تا مۍ، ورچنیەی ١٨و کانوونو یوەمو ئەنجوومەنو پارێزگاکاو عێراقی نزیکتەر بۊوە. هاموەخت چەنی پارێزگاکای تەرو عێراقی، هەڵمەتەو بانگەشەو ورچنیەی ئەنجوومەنو پارێزگاو نەینەوای بەبی مرڎای بەرڎەواما. چی چوارچوەنە بانگەشەو ورچنیەی شەنگالیچنە گەرموگوڕتەر بۊ.

شەنگاڵنە فرە هێزۍ سیاسیۍ جیاوازۍ ملەملۍ چەنی یۊترینی کەرا.  وەلۍ کاندیدەکاو لیستو "یۊبییەی خەڵکو نەینەوا"ی بە پەشتیبەستەی بە هامپەیمانیی هێزی و پێکئامایەکاو شەنگاڵی مۊرەو وێشا دێنە وەنەو ورچنیەیەکاو  شەنگالی. ٤ پاڵێویۍ کە لاو وێڕاوەبەریی شەنگالیوە پەشتگیریی کریا لیستەکە بە ژمارە ١٣٤ بەشدارییشا چا  ورچنیەینە کەرڎەن.

پادۍ و ڕاوەبەرو وێڕاوەبەریی شەنگاڵی جە ڕوەکاو دماتەرینە بە ڕۊحو سەفەربەرییوە چالاکییەکاشا کەرا. چا چوارچوەنە نامۍ پاڵێویایەکا، قاسم کەشکۊ، دەخیل سەیدۊ و شێح ئازاد هەرێمو قبلەتو شارۊچکەو تلعوزێرینە هەڵمەتەو بانگەشەو ورچنیەینە وێشا بە خەڵکی ئشناسا و لاو خەڵکیوە بەگەرمی خێرامایشا کریا.

ئەوەڵۊ هامسەرۊکو ئەنجوومەنو وێراوەبەریی دیموکراتیکو شەنگاڵی، نایف شەمۊ باسش جە گرنگیی ورچنیەی نەینەوای کەرڎ و داواش وەنەو خەڵکی کەرڎە دەنگ بە پاڵێویایەکاو پادۍ بڎا.

 شەمۊ وتارەکەشنە واتش، کە پادۍ بە زەحمەت و ونەو گەشمەرڎا بنیات نریان و درێژەو قسەکاشنە واتش:"مشۊم خاوەنداری جە زەحمەت و ونەو گەشمەرڎا کەرمۍ. دماو کۊکوشییەکەی دوۍ ورچنیەیۍ کریێنۍ، وەلۍ بەداخۊ نەتاوانما ئیسفادەشا چەنە کەرمۍ و وانەما چەنە ورنەگێرتۍ.  وەلۍ پێویسا چی ورچنیەیە وانە ورگێرمۍ و ئەنجامێوە دەس وزمۍ.  ئەوەڵ چێو ئانەنە کە گەلەکەما بەشداریی ورچنیەی کەرۊ، وەلۍ جە گرڎی گرنگتەر ئانەنە کە وەختۍ ملا سەرو سنڎۆقەکاو دەنگدای دەسشا وزا سەرو ویژدانیشا. ئەگەر ماچۊ ئێزدیینا مشۊم بە ویژدانۊ مامەڵە کەرۊ."

دماتەر پاڵێویاو تلعوزێری دەخیل سەیدۊ برۊ جە هۊزو جندۊی وێش ئشناسا و واتش:"دوژمن مشۊ بزانۊ، کە ئێمە قەت شەنگاڵی و تلعوزێری وەشەسیای جیا نمازمۍ. دوژمن سەروو حیسابو ئێمە بلا سەرو پۊستە باڵا و حکومییەکا و دژایەتیی مافەکاو گەلەکەیما کەرا؟ وەعدتا پەنە مدەیمۍ، کە ئەگەر ورچنیایمۍ مافو گلێرگەی ئێزدیما جە ئەنجومەنو پارێزگاینە پارێزنمۍ."

دماتەر پاڵێویای ئێزیدیی خەڵکوو باشیکا، پارێزنەر شێخ ئازاد عەبدال، بە زوانی عەرەبی وێش بە گەلی ئشناسا و واتش، کە شەنگاڵ جە فرەو خزمەتگوزارییا بێبەشا و ئەگەر ورچنیا ئەنجوومەننە مافە خزمەتگوزارییەکا گێڵنۊوە پەی شەنگاڵی.

ئاخرۊ قاسم کەشکۊی جە زۊراوای شەنگاڵیوە، کە وەڵتەرۍ هێزو پارێزنای شەنگاڵینە بۍ وێش بە خەڵکی ئشناسا. کەشکۊ واتش، کە خاکو شەنگاڵی بە ونەو گەشمەرڎا ئاوی دریێنە و واتش:"تا شەنگاڵی جەدەس نەدەیمۍ مشۊم پەشتی بە ئینسانی بێویژدانی نەبەسمۍ. ئانۍ کە ورچنیا مشۊم کەسۍ ویژداندارۍ و بەئەخلاقۍ با.  ئیساتۍ گلێرگەکەما پێویسش بە کەسە بەتوانایا هەن تا وەراوەرو گەمە سیاسییەکاوە مرڎاوە.

دماو وتارەکا گۊرانی وچیۍ و ورپڕای کریا. ئاهەنگەکاو بانگەشەو ورچنیەی پەی ئشناسای پاڵێویایەکا شەنگاڵنە و ناوچە عەرەبییەکانە و فرەو دەگا و شارۊچکەکانە تا وەڵۍ ورچنیەی بەرڎەوام بۊ.