فیدراسیۆنو جەمە کوردییەکا نەمسانە (فەیکۆم) سەبارەت بە هۆرچنیەو ئەنجومەنو نەتەوەیی نەمسای کە ٢٩و ئەیلولی ئەنجام مڎریۆ، جەمۍ پرسیاڕێش ئاراسەو پارتەکا ئا وڵاتیە کەرڎۍ.

بەشێ جە پرسیارەکا فەیکۆمی جە پارتەکا پێوەسۍ بێنۍ بە ئازاڎی رابەرو گەلوو کوردی عەبدوڵا ئۆجالانی، هرووژمەکا سەرو شناسنامەو کوردی و یاساو پەنابەری.

پارتو سۆسیال دیموکراتی نەمسای (SPO)، پارتو سەوزو نەمسای، رەوتو لیبراڵی و نەمسای تازەی (NEOS)، پارتو کۆمۆنیستی نەمسای (KPO) و پارتو چەپی (LINKS) جوابو پرسیارەکاشا دێوە. پارتو گەلوو نەمسای (OVP) کە پارتێوە پارێزگاران و پارتو ئازادی نەمسای (FPO) جوابو پرسیارەکاشا نەڎێوە.

جە جوابەکانە ئەرەیاۋییا کە گۆشەگیری سەرو رابەرو گەلوو کوردی عەبدوڵا ئۆجالانی پاشێلکاری یاسای و نادادییا و مشۆم دمایش پنە بۍ.

پارتو سۆسیال دیموکراتی نەمسای ئەرەیاۋناش هەلومەرجو گۆشەگیری سەرو عەبدوڵا ئۆجالانی پېسە گرڎو زیڼانیا سیاسی مشۆم بە پاو یاسای مېیاننەتەوەیی سەرڕاس بکریۆوە. پارتو سەوزەکایچ باسش چانەیە کەرڎەن کە پەی چەسپنا و کارپنەکەرڎەی بە یاساکا پېسە یاساو نێلسۆن ماندێلای ئەرەکۊشا.

هەرپاسە دەسنیشانش کەرڎەن کە مشۆم نزیکایەتیێوە بە پاو شکۆو مرۆڤەکا ۋەرا ۋەر بە سزادریایا پەیڕەو بکریۆ و پەشتیوانی ۋێشا پەی سەرۋنەدای سی پی تی بەربڕا.

رەوتو لیبڕاڵی و نەمسای تازە باسش چانەی کەرڎەن کە گۆشەگیری سەرو عەبدوڵا ئۆجالانیرە سەپیان و جە هەمان کاتەنە ئاماژەش بە نامەو ٦٩ براوا خەڵاتو نۆبڵی کەرڎەن کە جە چوارچێوەو هەڵمەتەو ئازاڎیی پەی عەبدوڵا ئۆجالانینە نامەکەشا ئیمزاکەرڎەن. چا روانگۆ ئەرەیاۋناش کە ئاگاڎارۍ ئانەینۍ کە دۆڵەتو تورکی پېسە کەرەسێوە دادگای و دەسەڵاتی دادوەری پەی مەرامی سیاسی بەکاربەرۆنە و ئا مژاریە هەم جە ڤیەننا و هەم جە بەلجیکانە وزمۍ ۋەرو باسی. پارتو چەپیچ دەسنیشانش کەرڎ کە مشۆم هیچ سزادریێوە دلۍ هەلومەرجو جبەرو مرۆڤایەتینە رانەگیریۆ و پەی ئانەیچ ئەرەکۊشمۍ. پارتو کۆمۆنیستی نەمسای باسش چانەی کەرڎەن کە گۆشەگیری پاشیلکەرڎەی مافەکا مرۆڤین، مشۆم گرڎ کەسۍ ۋەرا ۋەرش مردۆوە و عەبدوڵا ئۆجالانیچ متاوۆ پەی ئاشتی ودیموکراتیزەکەردەی تورکیای دەورێوە گرنگ گێڵنۆ و پەی ئانەیچ مشۆم زەمینەسازی بکریۆ.

SPO بە تنی رەخنەش جە پاشێلکارییەکا مافەکاو مرۆڤی جە تورکیا و ئێرانەنە گێرت و بەتایبەت داواش کەرڎە کە ئا سزۍ هۊرشێویاوە کە سەرو سیاسەتمەدارا کوردیرە سەپیێنۍ چا وڵاتانە. NEOS ئەرەیاۋناش پەشتگیری جە مافو گەلا مکەرا پەی دیاریکەرڎەی چارەنویسو ۋێشا. هەرپاسە ئاماژەش پانەی کەرڎ کە پەنەوازا دیموکراسی جە هەرێمەکەنە قەوەت بکریۆ. KPO هرووژمەکۍ دۆڵەتو تورکیش پەی سەرو هەرێمە کوردییەکا شەرمەزارۍ کەرڎۍ و ئانەش دەسنیشانکەرد کە نەمسا متاوۆ چی مژارەنە دەورو میانجیکەری گێڵنۆ. پارتو چەپیچ پەشتگیریش جە ئەرەکۊشای کوردا جە دژوو فشارەکا کەرڎ و ئاماژەش پانەیە کەرڎ کە دژۍ گرڎ جۆرە فشارێوەنۍ.

شێوازو نزیکایەتی و مامەڵە چنی پەنابەراو کوردی

پارتەکۍ جە مژارو پارېزنای پەنابەرا کوردینە شێوازی جیاوازشا نیشانە دا. NEOS ئەرەیاۋناش پەی ئا کەسا کە گەرەکشانە پارێزنای بە گوێرەو پیمەرەکا بکەرا، پەنەوازا دەموودەس بە شێوێوە ڕاس دڎانشا بنریۆ پۆرە. SPO ئەرەیاۋناش مافو ڕەواو گرڎ کەسێوەن کە بە یاساکاو نەمسای پارێزیا و دیاریش کەرڎ پەنەوازا جەنگەکا جبەرو وڵاتەکەی نە فاڕیاوە پەی دلێنەو وڵاتی. پارتو چەپیچ واتش؛ پەنەوازا پەنابەرا کوردی بە شەرتە پارێزیا و جە دژو دیپۆرتکەردەیۆ پەنابەرانۍ پەی ئا وڵاتا کە مەترسیش ئینا چنە. پارتو سەوزی ئاماژەش پانەیە دا کە مافەکاو مرۆڤی نمەبۆ بازرگانی و ساتو سەوداش پێوەبکریۆ و پەنەوازا نزیکایەتی خێرا و دادپەروەرانە پەی داواکاری پەنابەرا کوردی نیشانە بڎریۆ. KPO ئەرەیاۋناش هەرکەسێوە ڕوبەڕوو ستەمی سیاسی بیەبۆوە پەنەوازا پارێزیۆ و دژو دیپۆرتکەردەیۆینمۍ پەی تورکیای.