کۆمیتەو ڕاوەبەری پەکەکەی جە بەیاننامێوەنە سەبارەت بە ساڵیاڎو پیلانگێڵنی مېیاننەتەوەیی ١٥و شوباتی، داواش جە گرڎ لێوە کەرڎ بە شێوێوە جەماوەری مجیارە مېڎانەکا و ١٥و شوباتی، ڕۆو قڕکەردەی کوردی بکەرا بە ڕۆو ئازاڎیی.
کۆمیتەو ڕاوەبەری پەکەکەی سەبارەت بە ساڵیاڎو پیلانگێڵنی مېیاننەتەوەیی ١٥و شوباتی دژ بە ڕابەر ئاپۆی پەیامێوە نویسیاش وەڵا کەرڎۆ. پەکەکە داواش جە گرڎو گەلوو کوردی و بەتایبەت ژەنا، جوانا و هێزە دیموکراتیکەکا تورکیای و گرڎو دۆسا دیموکراتیکۍ گەلوو کوردی کەرڎ کە ڕۆو ١٥و شوباتی مجېیارە مېڎانەکا و داواش جە گرڎ لېوەکەرڎ پیلانگێڵنیەکەی شەرمەزار بکەرا و ١٥و شوباتی، ڕۆو قڕکەردەی گەلوو کوردی بکەرمۍ بە ڕۆو ئازاڎیی.
بەیاننامەکەو پەکەکەی پی جۊرەنە:
"ئێمە ٢٦ـەمین ساڵوەگەڕو دڕندەتەرین و ناڕەواتەرین هرووژمی تاریخی و پیلانگێڵنی مېیاننەتەوەیی ١٥و شوباتی و سیستەمو گۆشەگیری ئیمرالی و قڕکەردەی ئەزموون مکەرمۍ. جمېیەرو ئازادیما و گەلی وڵاتپارێزن و دۆسا دیموکراتیکیما بە رابەرایەتی ڕابەر ئاپوی ٢٦ ساڵۍ قارەمانانە ۋەرەنگارۍ پیلانگێڵنی و سیستەمو ئیمرالی بیێنێوە. ئی مڎرامانە تاریخیە کە ٢٦ ساڵێن بە دروشمۊو "شمە نمەتاودۍ ڕۆما تاریک بکەردۍ" بەرەو وەڵۍ ملۆ و زیاتەر جە ٣٠ هەزار گەشمەرڎۍ دریێنۍ. پی مڎرامانیە کە ٢٦ ساڵێن بە درێژایی هێڵۊو شەهادەتی و فیدایی بیەی ئەنجام مڎریۆ، پیلانگێڵنی مېیاننەتەوەیی جە گرڎ ڕووێوە شکسش ئارڎ و سیستەمو ئەشکەنجە و گۆشەگیری ئیمرالی و قڕکەردەی هۊرشێویاوە. ئیساتۍ بە تەمامی ڕۊشنا کە ٢٦ ـەمین ساڵوەگەڕو پیلانگێڵنی ڕۊشنایۍ تاریخیش سەرو تاریکیرە جە ۋێشەنە هۆرگێرتەن و ڕا پەی ئازادی یەکجارەکی مکەرۊوە. ئێمە هیواڎارێنمۍ و باوەڕیما چامنەن کە فاڕیای و سەرهۊردایۍ تاریخی ڕووەبڎۆ و پرۆسەو فاڕیای دیموکراتیکی گرڎ لێوە گێرۊوە.
داواو چنەوېیەردەی جە گەلوو کوردی بکەرا
پی جۆرە جارێوەتەر بە قینی و تووڕەییۆ هرووژمی پیلانگێڵنی مېیاننەتەوەیی ٩و نۆۋەمبەرو ١٩٩٨ ی و ١٥و شوباتو ١٩٩٩ و گرڎو ئا هێزا کە پلانەشا پەی ئی پیلانگێڵنییە نیارە، جابەجێشا کەرد، شەرمەزار مکەرمۍ. پی هێزا ماچمۍ ئاوەزیەتی تاریک، ستەمکارانە و چەوەسنایۆ ۋێشا ڕەخنە بکەرا و فاڕیای جە ۋێشانە بکەرا و سەرو ئا کردەوەی کە ٢٦ ساڵېن ۋەرا ۋەر بە گەلوو کوردی کەردەنشا داواو چنەوېیەردەی جە گەلوو کوردی بکەرا و واز جە ئاستەنگیەکا ۋەردەمو ژیۋای ئازادی و دیموکراتیکی گەلوو کوردی بارانە.
ئەوەکۊشای گۊرەو ئازادی و مرۆڤایەتی کە جمېیەرەکەما، گەل و دۆساما ٢٦ ساڵېن بە سەرمەشقایەتی ڕابەر ئاپۆی جە دژو هرووژمی پیلانگێڵنی مېیاننەتەوەیی و سیستەمو ئەشکەنجە و گۆشەگیری ئیمرالی و قڕکەردەی ڕاوەبەرشا کەرڎەن پیرۆز مکەرمۍ. هەرپاسە بە ڕێزدارییوە گرڎو گەشمەڕدا ئی ئەوەکۊشا تاریخیە کە ٢٦ ساڵېن بەردەواما، بە تایبەت هەمڕېما خالید ئوراڵ و ئاینور ئارتان یووەمی گەشمەرڎا مڎرامانی فیدایی کە واتشا "شمە نمەتاودۍ ڕۊما تاریک بکەردۍ" یاڎ مارمێوە. هەرپاسە ئەرەیاۋنمێش کە جە ٢٧ـەمین ساڵەو پیلانگێڵنییەکەینە پەی ماڕای تەمامەتی پیلانگێڵنیی و مسۆگەرکەردەی ئازادی جەسەیی ڕابەر ئاپۊی ئەرکو ۋێما بە سەرکۊتەیی جابەجێ مکەرمۍ و سەرو ئا بنەمایۍ هیواو سەرکۊتەی پەی گرڎو ئا کەسا موازمۍ کە پەی ئازادی و دیموکراسی ئەوەکۊشای ڕاوەبەر مکەرا.
پېسە مزانیۆ هرووژمی پیلانگێڵنی مېیاننەتەوەیی جە چوارچێوەو جەنگی جەهانی یەرەمی و بە ئامانجو دلېنەبەردەی ڕابەر ئاپۆی جە لایەنو ئەمریکا، بریتانیا و ئیسرائیلیوە ڕێکوزیا، سەرکردایەتی کریا و بە پەشت بینای بە گرڎو سیستەمەکا دۊڵەتی و دەسەڵاتی دژو پەکەکەی و گەلوو کوردی جابەجێ کریا. هامکات سەرەڕاو ئینەیچ دژوو گەلا تورکیای و گرڎو گەلا ۋەرکۊتوو مېیامینی و مرۆڤایەتی جابەجێ کریا. چونکە هرووژمێوە سیستەمو مۆدێرنیتەی سەرمایەداری بێ کە نکۆڵی و دلېنەبەردەی گەلوو کوردیش بە ئامانج گێرتەبۍ. پېوەس پینیشا، ئانەی نامێش نریان "پرسو کوردی" سەرو بنەماو سیستەمی و ئاوەزیەتو کۆمکوژی دژوو گەلوو کوردی بەکار ئاما؛ ئامانج ڕاگێرتەین جە چارەسەری پرسو کوردی و بەردەوامیدای بە قڕکەردەی گەلوو کوردی بۍ پەی بەدەسئاوردەی قازانجۍ ئابووری و سیاسی بۍ.
جە یاڎو٢٦ـەمین ساڵوەگەرو پیلانگێڵنینە ئەوەکۊشای متاوۆ ئەنجامێوە یەکلاکەرەوە بەدی بارۆ
ئەوەکۊشای دژو هرووژمو پیلانگێڵنیی مېیاننەتەوەیی تەنیا ئەوەکۊشایۍ نەبۍ پەی بەدیئاوردەی ئازادیی کوردی، بەڵکم ئەوەکۊشایۍ بۍ پەی پەرەپنەدای یۆبیەی دیموکراتیکی دلۍ گرڎو گەلا ۋەرکۊتوو مېیامینی و جمېیەرو دیموکراسی جە گرڎو جەهانینە. بەکوڵی هەرکەسێ پەی ئازادی جەسەیی ڕابەر ئاپۆی و چارەسەری پرسو کوردی ئەوەکۊشایش کەردەبۆ، جە حەقەتینەنە ئەوەکۊشای پەی ئازادی ۋێش و گرڎو مرۆڤایەتی پەی یاوای بە ڕاوەبەرایەتیێوە دیموکراتیکی بیەن. ئیساتۍ جە ٢٦ـەمین ساڵوەگەڕو ئی ئەوەکۊشایە تاریخیەینە، پاسە بەرگنۆ ئەنجامێوە سەرکۊتە و هەمیشەیی بەدەسبۍ.
دەرەنجامو ئەوەکۊشای تاریخی ٢٦ ساڵەی دژ بە هرووژمو پیلانگێڵنی مېیاننەتەوەیی و سیستەمو گۆشەگیری، ئەشکەنجە و قڕکەردەی ئیمرالی ڕۊشنا. ڕابەر ئاپۆ چی ئەوەکۊشا گۊرەینە فاڕیای جە پارادایمەنە پێشکەشش کەرڎ و بە پەرەپنەدای پارادایمو گلېرگەو ئیکۆلۆژی، دیموکراتیک و ئازادی ژەنۍ، ڕاو ئازادیی پەی گرڎو گەلا چێردەسی کەردەن. بە ڕۆشنکەردەیۆ سەردەمو ئیساتۍ ۋێش کەرڎ بە ڕابەرو گرڎو گەلا چېردەسەی. بە پێناسەکەردەی ژیۋای ئازادی و گلېرگەی دیموکراتیکی سەرو بنەماو ئازادی ژەنۍ، هێڵۊو شارستانیەتو دیموکراتیکی ۋەرا ۋەر بە شارستانیەتو دۊڵەتی پەرەپنەدا. ئارۆ ئی هێڵۍ به دروشمۊو "ژەنی، ژیۋای، ئازادی" که بە سەرمەشقی ژەنا دەسش پنەکەرڎەن، ڕاو ڕاسی ئازادی و دیموکراسی پەی گرڎو ئینسانە ستەم ۋنەکریایەکا کەردۆ.
ڕابەر ئاپۆ دیسان دەس بە پرۆسەو تازە کەردەیۆ مکەرۆ
ئیساتۍ جە ٢٦ ساڵوەگەڕو ئی ئەوەکۊشا گۊرەینە، کە ڕابەر ئاپۆ ،گەلەکەما و دۆساما ڕاوەبەرش مکەرا، ئاراستەکۍ بەرەو فاڕیای و سەرهۊردای تازەی ملۆ. بە کاریگەری یۊگێرتەو ئەوەکۊشای گۊرەو ٢٦ ساڵە و جەنگی جەهانی یەرەمی کە جە ۋەرکۊتوو مېیامتینینە سەرشهۆردان، ئیساتۍ هرووژمو پیلانگێڵنی مېیاننەتەوەیی و سیستەمو گۆشەگیری، ئەشکەنجە و قڕکەردەو ئیمرالی بە تەمامی ئاشکرا و هۊرشێویاوە. ئی هرووژم و سیستەمە ناڕەوا و ستەمکارانە ئیساتۍ ئینا قۆناغی ۋېیەردەنە؛ کەس نمەتاوۆ ئیتر ئی سیستەمەیە قبوڵ بکەرۆ، تەنانەت ئانێچ وەششا کەرڎ نمەتاوا وەرپرسیاریەکەیش هۊرگېرا و بەردەوامۍ با. جە ٢٦ ـەمین ساڵوەگەڕشەنە، گرڎ کەسێ جە جەهانەنە، بە تایبەت جە ئاستو کوردەسانی و تورکیاینە، چەمەڕاو دەس پنەکەردەی فاڕیایۍ تازەی، جە ڕابەر ئاپۆی مکەرا.
پاسە دیارا ئەر پشێوی جددی و دەسوەردای کودەتای نۍ وەڵۍ، ئانە جە ڕاو ڕابەر ئاپۆیۆ ئی پرۆسە تازە پەی گرڎ کەسێ پرۆسەو فاڕیای و سەرجە نۆ وەشبیەیۆ دەس پنەمکەرۆ. پەکەکە و گەلوو کوردی فاڕیا، دۊڵەتو تورکیای فاڕیۆ، ۋەرکۊتوو مېیامینی و گرڎو جەهانی فاڕیۆ. با دۊڵەت نەتەرسۆ؛ ڕابەر ئاپۆ و گەلوو کوردی دۊڵەتی نمەشێونا، با گلېرگەو تورکیای نەتەرسۆ؛ ڕابەر ئاپۆ و گەلوو کوردی تورکیای پارچە نمەکەرا، گەلوو کوردی پەی دیموکراتیزەکەردەی تورکیای هەرمانە بکەرا. هەوڵەکۍ ڕابەر ئاپۆی و گەلوو کوردی پېوەسێنۍ بە ئازادی و دیموکراسیوە، نە جە ۋەرکۊتوو مېیامینی، نە جە جەهانیچەنە جە دژو حیچ کەسێ نمەبۆ؛ پەی گرڎ کەسێ بەرژوەندییە دیموکراتیکەکۍ بە بنەما هۊرمگیریا.
ڕۆشنا کە بە قسە چەمەڕاکریاکا ڕابەر ئاپۆی، پرۆسێوە تازە دەس پنەمکەرۆ. بێگومان گرڎ چێوۍ بە ئەرەیاۋنێوە بەدی نمۍ و گرڎ چێوۍ تەنیا نیا دەسو ڕابەر ئاپۆینە. کێشەکە هینو گرڎیمانە، ۋەرپرسیاریەکەیچ هینو گرڎیمانە. مشۊم گرڎ کەسۍ جە پڕۆسەی تازەنە جە ئەرک و ۋەرپرسیاری ۋێش بیاوۆنە، خاوەنداری بکەرۆ و جە پراکتیکەنە جابەجێش بکەرۆ. پرۆسەی تازە بە چەمەڕایی داواکارییەکا بەدی نمۍ؛ بەپێچەوانۆ بە ئەوەکۊشای و بە ڕێکوستەبیەی سەرگنۆ.
پېوەس پینەی بە تایبەت داوا جە ژەنا و جوانا جە گرڎو گەلەکەیما، هێزە دیموکراتیکەکا تورکیای و گرڎو دۆسا دیموکراتیکی مکەرمۍ کە جە نزیکۆ شۊنیرەلوای پەی مۊچیاریەکا ڕابەر ئاپۆی بکەرا و جە حەقەتینی بیاوانە، جە پڕۆسەی تازەنە بە شێوێوە قەوەتتەر خاوەنداری جە ئەرک و ۋەرپرسیاری ۋێشا بکەرا. هەرپاسە واوەی بانگەواز مکەرمۍ کە جە ساڵیاڎو ٢٦ەمینینە مجیارە جاڎە و مېڎانەکا بە شێوێوە بە هێزتەر پیلانگێڵنی ١٥و شوباتی شەرمەزار بکەرا و ١٥و شوباتی ڕۊو قڕکەردەی گەلوو کوردی بکەرا بە ڕۊو ئازاڎیی.
مرۊنە پیلانگێڵنی مېیاننەتەوەیی و سیستەمو قڕکەردەی ئیمراڵی.
بژیۋۆ ڕابەر ئاپۆ."
