زیندانییێ سیاسیێ زیندانو ژەناو شاکرانو ئەزمیرینە بە داواو ئازادیی جەسەیی ڕابەرو گەلو کوردی عەبدوڵا ئۆجالان، بایکۆتو دادگای مکەرا، دیداری تەلەفۆنی و کەسوکار نمەکەرانێ، دەربارەو ئا زیندانییا چالاکی مکەرا، وەنەپەرسایوە دەسش پەنە کەردەن و سزاو گۆشەی تاکەکەسییشا سەرەرە سەپیێنە.

پارتە سیاسی و ڕێکوزیا یاسایی و مەدەنییەکاو شارەکەی دژو پاشێلکاریی مافەکا زیندانەکانە و سیاسەتو گۆشەگیری وەردەمو کامپو زیندانو عەلیاگاو ئەزمیرینە ئەرەیاونایشا وەناوە، درووشم و پانکارتێشا دژو گۆشەگیری و پاشێلکارییەکا بەرزێ کەردێوە.

دلێشانە ئاماژە کریان،  ٢٧ و تشرینو دووەمو ٢٠٢٣ ێـوە بە داواو "ئازادیی پەی عەبدوڵا ئۆجالانی، چارەسەری سیاسی پەی پەرسەو کوردی" مانگێرتەی جە واردەی زیندانییا دەسش پەنە کەردەن، ٤ و نیسانیوە زیندانیێ واتشا چالاکییەکەیشا مفاڕانێ پەی بایکۆتو دادگای و تەلەفۆنی و دیدارو بنەیانەکا.

ئینجا جەختکریاوە سەرەڕاو گردو فشارەکا زیندانیێ درێژە بە چالاکییەکەیشا مدانێ و ماچۆ: "ئانێ گەرەکشانە چالاکیی ژەنا زیندانو  ژەناو شاکرانینە ئاستەنگ بکەرا، بە سزاو دیسپلینی و گۆشەی تاکەکەسی هامڕایەکاشا گۆشەگیر مکەرا.  گردو سەپنایە فاشیستییەکا زیندانو ژەناو شاکراینە، پەی ماڕای کۆشیای و چەوسیایۆ ژەنان".

داوا کریان سزاو سەرو زیندانییەکا دەمودەس وربگێریۆ و ماچۆ: "دەمودەس گۆشەگیری ئیمراڵی وربگێردێ و پەرسەو کوردی بە ڕای دیموکراتیکە چارەسەر بکەردێ، داواو زیندانییە سیاسییا، داواو ملوێنا کەسان".