نوێنەرو نەتەوەیۆگێرتەکا پەی هەرمانوکارو سوریای گیێر پێدرسۆن باسش چانەی کەرڎ، کە رووەدایەکۍ حەڵەبی ئارامی و ئاشتی هەرێمی و مېیاننەتەوەیشا وستەن چێرو تەرسۍ و واتش، "ئانەی رووە مڎۆ ئەنجامو سەرنەکۊتەی هامپەیمانی مېیاننەتەوەییا. سوریا تەرسەو هۆرشێونایشۆ سەرا".
سەبارەت بە رووەدایەکا حەڵەبی و ناوچە جیاجیاکا سوریای گیێر پێدرسۆن، نوێنەرو نەتەوەیۆگێرتەکا پەی هەرمانوکارو ئا وڵاتیە واتش: "لوای وەڵۆیەکۍ دەسەو تەحریر شامی کە جە لایەنو ئەنجومەنو ئاسایشی مېیاننەتەوەییوە پېسە تیرۆریستی ئشناسیێنۍ و بە وەڵێکۆتەیەکا گروپە 'وەرهەڵسکارە' چەکڎارەکا، جە هێڵۊو بەرەکانە فاڕیای دراماتیک رووەشدا. جە وڵاتێوەنە کە ١٤ ساڵێن جەنگش ئینا چنە، ئا رووەدایۍ تەرسی گۆرێنۍ پەی سەرو مەدەنیەکا و جە روو ئەمنی و ئاشتی مېیاننەتەوەیی و هەرێمایەتیوە کارەساتی گۆرە شۊنەو ۋێشەرە مارۆ".
ئەنجام ناسەرکۊتەیی هامپەیمانی مېیاننەتەوەییا
نوێنەرو تایبەتی نەتەوەیۆگێرتەکا پەی هەرمانوکارو سوریای داواش کەردە گرڎ لایۍ بە پاو بنەماکاو پارێزنای مەدەنییەکا و چێرخانی مەدەنی جماوە و ۋەرپرسیارانە هەنگامە بنیا و ئەرەیاۋنایچش، ئانەی ئارۆ جە سوریانە ڕووە مڎۆ، نیشانۍ سەرنەکۊتەی هامپەیمانی مېیاننەتەوەیینە، هەرپاسە ئەوەمەڼنەو جا بەجێنەکەردەی قەرارو ٢٢٥٤و ئەنجومەنو ئاسایشو نەتەوە".
سوریا تەرسەو وڕای و هۆرشێونایشۆ سەرا
پەنەوازا لایەنە سورییەکۍ و هامکارە مېیاننەتەوەییە دیارەکێشا، پەی ئێستەیۆ دەرچەو بەرشیەی جە جەنگی بە شێوێوە ۋەرچەم بەشداری ئەرەنیشتەی ماناڎاری و بنچینەیی بانۍ. تا ئانە نەکریۆ سوریا تەرسەو پارچەبیەی و هۆرشێونایۆیش سەر مەبۆ. چا چوارچێوەنە پەی ڕاگێرتەی جە متەو ۋنۍ، داوا جە گرڎو لایەنە سوورییەکا و هامبەشە مېیاننەتەوەییەکاشا مکەرمۍ هەرمانە پەی جابەجێکەردەی قەرارو ٢٢٥٤و ئەنجومەنو ئاسایشی بکەرا و سەرنجشا ەرو چارەسەرە سیاسییەکاوە بۆ".
