەرین یاگێنە پەیشا."

'بڕێو کەسێ بە نامێ عەشیرەتیوە ئینێ شۆنەو بەرژەوەندیی وێشاوە'

ئاخرو قسەکاشنە عەمر ساڵح ڕەخنەش وەنەو بڕێ کەساو دلێ گلێرگەو ئێزدیی گێرت،  کە پەی بەرژەوەندیی وێشا بەشدارییشا جە کۆبییەیۆ و کۆنفرانسەکاو موسڵ و بەغداینە مکەرانێ و واتش: " بڕێشا واتشا ئانێ سەرۆک عەشایری شەماڵینێ. ڕاسیینە هەریۆشا بەسەرەو وێشا لوێنێ. گەل هیچ باوەڕێوش پانیشا نییا. پێویسا گرد لاێو بزانا کە هیچ کەس بەبێ هاگاداری گەلی چێوێ نمەکەرۆ. پێویسا هەرمانەکاو گێڵایوەی گەلی بە بەرنامە بکەرمێ و ئامادێ بیمێ دماتەرنە هجوومێو یا جەنگێو ڕووە بدۆ، شەنگال و گەلەکەیما بپارێزنمێ."