٣٧ ساڵێ وەڵێ ئیسەی ڕژێمو بەعسو عێڕاقی، بە چەکی قەدەغەکریا کیمیایی هەڵەبجەش بۆمبوران کەرد و با مەڵامەتۆ جە چن دەقێوەنە ٥٠٠٠ هاموڵاتیێ کوردێ کە فرەیشا ژەنێ و زاڕۆڵێ بێنێ کۆمکوژێ کریێ و بەهەزارانێ تەێیچ زامڏاری و بێسەروشۆنێ کریێ،  ئی بۆمبورانە بیی بە زامێ ساڕێژنەبییە بە جەسەو هەڵبجەی و گرڏو کوردەسانیۆ، پۆکەی ساڵانە جە ١٦ـی ئادارینە بە مەراسیمێ جەماوەریی یاڏو ئا کیمیابارانەی و کۆمکوژییە کریۆوە.

کەمێک وەڵێ ئیسەی مەراسیمو ٣٧ـەمین ساڵڕۆو کیمیابارانکەردەو شارەكەی، بە ڕاپیمایێ کە خەڵکو هەڵەبجەی و دەیان کەسایەتی و خەڵکو ناوچەکا تەرێ بەشداریشا کەردەن، وەردەمو باخو گرڏی هەڵبجەیۆ دەسش پنەکەرد و تا مۆنۆمێنتو هەڵەبجەی بەردەوام بۆنە.

یاگێ ئاماژەینە مەراسیمو ئێساڵی ماوەو یەرێ ڕوا خواینۆ و یوەم ڕۆنە چن وتارێ و بەرهەمێ هونەریێ و لاوانەوێ پێشکەشێ کریانە.

هەرپاسە جە دووێ ڕوی ئایندەیشەنە چن پانێڵێ و سیمینارێ سەرو کیمیاباران و کۆمکوژی هەڵەبجە ئەنجام دریانە و چا بارۆ چن کتێبێ وەڵا کریاوە.