مەراسیمەکە سەعات ١٠:٠٠ بە ئاماڎەبیەی بنەیانەو گەشمەرڎە گوڵستان تارۍ، هەمڕایا و هامخەباتا هەردووە ڕۆنامەوانا ئازاڎیی (گوڵستان تارۍ و هێرۆ بەهادین)ۍ و نوێنەراو پارت و ڕێکوزیاکا جە پارکو ئازاڎیی دەسشپنەکەرڎ.

سەرەتاو مەراسیمەکەی بە بەرزکەردەیۆ دروشمەو "گەشمەرڎە نمەمرۆ, گوڵستانە نمەمرۆ" و "ژەنی ژیۋای ئازاڎیی" پێشوازی جە تەرموو گوڵستان تاراۍکریا.

جە مەراسیمەکەنە بەنامۍ بنەیانەو گەشمەڕدە تارێو، ئەحمەد تەکیکی براش قسێش کەرڎۍ و سەرەڕاو سوپاس کەرڎەی ئاماڎەبیا مەراسیمەکەی، سوپاسو هامکارییەکا کۆمپانیاو چەتریش کەرڎ و واتش: "ئارۆ تەرمی مبارەک و گوڵستانۍ واڵێم بەرمێوە پەی ماواو ۋێش جە باتمانو ئیلحی، چا بە خاکی و ئەڎێش شاڎە مبۆوە."

دماتەر بەنامۍ کۆمپانیاو چەتریوە کەمال حەمە رەزا سەرەوەشی ۋێش پەی بنەیانەو گەشمەرڎۍ و گرڎوو گەلوو کورڎی بەربڕی و قەولو درێژەدایش بە کۆشش و ڕاو هەردووە گەشمەرڎە گوڵستانۍ و هیرۆیش واوەی کەرڎۆ.

هەر جە مەراسیمەکەنە سنور عەبدولرەحمانە بەنامۍ ڕۆنامەوانا ژەنۍ جە پانیشتوو کورڎەسانینە قسێش کەرڎۍ و واتش: "گوڵستانە بیە بە ۋەننگەو پنەیاونای ڕۆنامەوانا ئازاڎیی، پېسە ئازاڎیوازا درێژە پنەدەرو پەیامو گوڵستانۍ و هێرۆی مبیمۍ."

هەر جە مەراسیمەکەنە کاروان ئەنوەر سکرتێرو لقو ڕۆنامەنوویسا سلێمانی قسێش کەرڎۍ و سەرەوەشی ۋێش پەی بنەیانەو هەردووە گەشمەرڎا بەربڕی و واتش: "ڕۆنامەوانی ئازاڎ جە هەر شۆنێنە بۆ مبۆ بە مەراموو دۆڵەتا ئەرەگیرکەری، پۊکەی پېسە سەندیکاو ڕۆنامەوانا دژمنا گەلوو کورڎی دڵنیا مکەرمێوە ۋنەو هەردووە ڕۆنامەوانا گوڵستانۍ و هێرۆی بە زایە نمەلۆ و هەمیشە بەردەوامۍ مبیمۍ جە بەروستەی ڕاسی و حەقیقەتی."

جە دمادماینە بە درووشمەو 'ژەنی، ژیۋای، ئازاڎیی' ولی سەرو تەرمو گەشمەرڎە گوڵستان تارۍ نریارە.

دماتەر تەرمو گەشمەرڎە گوڵستانۍ پەی دماین جاری بریا پەی شۊنەو هەرمانکەردەی ۋێش جە کۆمپانیاو چەتری. چاوە تەرمەکەش تا تاسوڵجە بە مەراسیمۍ ڕێز ۋنەنیای ڕایی کریا پەی شارو ئێلحی جە سەرنیشتوو کورڎەسانی.