هامسەرۆکو کۆنگرەو گەلی ڕەمزی کارتاڵ واتش، بە ویرۆکەکاو ڕابەرو گەلو کوردی عەبدوڵا ئۆجالانی قەیرانەکاو وەرکەوتو دلێڕاسەی چارەسەرێ مکریا، کارتاڵ داواو هەڵوێستی وەڵاتپارێزنییش کەردە و واتش: "شکس و وڕیایرەی حکومەتو تورکی بە ماناو ئازادیی کوردستانین."
ویس و دووەمین ئەرەنیشتەی ئەنجوومەنی گردینو کۆنگرەی نەتەوەیی کوردستانی شارو دەنهاگو هۆڵەنداینە بە ئامادەبییەی سەدان نوێنەرا ملۆ ڕاوە. ڕەمزی کارتاڵ، هامسەرۆکو کۆنگرەو گەلی وتارەکەشنە دلێ کۆبییەیۆکەینە، کە نوێنەراو پارت و ڕێکوزیا سیاسییەکاو کوردستانی دلێشنە قسێشا کەردێ واتش: "کۆبییەیۆکەی نەوەکە جە پرۆسێوی تارێخیینە مکریۆ، کە دلێشنە مەنتێقەکە و کوردستاننە ڕووەدایێ گرنگێ ئینێ ئارانە. ئی کۆبییەیۆ پەی کێشتەی سەرنجێن پەی سەرو ئی پڕۆسە تارێخییە، کە چوارپارچەو کوردستانینە مگوزەریۆ. چی پڕۆسە تاریخییەنە گەلو کوردی بە ڕۆح و وزێوی وەرەچەمۆ چوار بەشو کوردستانینە درێژە بە کۆشیای مدانێ.
'چارەسەری بە پارادایمو عەبدوڵا ئۆجالانی مێ ئاراوە'
هەرپاسە کارتاڵ وتارەکەشنە باسش جە قەیرانەکاو وەرکەوتو دلێڕاسەی کەرد و چارەسەرەکەش جە پارادایمو ڕابەرو گەلو کوردی عەبدوڵا ئۆجالانینە دی و واتش: "ڕابەرو گەلو کوردی عەبدوڵا ئۆجالان زیاتەر جە ٢٥ ساڵان ئیمرالیینە زیندانیی کریان. ماوەو ٣ ساڵی ویەردەینە هیچ زانیاریێوەما سەرو بارودۆخو بەڕێزیشا نەیاوان دەس. حکومەتو تورکی گردوو یاسایەکاو دلێ و یاسا میاندەوڵەتییەکێ پاشێلێ مکەرۆ. بە گۆشەگیریی ڕەهاو سەرو ڕابەر ئاپۆی جەنگ دژو گەلو کوردی بەردەواما. حەر پا سەبەبەیچە گۆشەگیریی ڕەها سەرو ڕابەر ئاپۆیرە مسەپنۆ. دەوڵەتو تورکی نەتاوانش چی ڕێبازا ئەنجام بگێرۆنە و بەرەو شکس ملۆ. کۆبییەیۆکەیما چی چوارچوەنە بە قسەوباسەکا درێژەش هەن. پێویسا گردو جیهانی بزانۆ کە گەلو کوردی گرد لایێوە یەکدەنگا. کۆشیای "ئازادیی پەی بۆ عەبدوڵا ئۆجالانی و چارەسەری سیاسی پەی پەرسەو کوردی" گردو جیهانینە کریا. ئی پەرسێ وزیێنە پەرسەو ڕۆیۆ هەرمانەو ڕای گردینو جیهانی بەتایبەت چەنی ئا کۆشیایە کە ماوەو ٦ مانگی ویەردەینە کریان. پی هەرمانێ گەلو کوردی داوا و کۆشیای وێش وەرفراوان کەردەن. ناڕەزایەتییەکێ وەراوەرو پیلانگێڵنیی دژ بە ڕابەرو گەلو کوردی، عەبدوڵڵا ئۆجالانی ئێساڵ جە چوار پارچەو کوردستانی و جیهاننە وەروەڵێ و قەوەتێ بێنێ و گرد یاگێونە خاوەندارییشا وەنە کریا.
'دەوڵەتی تورک لە بەرامبەر گەریلا شکستی هێنا'
کارتال لە درێژەنە واتش: "ئیرادەو سەرەوردای گەلو کوردی پەی کۆشیای پاسەش کەردەن کە فاشیزمو ئاکەپە-مەهەپەی، ڕووبەڕوو شکسی بۆوە، و درێژەو قسەکاشنە واتش، ئی شەپۆلە فاشیستیێ شکسێوی گەورەش ئارد، بەتایبەت چەمکو جەنگینە شکسش ئارد. ئی حکومەتە بە بەکارئاردەی هەمەلایەنەو گردو ئیمکاناتەکا گەرەکش بێ جەنگنە ئەنجام بەدەس بارۆ. بەڵام چی جەنگنە دژو گەلی و گەریلای نەتاواش ئەنجامش بۆ. شۆنەو ئانەیۆ بێ کە دماو ورچنیەیەکا ئامادەکاری پەی جەنگێوی گەورەی بکەرۆ. ئەگەر دەسەڵات و متمانێش بیێ، تا ئیساتێ ئی جەنگە دەسش پەنە کەردەبێ. پەوکای گەرەکشا پەشتگیریی کۆ بکەرۆوە. سەرێ عێراقی و وەڵاتە عەرەبییا و وەڵاتاو ئەورووپای و ئەمریکایش دا و داواو پەشتیوانی مکەرۆ. ئانەیچ بەڵگەن سەرو ئانەیە متمانێش بە سەرکەوتەی جەنگنە نەمەنەن، دەوڵەتو تورکی نمەتاوۆنێ دژو گەریلاکاو ئازادیی سەرکەوتە بۆ."
ڕەمزی کارتاڵ ئاماژەش بە شکسو پارتو دادی و گەشەپنەدای دا ورچنیەیە وێمانەکانە و واتش: "شکس و وڕیای حکومەتو تورکی بە ماناو ئازادی و دیموکراسیین پەی چوار پارچەو کوردستانی. پەی ئی مەبەسیچە پێویسا نەک تەنیا پێسەو حزبی، بەڵکوم پێسەو گەلی و گردو سیاسەتمەدارا و لایەنەکا هەڵوێستو وێما ڕۆشن بکەرمێوە. پێویسا گردو جمیەرو و لایەنە سیاسییەکاما هەڵوێستی نەتەوەیی نیشانە بدانێ."
