ئەندامەو کۆنگرەو نەتەوەیی کوردسانی (کەنەکە) ئەسرین قادری عەبدوڵا چانەی کەرد، کە دەوڵەتوو ئێرانیچ پېسە دەوڵەتوو تورکی ستەم جە گەلوو کوردی مکەرۆ و واتش، "پارێزنای دەسکەوتەکۍ کوردا ئەرکوو گرڎوو حیزبەکان".
ئەندامەو کۆنگرەو نەتەوەیی کوردسانی (کەنەکە) ئەسرین قادری عەبدوڵا ئانەش وست ڕووە کە دەوڵەتوو ئێرانی و تورکیای وەختۍ مژارەکە مۍ سەروو گەلوو کوردی، سەروو خەتێوە یۆ گێرا.
ئەسرین قادریە دەسنیشانش کەرد کە جە پرسوو کردەوەکا قڕکەردەینە سەروو کوردا سیستموو هەردووە دەوڵەتەکەی پېسەنە یۆی و واتش، "ئێرانیچ و تورکیایچ ستەم جە کوردا مکەرا، بەڵام گەلوو کوردی بێدەنگ نەبیەن. جە ۋەرکەوتوو کوردسانینە هێزوو پێشمەرگەی و حیزبەکۍ بیەیشا هەن کە داواو مافوو ۋێشا مکەرا. جە تورکیایچەنە حیزبەکۍ بێنۍ و ئاڎیچۍ بە هەمان شێوە کۊشیۍ. ئا دووە حکومەتە فاشیست و تۆتالیتارە. حەجگیز ڕاشا نەڎا کە گەلوو کوردی بیاوۆ ئازاڎیی. لاو منۆ ئانەی گرنگا پارېزنای دەسکەوتەکا کوردی. ئەرکوو گرڎوو حیزبەکا، کەسایەتیە سەربەخۆکا و رێکوزیا مەدەنیەکان پارێزنای چا دەسکەوتا بکەرا".
ئاخێزوو ژەنۍ، ژیۋای، ئازاڎیی بەردەواما
ئەسرین قادریە ئاماژەش بە ئاخێزوو ژەنۍ، ژیۋای، ئازاڎیی کەرد کە دووۍ ساڵېن جە ۋەرکەوتوو کوردسانی و ئێرانینە بەردەواما و واتش، " ئێرانەنە جە ساڵەو ١٩٧٩ بە دماوە کۊشیای ژەنا بەردەوام بیەن. ژەناو ئێرانی بەتایبەتی ژەناو کوردسانی پەی تەنیا ڕووێچ بێدەنگۍ نەبیۍ. دماو کوشتەی ژینا ئەمینیۍ بە دروشمەو ژەنۍ، ژیۋای، ئازاڎیی جە ۋەرکەوتوو کوردسانی و گرڎوو شارەکاو ئێرانینە سەرهۊردایۍ گەورە دەسشپنەکەرد. ئێمە دژوو رژێمی تۆتالیتەری و فاشیستی ئەرەکۊشمۍ. حەرپۊکەی دماو دەسپنەکەردەو چالاکی و ۋێنیشاندایە ناڕەزاییەکا ئێرانەنە، جمهوری ئیسلامی ئێرانی پېسە گرڎ جارێ مژارەکەش سڕ پۊش کەرد. ۋەروو ئانەیچ چالاکیی و ۋێنیشاندایەکۍ گەلی، بەتایبەتی چالاکییەکۍ ژەنا تا حەدێوە نە ۋینیۍ. ئینە پا مەئنۍ نمۍ کە ئاخێزەکە بەردەوام نییا. ئیساتێچ جە شارەکاو کوردسانی و جە بڕۍ شارا ئێرانینە دژوو مژاروو حیجابی زۆرەملێ کۊشیانە و ئانەیچ مژارێوە گرنگا ئێرانەنە. ئیساتێچ جە جاڎەکاو کوردسانی و ئێرانینە ئاخێزوو ژەنۍ، ژیۋای، ئازاڎیی بەردەواما".
