فەرمانڎەو هێزەكاو سووریای دیموكراتی (قەسەدە) وەڵاش کەرڎۆ، هجوم و دەسدرێژییەكا توركیای پۍ سەروو ۋەرنیشتی بە قۆناغێوە مەترسیڎار مزان و داوا جە دەوڵەتوو توركی کەروو، سەرنجش سەروو كێشە دلېینەییەکا ۋېش بۆ و جە سنوورەكاو ۋېشەنە ئا كێشا چارەسەر کەرۆ.
مەزڵوم عەبدی فەرمانڎەو هێزەكاو سووریای دیموكراتی (قەسەدە) جە بارەو هجوم و ئەرەگیریەکا دەوڵەتوو توركی پۍ سەروو ۋەرنیشتوو كوردسانی، جە تۆڕەو كۆمەڵایەتی ئێكسینە ئەرەیاۋنېوەش وەڵا کەرڎۆ.
جە ئەرەیاۋناکەینە ئامان، هجوم و دەسدرێژییەكۍ دەوڵەتوو توركی پۍ سەروو ۋەرنیشتوو كوردسانی بە قۆناغێوە مەترسیڎار مزان و ئی ئاژە زەرەرۍ گۊرە بە خەڵكی مەدەنی میاونۆ و ئاماژەن پۍ پەرەسانای سیاسەتوو پاكتاوكەردەیۍ تازەی.
ئاماژەش پانەیچ کەرڎ، هجومەکۍ دەوڵەتوو توركی ئاستوو نیگەرانییەكاش زیاتەر کەرڎەن، پاسەش کەرڎەن مەترسییەكۍ سەروو سەقامگیریی مەنتیقەکەی زیاتەرۍ با، حەرپاسە داوا جە دەوڵەتوو توركی کەروو، سەرنجش سەروو كێشە دلېینەییەکا ۋېش بۆ و سنووروو ۋېشەنە چارەسەرشا کەرۆ.
جەختیچش کەردەنۆ، ئێمە پەشتی پا ڕێككەوتەیا بەسمۍ، كە چنی هامپەیمانیی میان دەوڵەتی هەنما، دڎانما وېمارە گرتەن پۍ ئانەی ئاژەکە خراپتەر نەبۆ و جەنگی گەورەتەر ڕووە نەڎۆ.
مەزڵوم عەبدی جە دمادمایینە داواش جە گلېرگەی میان دەوڵەتی کەرڎ، ڕا جە هجومەکا دەوڵەتوو توركی گېرا و ئارامی مەنتیقەکەی پارېزنا، ماچۆ: “بێدەنگیی گلېرگەی میان دەڵەتی و ڕێكوزیاکا مافوو مرۆڤی مایۍ نیگەرانییا”.
یاگۍ ئاماژەیا، ماوەو چن ڕوېوەن دەوڵەتوو ئەرەگیروو توركی بەچڕی هجومەکېش پۍ سەروو ۋەرنیشتوو كوردسانی دەس پنە کەرڎېنۍ و ناوەنڎە خزمەتگوزارییەكا و خەڵكی مەدەنی کەرۆ ئامانج، تەنیا ئامانجوو دەوڵەتوو توركی چی هجومانە وڕنای چېرخانوو ئابووری ۋەرنیشتوو كوردسانیا.
