هێمایێوە جە قارەمانییەتی، پێلانێوە پەی دماڕۆی و پێناسێوە پەی ڕۆی تازەی، نەورۆز ڕۆو سەركەوتەی و پیرۆزی، ڕۆو زەماوندێ و ورپڕای، ڕۆو عەشقی و سەرەبەرزین. فەرهەنگ و تارێخو هەر گەل و نەتەوێوەنە ڕوێوە  پێسە سیمبۆلو سەركەوتەی و سەرفرازی هەن. هەر ساڵێ چا ڕوەنە ئا گەل و نەتەوێ بە شێوێوە جەماوەرییانە ئا ڕۆیە بە مەراسیم و چالاكیی جۆراوجۆر، بەرزی و شكۆدارییوە بەرز مرمانا. نەورۆز ڕۆو تازەیی، ڕۆو تازەکەردەیۆ پەیمانێ، سۆزی و هەستین. ڕۆو سەرەوردای و نەوبییەیۆ و بونیادنیاین، ڕۆو هەقێ و ورچەرخیای و ئەرەپڕاین، نەورۆز، ڕۆو وەرگێری و پاتەیرەی بژار و بنەبڕكەردەی تۆمو گیواو هەرێز و ئینسانی زۆردار،ئەرەگیر، دژە چاندی و دژە حەقیقەتو گلێرگەین. نەورۆز، ڕۆو ژەنێن، ڕۆو ئەدا خوداوەندێ ستێرك وهۆمبابایە، ڕۆو ژیوایۆ و چەكەرەکەردەی و گەشەی و باڵاكەردەین. ڕۆو هومێدی و یاوای ئاواتەكان. نەورۆز، ڕۆوواوەی پەلوپۆكەردەین و  سەرمەشقی ونوێنەرایەتیکەردەی ‌هەقین و مردایۆین ڕووەو ناحەقیرە. نەورۆز، ڕۆو ئامادەیی و گۆرجوگۆڵی و وێشەتەكداین و شێرانەلواین ڕووەو مەیدانو جەنگی. نەورۆز ڕۆو جاڕدای و ڕۆو نەفیرو عامی و وردای بەیداخێ سەوزێ و زەردێ و سوورێن.

نەورۆز ڕۆو هامپەیمانی بەستەی ئازادیوازا و ئەوینداراو ئاشتیین،  ڕۆو تاویایۆ و شێوەداین بە ژیوای تازەی و گیسناینەی ئایری و ڕۆشنایین. نەورۆز ڕۆو گێرتەیرەی و وستەیرەی زاڵمان سەرو ئەریكەو هێز و دەسەڵاتی. نەورۆز پێناسەو ئیرادەی و ورچەرخیاێوە تازەین. ڕۆو ئیرادەی، ئیرادەو ئازادی و پەیامین. ڕۆو مردایۆ و خرۆشیاین. پەیامو وێئشناسای و داناسینن. پەیامو ڕۆشنایی ڕۆی و دماییپەنەئاردەی تارێخێوەن جە چێردەسەبییەی و دەستەمۆكریای. نەورۆزهامچەشنە سێڵاوی و لافاوین، هەرچی خراپەن ماڵۆش، مزانیی ئامای وەهاری و سەوزایی و زیندەبییەیۆ و ژیواین.

نەورۆز دەنگو هاوارو مەزڵووما و گەلێوە تەژنەو ئازادی و سەربەسیین. نەورۆز دەنگو سۆزو ئەدێن، کە  پەڕوو گڵوێش قێڕنۆ. ڕۆو مدرامانو گەریلاین، نەورۆز ڕۆو زۆرانبازیی کەسی باڵاین چەنی تاریكی و چل جەردەی ونوەرینە. نەورۆز ڕۆو ژیوایۆ و پەیدابییەیۆن بە تیشكەو ڕۆشنایی ڕۆجیار و فەلسەفەو ئازادیی ئەهوورایی ڕابەر ئۆجەلانین. ڕۆو مانێ و بییەی و هەستین. ڕۆو ویژدانی ئازادی و ماڕای لمۆزەو نەیاراو ئەرەگیركەری و گێرتەیباوشەو ئەشقی و وەشەسیای گەلی  پەی بۆ خاكی، ئاوێ، پەی هەوای. نەورۆز ڕۆو هەڵمەتبەریی وەڵاتپارێزنین بە هەستی نیشتمانپارێزنی و بەروستەی گەلو كوردین پەی ئەدا نیشتیمانێ. ڕۆو بەرکەوتەی پلوورەوارانێ و وەرەشێڵەی و كازیوە و سەرسەعبوو كوردستانین. نەورۆز، ڕوێوە تازەن، تارێخێوە تازە و ژیواێوە تازەن بە ویرۆکەردەی تازە.  نەورۆز، فەلسەفەو زەردەشتی و كاوەی هامچەرخی، مەزڵووم دۆغانین.

نەورۆز، ڕۆو زیندەبییەیۆین، زیندەبییەیۆ ڕۆحی و پردەو كناچان لۆرستاننە و هەیبەتو کەشو داودی و هیبەت سۆڵتانین. نەورۆز ژیوای تازە و دماییئاردەی نەهامەتییەكان. نەورۆز پارێزگاریكەردەین جە یاگێ ژیوایوە ئینسانی کەشوو جودیین. نەورۆز، ڕۆو دونزە سوارەو مەریوانی و تاقەوسانو بێستۆنی و ئاناهیتاو كرماشانی و فەخرەقاو مەهابادین. ڕۆو ئەرەبییەی بەحرو كەسرای و زای گۆلەو ورمێن. نەورۆز، وەهارو ئازادیی گەلو كوردی و نەمەنەی ئەرەگیركەران. هۆنیێکێ پیرەمێردی نەمری و دەنگە بەسۆزەكەو زیرەكین. نەورۆز، ڕۆو سەركەوتەی شۆڕشو ژەنی، ژیوای، ئازادیین. نەورۆزو ئێساڵی، نەورۆزو ڕابەر ئاپۆین. نەورۆز ئاوێزانبییەی و گڕوەرداین جە نەفرەتێ و دووەبەرەیی و چنددەسەیی و پەرتەوازەیین. نەورۆز، ڕۆو یۆگێرتەی گەلان. ڕۆو ئاشتبییەیۆ ئینسانی و سروشتین. ڕۆو بۆنیادنیای و ئاوەدانی و سازیاین.

بەیدێ با پێوە نەورۆزو ئێساڵیما(2724) بە ڕۆحو كۆشیای هامچەرخی، تینەو ئایرو جەسەو مەزڵوما و كاوەكاو هامدەمین، ناخمانە  ئایرێوە گیسنمێنە و ڕووە بکەرمێ لووتەو کەشەکاو كوردستانی و هامشانو گەریلاكاو ئازادی بە ڕۆحو سەركەوتەی، نەورۆزما مەبارەک بکەرمێ.  

فرێنێ ئا کەسێ هەوڵێ مدا مەبارەکباییەکاما بشێونا،. یۆ چانیشا شێونای و بەلاڕارەبەردەی و تەموستەین سەروو هەقیقەتو نەورۆزی. بڕێ كەسێ و ناوەندێ و هێزێ هەوڵێ مدا، نەورۆزەكەما تەنیا پێسەو ڕوێ  وەهاری و تاویایۆ وەروێ و ڕچەو زمسانی و ماڕای سەردای و گەرمبییەی زەمینی و چرۆكەردەی دار و ئامای وەرزێوە ساڵێ نیشانە بدا و پاسە تەماشەو ئی دەسكەوتە تاریخییە کەرانێ و گەرەکشانە نەورۆزی جە دلێنەی هەقەتینیش كە پەیامێوە سیاسی، ڕێكوازیایی، هزری و ئایدئۆلۆژی و پارێزناین ماڵارە.

بڕێ كەسایەتێ و لایەنێ تەرێچ بە چەمێوە نەتەوەپەرسییوە نەورۆزی وینا و گەرەکشانە بە لۆژیكو نەتەوەگەرایی سەرمایەداری مانا بدا پی سیمبۆلی و چاندە هەزاران ساڵەو گەلی. جە حاڵێوەنە نەورۆز پەیامەكەش، پەیامو یۆگێرتەی گەلا و مەزڵووما و ئا چینە ئازادیوازانە بە درێژایی تاریخی تەژنێ سەربەسی و ئازادیینێ. ئی گرووپەیچە هامشێوەو گرووپی یوەمینی؛ پەیامی ئاشتیوازانە و پێوەژیوای گەلا لاوە منیا و بۆنەو لۆژیك و ئەقڵیەتو سەردەسی و دەسەڵاتدارییوە نەورۆزی موینا.  

نەورۆز؛ چاندا. چاندو ئا گەلینە چێردەسەیی و ملكەچبییەی پەسەند نمەکەرۆ. نەورۆز تارێخا. كەس نمەتاوۆ لاڕارە بەرۆش. نەورۆز ژیواین. ژیوای هیچ وەخت، دروێ و دووەڕوویی و زۆرداری هەزم نمەکەرۆ. نەورۆز بەشێوەن جە تارێخی و چاندی و ژیوای گەلو كوردی. ئەگەر دەوڵەتە ئەرەگیرەکاو سەرو كوردستانی گرەکشانە بە گرد ڕا و ڕابازێوە، ئا ڕووە مەبارەکەیە كە پێسەو  نرخ و بەها و دەسكەوتێوە کۆنو گەلو كوردی قەدەغە بكەرا و هزر و زیهنشنە بسڕاشۆ، بۆنەو گرنگی و بەنرخیی ئا ڕوەیۆ و مانێکێشۆ. مشۆم ئانەیچما فکر نەشۆ، ئینسان وەختێ باسو حەقیقەتی و ڕاسیێوی مکەرۆ، بە ماناو دژایەتیکەردەی وەراوەرەکەیش نییا. چونكوم نەورۆز گەوهەرو وێشنە پەیامو پێوەیی و یۆگێرتەی گەلان. پەوکای نەورۆز، ڕۆو هامدەنگی و هامئاوازی و هامپەشتی و یۆگێرتەی گەلان دژوو  زوحاكە هامچەرخا و گڕەوەرەداین جە تاریكی.