من مشۆم بنویس و گرڎ لێوە ئاگاڎار بکەرووە ، جە ئاسمانو وڵاتەکەیمەنە چڼە زەریف گوڵستانە بریسکەش مۍ. هەرپاسە هێرۆ چێش ناخشەنە لاونێوە و هامبەشی بە چ وەرمێوە کەرۍ.

من مشۆم بنویس و جە هەر یووەسۍ خاکو کورڎەسانینە نامۍ تۆش سەرۆ بکەرو رانیشاندەر گوڵستان، پەی ئانەی بزانۆ چێشش جە دەسدان. هەرپاسە بە شعرێوە ئێش و هێرۆی گێڵنووە و درکنونەش؛ 'دڵو من سرەوە ئارامەبە، ئاسمانەنە سرە و ئیسراحەت بکەرە.

من مشۆم بنویس و گوڵستان، کە چی گەشتەو تۆنە، هێرۆی هەمڕێت کە جە ئامیان و فیرشتەکا بۍ، چن زەریفە و ئارامە بۍ. هەرپاسە چنی هیواو  وڵاتەکەیم بۍ و جە هەر ساتێوەنە چنی شمە ئا هیوایە گەش کەرێندۍ.

من مشۆم بنویسوە و گوڵستان ، خەمواردەی تۆ پەی هەر چوار پارچەو کورڎەسانی، ئازایەتی و غیرەتی تاریخی تۆ کە جە ئامیانو مڎرامانیوە سەرچەمە گێرۍ. هەرپاسە وەشەسیایی هەر زاوڵێوە، هەست و هەڵوێسو هێرۆی پەی گرڎوو ژەنا.

هەڤاڵە بەقیمەتەکێم گوڵستان و هەمڕۍ تۆ و ئێمە ولەو کورڎەسانی هێرۆی ئارام؛ جە شمە تەرسۍ، تا قوڵایی دڵیشا جە شمە تەرسۍ. هەم دژمن و هەم نۆکەرەکۍ دژمنی.

ۋێش مشۆم جە شمە بتەرسا، جە بیەو شمە.

مشۆم بتەرسا، جە قەڵەم و هزرو شمە.

مشۆم بتەرسا جە ژیۋای شکۆمەندانەیتا کە خاوەنداریتا جە شکۆو گەلێوە کەردەن.

مشۆم بتەرسا، جە ئازایی و هەڵوێسی شکۆداری خاوەنداری کۆمەڵایەتی، خاوەنداری جە بیەو ۋێتا و بڕواتا بە ئازاڎیی، جە هێزو ۋێشناسای و ۋۍ وەڵۍ وستەی.

مشۆم بتەرسا، جە هونەرو شمە و جە ژیۋای ناوازەی و قەوەتیتا.

مشۊم بتەرسا، چا هەرمانێتا کە بە ئەوین و بڕوای هێقمەتاوە بەئەنجامش یاونێندۍ. جە تامەزرۆییتا  پەی ئاینڎەو وڵاتێوە ئازاڎیی، مشۆم بتەرسا.

مشۆم بتەرسا جە تەمەنو شمە کە بە زەریفی، هەستیاری و بە هوشیارییوە هۆنیانۆ. هەرپاسە جە گێڵای شمە پەی ژیۋای ئازاڎیی کە زیاتەر جە ژەنانە بەرگنۆ، مشۆم بە گرڎوو خانەکاشاوە بتەرسا.

مشۆم بتەرسا کە چنی مجیایدێرە دلۍ ئەرەکۆشای گەلەکەیتا پەی شکۆمەڼی، ئا گەشتوگێڵەیچە ئینسانی ئەویندار، خاوەن ویست و بە کەرامەتش گەرەگ بۍ. کەسایەتی شمە نمونێوە هەسارە ئاسا بێندۍ جە ئاسمانو وڵاتینە. بە دڵنیاییوە مشۆم بتەرسا، ۋەرو ئانەی شمە پاگیرتەرین ڕێوگارۍ بێندۍ.

هێرۆ جە باخچەو گوڵستانێنە گەشەش کەرد، گوڵستانە جە باوشیشەنە گوڵاڵەکا کەشەکا کورڎەسانی وەی کەرۍ. پەی هەر هاناوێوە ئی وڵاتیە، پەی گرڎ تولەرێوە ئی کەشا، پەی گرڎ ئاسمانێوە پەڕ هەسارەی، پەی گرڎ وەرم و خیاڵێوە ئازاڎیی، پەی گرڎ ئەوینێوە بێسنووری، پەی گرڎ ئەڎێوە کە جە کۆرپەکەیش دوور وزیانۆ، پەی هەر تاتێوە ئی وڵاتیە کە چێرو بارو ئێسک و پروسکو کوڕەکەیشەنە وڕۆ، پەی گرڎ ژەنێوە کە بە دروشمەو 'ژەنی، ژیۋای، ئازاڎیی' هاوار مکەرۆ، پەی گوڵستانۍ و هێرۆی باخچەو گوڵستانۍ قەسەم و پەیمانی بێگێڵایۆن. دیاری ڕۆشنایی و قەڵەم و راسی بێندۍ ۋەرو ئانەی:

ئیتر شمە حەقەتینێندۍ، چڼە قەوەت ئانڼەیچ ناسک

ئیتر شمە حەقەتینێندۍ، چڼە حەقەتینۍ ئانڼەیچ هیوا

ئیتر شمە حەقەتینێندۍ چڼە ناوازە، ئانڼەیچ دژوار و ئەستەم

ئیتر شمە حەقەتینێندۍ، چڼە ۋییەرڎە ئانڼەیچ ئاینڎە

ئیتر شمە حەقەتینێندۍ، چڼە هێرۆ ئانڼەیچ گوڵستانی..