هرووژمەکێ ئیسرائیلی و ئێرانی پەی سەرو یەکتری نۆ ڕوێن بەردەواما. ئاژانسو هەواڵو فارسی وەڵاش کەردۆ کە ئیسرائیل جە ئیسفەهانەنە بنکێوە ئەتۆمیش کەردەن ئامانج. بە پاو ئەرەیاوناکەی، هیچ زەرەرێ بە مییانو ئەتۆمیەکەی نەیاوان.

بە پاو ئەرەیاوناکە و وەزارەتو وەرگری ئیسرائیلی، جە وەرنیشتوو دلێڕاسە و ئێرانینە چێرخانە سەروازییەکێ کریێنێ ئامانج و ئێران شەوانە مووشەکی بالستیکی ئاراسە و تەلئەبیبیش کەردەن. شارەکا حەیفا و بەرشاڤاش ڕووبەڕوو هرووژمەکا بیێنێ. بەپاو میدیاکا ئیسرائیلی، ئێران ٢٥ مووشەکێش ئاراستە کەردێنێ. چا ژمارە، ٦ مووشەکێ وەر و تەلئەبیبی، حەیفا و بەرشاڤای کەوتێنێ.

فەرماندێوە باڵاو ئێرانی کوشیا

سوپاو ئیسرائیلی ئەرەیاوناش کە ئەمینپور جودەکی فەرماندەی دووەمو مییانو فڕۆکەو بێفڕۆکەوانو هێزو ئاسمانی ئێرانی، کوشیا.

هەرپاسە جە ئەرەیاوناکەینە ئامان کە مییانو ئاراستەکەردە و مووشەکی جە وەرنیشتوو وڵاتی و سەکۆە مووشەکییەکێ کریێنێ ئامانج. ئاماژە پانەیش کریان کە یاگێ کۆگاو مووشەکەکا جە مییانو ئێرانی بە فڕۆکە جەنگییەکا کریێنێ ئامانج.

ئیسرائیل بینێوەش جە قوم کەردەن ئامانج                   

تەلەفزیۆنو دۆڵەتو ئێرانی وەڵاش کەردۆ کە هرووژمی تیرۆریستیانە کریان سەر و بینێوە جە شارو قومی جە پانیشتوو تارانی. بەپاو ئەرەیاونا و هەرێمی جوانێ تەمەن ١٦ساڵ جە هرووژمەکەنە کوشیان.

ترامپ: دووێ هەفتێ مۆڵەت بە ئێرانی مرۆنە

دۆناڵد ترەمپ سەرۆکو ئەمەریکای بەردەواما جە هەڵوێستە بێ قەرارەکاش سەبارەت بە جەنگەکەی. ترەمپ جە لێدوانێ تازەنە واتش: "ڕەنگە پەنەواز بە دەسوەردای نەکەرۆ." ترەمپ ئەرەیاوناش مدرنا و ئیسرائیلی قورسا و واتش: "ئیسرائیل جە ماوەو نۆ ڕوانە سەرکەوتنی فرەش بەدەسئاردەن." ترەمپ ئاماژەش پانەی دا دووێ هەفتێ تەر مۆڵەتش بە ئێرانی دانو و واتش: "ئی دووە هەفتە وەسێنێ پەی ئانەی ئێرانییەکێ بلاوە وێشارە. با وینمێ ئارێ چێش مکەرا."