جە گلێرۊبیەو ئەنجومەنوو پارێزگاو نەینەواینە دەس جە کارکێشتەیۆ فارس بریڤکانی پەسەنڎ کریا و پەدەکە پۍ ئانەی بتاوۆ جە بارەو شەنگالیوە قسێش بۆ و قەرار بڎۆ، ئەندامێوە شەنگالی ۋێش یاگۍ ئاڎینە کیانۆ دلۍ ئەنجومەنەکە.
جە هۊرچنیەو ١٨/١/ ٢٠٢٣ۍ ئەنجومەنوو پارێزگاکا عێراقینە پەدەکە شەنگالەنە گورزۍ گۊرێش وەرکەوتە و نەتاواش حیچ کورسیێوە چا شارەنە دەس وزۆ. حەرپۊکەی مافوو قسۍ و بەرکەردەی قەراریش سەروو شەنگالی دلۍ ئەنجومەنوو پارێزگاو نەینەواینە جە دەسدابۍ.
باس چانەی کریۆ، پەدەکە پۍ ئانەی بتاوۆ جارێوەتەر ۋێش سەروو شەنگالیرە سەپنۆ، دلۍ ئەنجومەنوو پارێزگاینە دەسش بە فرت و فێڵی و پیلانگێڵنی کەردەن.
بە پاو زانیارییەکا جە چوارەم گلێرۊبیەو ئەنجومەنوو پارێزگاو نەینەواینە، ئەنداموو پەدەکەی فارس بریڤکانی دەسش جە کاری کێشتەنۆ و دەس جە کارکێشتەیۊکەیچش قبوڵ کریان.
بەپاو یاساو هۊرچنیەکا جە وەختوو دەس جە کارکێشتەیۆ ئەندامێوە ئەنجومەنینە، لیستەکەش متاوۆ جیای ئاڎیی کەسێوەتەری بنیۊرە و پینەیچ پەدەکە گەرەکشا جەمال خدەری شەشۆی جیای فارس بریڤکانی کیانۆ ئەنجومەنوو پارێزگاو نەینەوای.
جەمال خدەری شەشۆ ۋەروو ئانەی شەنگالیا، وچیۆ کە پەدەکە گەرەکشا جە ڕاو ئادیۆ دەس جە هەرمانوو کاروو شەنگالی وەربڎۆ و ۋێش سەروو شەنگالیرە سەپنۊنە.
