بنەیانەو گەشمەردەتۆڵهڵدانێ ئەرەیاوناشا دژو خیانەتەکاو پەدەکەی، هجوومەکاو دەوڵەتوو تورکی خاوەنداریی جە گەریلای مکەرا. بنەیانەو گەشمەردەتۆڵهڵدانێ سەرەڕاو ناڕەزایەتییەکاشا، ١١١ ڕوێن نەتاواناشا جەنازەو ڕۆڵەکێشا وربگێراوە، ئەرەمیاوناش کە پەدەکە خیانەتش کەردەن
سوپای ئەرەگیرەو تورکی بە پەشتیوانیی پەدەکەی درێژە بە هجوومەکاش پەی سەروو هەرێمەکاو پارێزنای میدیای وەنەو پانیشتوو کوردسانی مدۆ. بنەیانەو گەشمەرداو وەرنیشتی ئەوەڵ ڕۆو هجوومەکاوە هجوومێ و خیانەتوو دەوڵەتوو تورکی و پەدەکەی ڕەت مکەراوە و هاموەخت ئەرەمیاوناش ئادێ ئینێ بەرەو گەریلاکاو ئازادیینە.
بەرواروو ٢٨-٢٩و ئابوو ٢٠٢١، گرووپێوی گەریلای، کە ٧ کەسێ بێنێ خلیفانەنە بەحروو زاپینە پەدەکەی هجووم کەردێ سەر و ٥ گەریلێ گەشمەردێ بیێ. یۆ چا گەشمەردا گەریلا تۆڵهڵدان ڕامانە بێ. ئەدا عایشان تەمیرە و ئەڤین تەمیرە واڵێ گەشمەردە تۆڵهڵدانێ، کە هەڵای نمەزانا جەنازەکەش چکۆن باسوو هجوومەکاو دەوڵەتوو تورکی و خیانەتوو پەدەکەیشا کەرد و پەشتیوانیی وێشا پەی گەریلاکاو ئازادیی کوردسانی بەروست.
"ئێمە پاڵوو گەریلایەکامانە مدرێنمێ"
ئەدا عایشانە ناڕەزایی وێش سەروو هجوومەکاو سوپاو تورکی پەی سەروو هەرێمەکاو پارێزنای میدیای بەروست و واتش:" دەوڵەتوو تورکی هجووم مکەرۆ سەروو گەریلای و پێسەو ئانەیەنە هجووم بکەرۆ سەروو وەرنیشتی". وەرنیشتەنە تا ئیساتێ لاو کەمیوە ١٢ هەزار کەسێ گەلەکەیما گەشمەردێ بیێنێ. با ئیتر دڵوو ئەدایا نەسۆچنمێ و دمایی بە هجووماکاشا بارمێ. لاێوە هجووم مکەرۆ سەروو گەلی و لاێوە تەرۆ هجووم مکەرۆ سەروو گەریلای کەشەکاو کوردسانینە، گەریلا رۆڵێ ئێمەنێ. ئا دەسێ بمەڕیا کە هجوومێ مکەرا سەروو گەریلای. دەوڵەتوو تورکی گەرەکش نییەن گەلوو کوردی پارچە خاکێوەش بۆ، ئانە تەواناشنە بۆ مکەرۆش تا وەڵاتێوە ئازادەنە بەئارامی نەژیومێ، ئی دەوڵەتە مەنەیوە وێش دلێنەبەردەی گەریلاینە موینۆوە، وەلێ ئەگەر خەیاڵس بۆ دمایی بە گەریلای بارۆ ئینا غەڵەتیوی گەورەنە."
"با پەدەکە جەنازەو توڵهڵدانەو من بدۆوە"
ئەدا عایشانە پەی ورگێرتەیوە جەنازەو تۆڵهڵدان ڕامانێ کە پەدەکەی گەشمەردێ کەردە و جەنازەکەش ئینا دەسوو ئادیشانە، بەشداریی چالاکیی ١١١ ڕوەو دەروازەی سنووری سێماڵکا بییە. ئەدا عایشانە داواو جەنازەو کناچەکێش کەرد و درێژەو قسەکاشەنە واتش:" تۆڵهڵدانەی کناچێم بۆسەو پەدەکەینە گەشمەردێ بییە، پەدەکە یاردەی دەوڵەتوو تورکی مدۆ، ئەوەڵ بۆسەش پەی نیێرە و دمایی ڕاش دا بە بوردومانکەردەی دەوڵەتوو تورکی، دمایی وێش نامێ منیۆ کەرد، وەلێ دەسشا لوان ونەو کناچەکێم. دەوڵەتوو تورکی و پەدەکە یۆنێ. تۆڵهڵدانەو من دامو ئانەیە ڕابەر گیریا، قەرارشدا بەشدارەو دلێ گەریلای بۆ، پەی وەرگێریی دۆزوو گەلوو کوردی بکۆشیۆ، خاسا پەدەکە چی یاردەی دەوڵەتوو تورکی مدۆ؟ پارتی پی هەرماناشە خەتەو خیانەتی قووڵتەرە مکەرۆوە.."
هەرپاسە واڵێ گەشمەردە تۆڵهڵدانێ، ئەڤین تەمیرە ماچۆ، تەنانەت وەڵێ دەسپەنەکەردەی کۆشیای ئازادیوازوو گەلوو کوردی، دەوڵەتوو تورکی هجوومو جینۆسایدیش دژوو گەلوو کوردی کەردەن و واتش:" پەی بەدیئاردەی وەرمەکاو عوسمانیی، کۆشیای ئازادیی کوردی پێسەو هەڕەشا سەرو وێش موینۆ، پەکەکە نوێنەر، سەرمەشق و بنیاتنیەروو دۆزی ڕەواو گەلوو کوردین. وەلێ بەداخۆ پارتی دیموکراتوو کوردسانی، هامکاروو دەوڵەتوو تورکین، ئەگەر بەڕاسی پارتی کوردا هەقش چێشا سەروو دەوڵەتوو تورکیوە؟ واڵەکێم پەدەکەی گەشمەردێ کەردە، کە بەڕاسی شەرمەزاریێوە گەورەن، ئەگەر وێش بە کورد مزانۆ، متاوۆ بە دایۆپەنەو جەنازەو تۆڵهڵدانێ و هامڕایەکاش سەرەتاێوی تازە دەس پەنە بکەرۆ."
