سەرۆکی شارەوانی گەورەشاری ئیستەنبوڵ ئەکرەم ئیمام‌ئۆغلو لە زیندانی مەڕمەڕە، دەربارەی سەردانی ١٩ی حوزەیرانی دەم پارتی ڕاگەیاندراوێکی نووسراوی بڵاوکردەوە.

ئەکرەم ئیمام‌ئۆغلو ڕایگەیاند سەردانی هاوسەرۆکانی دەم پارتی تولای حاتەم ئۆغۆللاری و تونجەر باقرخان گرنگ و بەهادار بووە، لەبارەی پرۆسەی چارەسەری پرسی کورد و هەنگاوە پێویستەکانی ئاشتی و بڕیارەکانی کۆنگرەی پەکەکە و چەندین بابەتی تر وتوێژیان کردووە.

ئەکرەم ئیمام‌ئۆغلو، گوتی: "بەبڕوای من، بۆ چارەسەری دیموکراتیکی پرسی کورد، دەبێت هەنگاوی بەپەلە بنرێت و کۆمیسیۆن لە پەرلەمان پێکبهێنرێت.

لەگەڵ هەموو هاوڵاتیانی تورک و کورد بە خوشک_برایەتی و پشتیوانی، ڕابردوو لەدوای خۆمان جێدەهێڵین و داهاتووییەکی هاوبەش بنیات دەنێین. بەم بۆنەیەوە، سوپاسی هاوسەرۆکانی دەم پارتی دەکەم کە سەردانیان کردم و بۆچوونە گرنگەکانی خۆیان لەگەڵمدا هاوبەش کرد".