پارێزنەرا نوسینگەو یاسایی سەڎەی جارێوەتەر سەردای سی پی تیشا کەرڎ و سەرنجشا وست سەرو ئا رێکارەی جە ئازەربایجانەنە بەکارشا ئاورڎ، بەڵام جە ئیمرالینە بەکارش نمارا. چا چوارچێوەنە پارێزنەرا داواکاری تایبەتیشا وست ڕووە.
سەبارەت بە ئاژەو ڕابەرو گەلوو کورڎی عەبدوڵا ئۆجالانی کە ماوەو ٤١ مانگان هیچ هەواڵێش نمەزانیۆ، نوسینگەو یاسایی سەڎەی جارێوەتەر سەردای کۆمیتەو ناستەی ئەشکەنجەو ئەنجومەنو ئەوروپای(سی پی تی)ش کەرڎ.
بەپاو ئاژانسوو هەواڵوو میزۆپۆتامیای (MA)، جە داواکارییەکەنە ئامان کە جە بەینوو مانگەو ئایاری و تەمووزو ٢٠٢٤ ینە ٢٤ داواکاریۍ پارێزنەرا و ١٢ داواکاریۍ جە لایەنو بنەیانەکاوە پێشکەش کریێنۍ، بەڵام تەمامو داواکارییەکا بەبێ جواب مەنێنێوە.
جە داواکارییەکەنە ئاماژە پانەیە کریان کە چا پرۆسەنە هیچ نامێوە نەیاوان دەسوو پارێزنەرا و چارەنوویس و ئا چوار نامەیەی کە پەی ئیمرالی کیانیان ڕۆشن نییا و هیچ فاڕیایۍ وەش نەبیەن.
جە ١٤و ئەیلولو ٢٠١٨ یۆ لاو کەمیۆ ٢٣ جارۍ داواکاری بنەیانەکا پەی کۆبیەیۆ و پارێزنەرا بە بەهانۍ "سزاو دیسیپلینی" ڕاش ۋنە گیریان. جە گوزارشتەکێنە یاڎ وزیانۆ کە جە ٤و تەممووزو ٢٠٢٤ینە، "سزاو دیسپلین"ی پەی ماوەو یەرۍ مانگا درێژ کریانۆ و وەڵۍ دمایی ئامای "سزاو دیسپلین"ی جە ١٢و نیسانو ٢٠٢٤ دیسان سزای تازۍ سەپیێنە. جە داواکارییەکەنە ئامان کە جە ٣ۍ ئایارو ٢٠٢٤ینە، دادگاو جابەجێکەردەی بورسای قەڎەغەکەردەیۍ تازەش بەرکەرد. ئی قەڎەغەکەردەیچە جە ١٤ و ئایارینە بە شێوێوە کە پەسەڼ کریان پێچەوانەو یاساکا بۍ.
جە داواکارییەکەنە ئاماژە پانەی کریان کە جە ماوەو یەرە مانگی ۋییەرڎەینە یەرۍ بۆمەلەرزۍ جیاوازۍ جە بەحرو مەڕمەڕەینە کۊتێنۍ، سەرەڕاو ئانەی گەل نیگەرانو ئاژەو ڕابەرو گەلوو کورڎی بۍ، بەمەڵامەتوو سەپنای قەڎەغەی و چەمپنەکۊتەی پارێزنەرا و بنەیانەکاوە ڕا نەڎریا هیچ زانیاریێوە دەس وزیۆ. جە داواکارییەکەنە ئاماژە پانەیچ کریان کە مانگېرتەی جە وارڎەو زیڼانیا جە ٢٧ و تشرینی دووەمو ٢٠٢٣ بە داواو "ئازاڎیی پەی عەبدوڵا ئۆجالانی، چارەسەری دیموکراتیکی پەی پەرسوو کورڎی" دەسسپنەکەرد و جە ٤ و تەمووزو ٢٠٢٤ینە چالاکییەکە بە مەڵامەتوو ئانەی داواکارییەکۍ زیڼانیەکا بێ جواب مەنێنێوە دمایش پنە ئامان. وچیان کە جواب نەڎایۆ داواکارییەکا زیڼانیەکا زەرەرش ۋنە گنۆوە. پەی ئانەی ئەکامۍ خراپ و مەترسیڎار ڕووە نەڎۆ ، مشۆم گرڎ ۋەرپرسیاریۍ و پەنەوازییەکۍ پېسە ۋێشا بە زووتەرین کات جابەجێ بکریا."
جە بەردەوامی داواکارییەکەینە ئاماژە پانەیچ کریان کە هەوڵەکا ڕێکوزیا دلېینەی و مېیاننەتەوەییەکا جە ماوەو یەرۍ مانگانە پەی دمایی ئارڎەی بە گۆشەگیری ئیمرالی بێ جواب مەنێنێوە و ئەرەیاۋییان کە ئینە نیشانۍ ئانەینە کە دەرحەق بە ئیمرالی پەشتگۆش وستەی هەن و هەرپاسە قەرارەکۍ نەتەوە یۆگێرتەکا سەبارەت بە گۆشەگیری ئیمرالیی یاڎ وزیێوە.
قەرارەکۍ پەی ئازەربایجانی جابەجێکریۍ
جە داواکاریەکەنە ئەرکەکۍ CPT پەی دڵنیا بیەی و ڕاگێرتەی جە ئەشکەنجەی یاڎ وزیێنێوە و ئاماژە پانەیچ کریان: "هەرچنە CPT جە ئیمرالینە چەمپنەکۊتەی ئەنجام مڎۆ بەڵام هیچ زانیاریێوە جەبارەو ئاژەو بەڕێز ئۆجالانیۆ وەڵا نمەکەرۆوە. بەڕێز ئۆجالان و هەمڕا زیڼانیەکێش زیاڎ جە ٤٠ مانگان هیچ زانیاریێوە سەرو ژیۋایشا نمەزانیۆ. تەمامو پەیوەندییەکاشا چنی بنەیانەی و پارێزنەرا و جیهانو جبەری وستەنەرە. بەتایبەتی، ئا ڕێکارۍ کە جە ماددەو ١٠/٢ ۍ لوجنەکەیتانە ئامان جابەجێ نمەکریۆ. بەڵام هەمان پرۆسە جە کاتوو ۋێشەنە پەی ئازەربایجانی جابەجێ کریان. ۋەروو ئانەی گوزارشتەو ساڵەو ٢٠٢٢ ۍ سەرداکەی وەڵا نەکریانۆ، ئینە ئانەی بەروزۆ کە ڕژێموو ئەشکەنجەی سیستماتیک جە ئیمرالینە ملۆڕاوە."
هەرپاس جە داواکارییەکەنە داوا جە CPT کریان سەبارەت بە ئاژەی کتوپڕی جە ئیمرالینە و ناستەی پرۆسەی سیاسی، پێوەس بە ئاژەو ئەشکەنجەیۆ، گۆشەگیریی هۊربگیریۆ."
داواکارییەکۍ پارێزنەرەکا جە سەرۋنەداکەینە:
* ۋەروو ئانەی ئاژەو ئیساتۍ ئیمرالی جە دماین سەردایتانە جە ٢٢ۍ ئەیلوول و ٢٠٢٢ بەردەوامە و جە ماوەو دووۍ ساڵانە ئاژەکە یاوان بە ئاستێوە تازە، پەنەوازا دەموودەس سەردای زیڼانو ئیمرالی بکریۆ.
* پەی ئانەی ئاژەو ئیساتۍ سەردانیکەرا چنی شکۆمەندی ئینسانی بگونجیۆ، پەنەوازا گرڎ هەوڵێوە پەنەواز بڎریۆ پەی جابەجێکەردەی گرڎوو مافەکا سەردای و چەمپنەکۊتەی مسۆگەر بکریۆ، بەتایبەتی سەردای پارێزنەرا و بنەیانەکا و دماییئارڎەی بە گۆشەگیریی سیستماتیکی.
* پەی ڕاگېرتەی جە ئەشکەنجەی و مامەڵەی نامرۆڤانەی و خراپی و دماییئارڎەی بە ئاژەو بێدەنگی، پەنەوازا ڕاوجای پەنەواز بگیریۆنە ۋەر و گەرەکمانە ئا رێکارە یاساییۍ کە جە ماددەو ١٠/٢ ی پەیماننامەکەینە ئامێنۍ بوزیانە بوارو جابەجێکەردەیۆ."
