ڕابەر ئاپۆ کە مېیانو گفتوگۆ و دیالۆگو چارەسەری پرسو کوردیا و جە مانگەو نۊۋەمبەری ۋېیەردەینە جارێوەتەر موخاتەب بیەیش جە لایەنو دەسەڵاتدارا دۊڵەتو تورکیوە قبوڵکریا، هەڵای ئینا گۆشەگیرینە. لایەنو دەسەڵاتی گفتوگۆکا سەرو پرۆسەکەی جە پرسەکا چەکنیایرەی و 'تیرۆر'ی باس مکەرۆ. ڕای گرڎینەو تورکیای ئینا چەمەڕایی پەیامەکاو ئیمڕاڵینە. جە ئاژێوە پی جۊرەنە ڕۆنامەوانە نەزاهەت دۆغانە و دیجلە موفتوئۆغلۆوە، ڕۆنامەوان دیرەن یورتسەڤەر پەی ئانەی جە نزیکۆ چنی ڕابەر ئاپۆی دیدار ئەنجام بڎا سەرشا ۋنەو وەزارەتو دادی دا. نەزاهەت دۆغانە سەرو داواکارییەکەی پەی ئاژانسوو هەواڵوو فوراتی (ANF)ی قسێش کەرڎۍ.

نەزاهەت دۆغانە سەرنجش وست سەرو گفتوگۆیەکا پرۆسەکەی کە جە مانگۊو نۊۋەمبەریوە پەی جوابدایۆ ئا پرسیارۍ 'ئایا چێش ڕووە مڎۆ' جە مەغزو گرڎ کەسێنە وەشە بیێنە، گەرەکشا بۍ چەمپنەکۊتەی چنی موخاتەبی بنەڕەتی پرسەکەی ڕابەر ئاپۆی بکەرا، هەرپۊکەی سەردای وەزارەتو دادیشا کەرڎ. ماچۆ: "بە پاو قسۍ دۊڵەت باخچەلی عەبدوڵا ئۆجالان جە پەرلەمانەنە پېسە موخاتبی قبووڵکریا" و ئاماژەش پانەی دا کە ئی ئاژە جە چارەسەری پرسو ١٠٠ ساڵەو کوردینە متاوۆ بۊنە با مېیانێوە گرنگ.

'نزیک بیەیۆ دەسەڵاتدارا ئەرێنی بۍ'

سەبارەت بە سەردای وەزارەتو دادی نەزاهەت دۆغانە واتش: "لوایمۍ وەزارەت و واتما 'پېسە ڕۆنامەوانۍ داواو سەر ۋنەدای پەی ئیمراڵی مکەرمۍ'. پنەشا واتیمۍ 'چنی عەبدوڵا ئۆجالانی چەمپنەکۊتەی مکەردۍ؟'، واتما 'بەڵێ'. هەرپاسە پنەشا واتیمۍ پەی ئانەی پڕۆسەکەی بە خێرای جابەجێ بکەرمۍ چێش بکەرمۍ. ئی نزیکایەتییە ئەرێنییە شۆکێش کەردیمۍ".

داواکاریۍ فرۍ کریێنۍ پەی لوای ئیمراڵی

نەزاهەت دۆغان ئاماژەش پانەی کەرڎ کە بە پاو چەمڎاریەکاشا، چڼین کەسۍ تەرۍ پەی لوای پەی ئیمراڵی داواکاریشا پێشکەش کەردەن و واتش: "جە پڕۆسەو چارەسەری ساڵەکا ٢٠١٣-٢٠١٥ینە پەشتگیری گلېرگەی سەڎەن ٦٠٪ بیەن، بەڵام ئەنجوومەن بەکارناما، لایەنو ڕێکوستەی گلېرگەی مەدەنیش چنە نەبۍ. هەرپاسە مەهەپە و جەهەپە چی پڕۆسەنە ئەرکدارۍ با. جە پرۆسەی تازەنە جە داواکارییەکاوە مېیاومێنە کە زەمینەو چەمپنەکۊتەی بەدیئامان".

نەزاهەت دۆغانە ئاماژەش پانەی کەرڎ کە ئەر زەمینە بۆنە چڼین ڕۆنامەوانۍ گەرەکشانە بلا ئیمراڵی و چەمپنەکۊتەی بکەرا.