ڕابەروو گەلوو کوردی ماوەو ٢٥ ساڵان ئینا چېروو گۆشەگیری سەختوو ئیمراڵینە، ماوەو زیاتەر جە ٣ ساڵایچا مەتاویۆ هیچ زانیاریێوە جە بارەشۆ دەسوزیۆ. بێدەنگبیەو ڕێکوزیاکاو مافوو مرۆڤی ۋەرا ۋەر بە گۆشەگیری ئیمراڵی، سەروو گردیشاوە کۆمیتەو ڕاگېرتەی جە ئەشکەنجەو ئەوروپای و کۆنسەو ئەوروپای هامبەشېنۍ جە تاوانەو گۆشەگیری ئیمراڵی. هەڵمەتەو 'ئازاڎیی پەی ئۆجالانی، چارەسەری سیاسی پەی پرسوو کورد'ی پایێش وستۍ قۆناغەی دووەمیۆ، هەڵمەتەکۍ دلۍ بەشە جیاوازەکا گلېرگەینە وەڵابیەنۆ.

یۆ چا کەسا سەروو ئاستی میان نەتەوەی پەشگیری هەڵمەتەکۍ مکەرۆ و دژ بە گۆشەگیری ئیمراڵین، ویستوو ئازاڎیی ڕابەروو گەلوو کوردیش هەن ، ڕاوێژکاروو سەرۆکی گرڎینەو پارتوو سەوزوو سویسرای و پەرلەمانتاروو سویسرای نیکۆلاس والدەرا. والدەر چن ڕووۍ چېوەڵتەر پەشگیری ۋێش پەی ئا سیاونوسەیە بەربڕی کە سەروو ئاژەو زینڎانیکەردەی عەبدوڵا ئۆجالانی پێشکەش بە ئەنجومەنوو فیدرڵی سویسرای کریابۍ. پەیوەس بە مژاروو گۆشەگیری ئیمراڵی و گرنگی ئازاڎیی عەبدوڵا ئۆجالانی پەی ئاژانسوو هەۋاڵوو فوراتی (ANF)ی قسېش کەردۍ.

'ئەشکەنجەو گۆشەگیری دژوو مافە میان نەتەوەییەکان'

پەلەمانتار نیکۆلاس والدەر ئاژەو دیلگېرتەی عەبدوڵا ئۆجالانی بە گۆشەگیریێوە سیاسی شبهنا و واتش: "ئامانج چی گۆشەگیرییە ئانەن کە نازا عەبدوڵا ئۆجالان ۋێش بەروزۆ و بە ۋیەردەو وەختی وزەو تاقەش جە بەین بشۆ. گۆشەگیری ڕێبازێوە ئەشکەنجەیا. گۆشەگیرکەردەی مرۆڤێوە بە شێوېوە ئاشکرا بریتییا جە ئەشکەنجەی. حەرپاسە گۆشەگیری ئانەی نیشانە مڎۆ کە حکومەتوو تورکی چېشش گەرەگ بۆ ئانە متاوۆ کەرۆش، بەبێ گۊشدای بە یاسایی میان نەتەوەیی. گۆشەگیری یاگۍ قبوڵکەردەی نیا. تورکیایچ پېسە وڵاتا تەری ئینا پەیماننامە میان نەتەوەیەکانە و وەعدوو ڕێزگرتەیش جە یاسا میان نەتەوەییەکانە دان. یاسایی میان نەتەوەیی گرڎ جۆرە ئەشکەنجېوەش قەڎەغەکەردەن."

'گەر کێشێوە نەبیۍ ئانە سی پی تی گوزارشتەو ۋێش وەڵاکەرێوە'

نیکۆلاس والدەر ڕەخنەش جە سی پی تی گێرت چونکی گوزارشتەو ۋێش دەربارەو ئیمراڵی وەڵانەکەردێنۆ و واتش: "سەرەنجام سی پی تی ناچار بۆ کە گوزارشتەو ۋێش وەڵا بکەرۆوە. گەر تا ئیساتۍ گوزارشتە وەڵانەبیێنۆ ئانە مەڵامەتوو کێشێوە ۋێش هەنش. گەر گوزارشتەکۍ ئیسفاڎەو حکومەتەکەو ئەردۆغانینە بیۍ ئانە زووتەر وەڵا کریێوە. کەواتە کێشێوە هەن. هیواڎارەنا ئا گوزارشتۍ وەڵا بکریۆوە و نیشانەش بڎۆ کە ئەشکەنجە ئینا ئارانە ئیمراڵینە، گێرتەی و گۆشەگیریکەردەی سیاسیا، ئاژەو گێرتەی ئۆجالانی یاگۍ قبوڵکەردەی نیا. وە داوا جە حکومەتوو تورکی کەرۆ کە ئی ئاژەو ئیمراڵی خاس بکەرۊوە."

'تەنها بە سەرکردېوە کە یاگۍ ڕێزی و ئیحترامی بۆ دلۍ گەلینە متاویۆ ئاشتی پێکبۍ'

پەرلەمانتار نیکۆلاس والدەر ڕابەر ئاپۊش جە چارەسەرکەردەی پرسوو کوردینە پېسە کارەکتەرێوە بنەڕەتی هۊرسەنگنا و واتش: "ئەگەر ئاشتی بەینوو گەلوو کوردی و تورکیاینە بۍ ئاراوە، ئانە مشۊم ئەرەنیشتەی چنی عەبدوڵا ئۆجالانی بکریۆ.

فرەو گەلوو کوردی پەشتگیریی جە بەڕێز ئۆجالانی مکەرا. تەنیا بە سەرکردێوە کە یاگۍ ڕێزوو گەلەکەیش بۆ متاویۆ ئاشتی پێكبۍ. پۊکاتی پەی خوڵقناو قۆناغەو ئاشتی، ئەرەنیشتەی چنی ئۆجالانی فرە گرنگا. ئەرەنیشتەی چنی ئۆجالانی ئینا ئیسفاڎەو گرڎ کەسێنە کە هەرێمەکەنە شۊنەو ئاشتیرە گێڵۆ. گەر ئارۊنە جەنگ ئینا ئارانە، مەڵامەتەکەش ئانەن ئینسانېوە پېسە ئۆجالانی کە تورکیا متاوۆ ئەرەنیشتەیش چنی بکەرۆ، ئینا زینڎانەنە."

'پێویسا سویسرا ئاگاڎیی بڎۆ بە تورکیای'

والدەر ئاماژەش پانەی کەرد کە سویسرا بە ئەرکوو ۋێش هۊربێزۆ پەی دمایی ئاردەی بە گۆشەگیری و چارەسەرکەردەی پرسوو کوردی و واتش: "شکۆو سویسرای ئینا بە ڕیزگېرتەی جە مافە میان نەتەوەییەکا و مافەکا مرۆڤیۆ. پۊکەی جە راو ئەرەنیشتەی، چەمپنەکۊتەی و بەقوەتکەردەی پەیوەندیی دولایەنەی، پێویسا سویسرا بە ۋەرپرسیاری ۋێش هۊربێزۆ، ۋەرپرسیاری ویروو تورکیای بارۊوە."

پەرلەمانتار نیکۆلانس واڵدەر ئەرەیاۋناش هەڵمەتەو 'ئازاڎیی پەی عەبدوڵا ئۆجالانی، چارەسەری سیاسی پەی پرسوو کوردی' فرە گرنگا و پێویسا پەشگیریش ۋنە بکریۆ.