هەر گەلێ و جمیەر و ڕێکۋستێوی سیاسیی، سەربازی و کۆمەڵایەتیی، ئەگەر گەرەکش بۆنە بە ئامانج و سەرکۆتەی بیاوۆنە، مشیۆم بنەمای فکری و فەلەسەفی و بناغەی پەتەوش بۆنە و پەشتیش بە توانا زاتییەکێ وێش بەستە بۆنە. ئانزان (مرۆڤ) کاتێ سەرنج جە پەکەکەی مڎۆنە ئا بنەما و بناغەشە چنە بۋینۆنە. خوڵقنەر و ئا بنەما و بناغەیە و دەرنجام دروست بییەی پەکەکەی کەسایەتیۋی زانا و هۊشیار و بەهێزش پەشتیۋە بییەن، کە ئاڎیچ عەبدوڵا ئۆجالان ڕابەر گەلو کوردی و گەلە بندەسەکان.

ڕابەر عەبدوڵا ئۆجالان، جە سەرەتاو ١٩٧٦ی جە گەڕەکو دیکمان-و ئانکارا-و پایتەختو تورکیای یەکەمین کۆبییەش بە بەشداری ژمارێۋێ فرێ کەسایەتیێ شۆرشگێڵێ، چەپێ و نامیێ تورکیای دلێشانە کەسایەتی دیار و نامی و شۆڕشگێڵ حەقی قەرار و ژمارێۋی فرێ جە هامۋیرێ و هاۋەڵەکانشان ڕێکۋزۆستەن. ئیتر بە کۆبیەی دمای کۆبیەی ڕێبەر ئاپۆ ڕۆحی تازەتەر بە هاۋەڵەکانش مەبەخشۆنە و بە جۆرێ کە جە ٢٧/١١/١٩٧٨ جە دەگاو فیسی سەر شارو ئامەدی (پەکەکە) پارتو کارگەرانو کوردستانی مەرزنارە و پارتەکەشان ڕۆچ بە ڕۆچ مەزنتر مەبۆنە. پۆکەی دوژمن مەکەرۆنەش ئامانج و هێرش دژش ئەنجام مەڎۆنە.
جە ئاکامو هێرشەکەیەنە، ژمارێۋی فرێ ئەندامێ و پێشەنگێ پەکەکەی دەستگیرێ مەکەریانێ. جە مانگەو تەمووزو ١٩٧٩ی ڕێبەر ئاپۆ و هەڤاڵەکێش کە مەتەرسی دەستگیرکەردەیشان سەر بێنە، سەرەتا دەربازێ ڕۆژئاڤاو کوردستانی و دماتەر سوریای مەبانێ. شۆنیشەرە ملانێ ووڵاتو لوبنانی و جە دۆڵەو بیقاعی یاگەگیرێ مەبانێ. جە ئاگە ئۆجالان مەیڎانو خەباتیش فراوانتەر کەرد و پەی پەروەدەکەردەی سیاسیی، فکریی، کۆمەڵایەتیی و سەربازیی ئەکادیمیاو فەرماندە مەعسوم قورقومازیش مەرزنارە. جە ۱۹۸۲ تا ١٩٩٨ جە ئاکادیمیاکەنە شەۋانە و ڕۆ دەرس مەۋاچێوە و شاگردێ و مسیارەکێش پەروەردێ کەرەێ. دەرەنجام زیاتەر جە ۲۰ هەزار ئەندامێ پەکەکەیش جە گردو بوارەکانە بە قوڵی و پتەویی پەروەردێ کەردێ و دەستە دەستە ڕەوانێ ووڵاتیش کەردێۋە.
سات بەسات دوژمن هێرشەکانش پەی سەرو گەلی و پەکەکەی فراوانتەرێ مەکەرێوە و سەرجەم دەرفەتە ئاشتیانێ سیاسیانەکێش جەبارێ بەردێ.
هەر پەوکەی ڕابەر ئاپۆ، بەناجاری و پەی وەرگیری کەردی و پارێزنای وێ و گەلی بڕیاری گرنگدا.
جە ۱٥و (تەباخ-ئاب)و ۱۹۸٤ی شۆڕشی چەکداریش بەرپاکەرد و بە تەقنای یەکەم فیشەکی کۆشکو زۆرداری تورکیای ئەرەگێریش لەرزناۋە و کوردش جە خاو و وەرمی قوڵی دەیان ساڵەی چڵاکنارە و زینڎە کەردەۋە و هەر پۆکەی کورد هامتەریب چەنی ساڵیادو ئەرەمەرزنای پەکەکەی، ۱٥و (تەباخ-ئاب)و ۱۹۸٤یچ بە سەرجەنۊ ئەۋەژیوای و زینڎەبییەو وێش بەنامێ کەردەن.

ڕابەر ئۆجالان قۆناغ بەقۆناغ هەوڵێ و کۆششەکێش وەگەڕ وستێ تا بناغێوی هێقم پەی ڕێکوزیا و جمیەرە جەماوەریەکەیش بنیۆرە و ئانەچە زادەو  یەرێ قۆناخان کە وێش دەستنیشان کەردەن.
ئاڎ جە ئەڎابییەی وێش بە ۳ قۆناغێ وێنا کەردەن کە بە ئی جۆرە گزارەش چنە کەردەن:
یەکەم/ئەڎابییەی سرووشتی.
دووەم/ ئەرەمەرزناو پەکەکەی.
یەرەم: ژیۋای زیندانی جە ئیمرالی. 
کە هەر یەرە قۆناغەکێ کاریگەری ڕاستەوێشان سەر کوردی و پەکەکەی بییەن.
ئۆجالان، بەردەموام گەشەش بە ئاقۆناغا دان کە وێش چوون جەئەڎابییەی نامێش بەردەن.
ساڵەو ۲۰۰٥ی جە زیندانەنە نۋیستەی پڕۆژەو سیستمو کۆما جڤاکێن کوردستان (کەجەکە)ی و جە ۲۰۱۱نە نۋیستەی پڕۆژەو (ژەنۆلۆژی)ش بە جە ئەڎابیێ تەرێ ئەژمار کەردەن. کە هەردوێ پڕۆژەکێ سەرەپا پەکەکە و جمیەرو ئازادی کوردی و گلێرگەو کوردەواریشان فاڕا و دەربازو قۆناغێوتەری مێژووییش کەردێ.

ڕێبەر ئاپۆ و پەکەکە دلێ سەرجەم سەرکردە و جمیەرە کوردەکانە تاکە ڕابەر و پارت بیێنێ کە گرنگیشان بە ژەنێ دان و تەنیا ڕاو ڕزگاری کوردی و گەلە چێردەستەکان و گلێرگەیشان جە ئازادی ژەنێنە ۋینان. بە جۆرێ کە خەبات و کۆشاییشی ئازادیشانە ژەنی کوردەشان یاونا بە ئاستێ کە جە گردو جیهانیەنە بە شانازیەوە باسش بکریۆنە و ژەنی کوردی ببۆنە بە ئلگو و سمبول و نمونە پەی ژەنانو جیهانی. ئۆجالان ژەنیش جە (تاتە، برا، پیا و نێر)سالاری و چێردەسی گلێرگەی ٥ هەزار ساڵەی ڕزگارە کەردە و متمانە و ئیرادە و پایە و کەسایەتیی وێش جە گلێرگەنە پنە بەخشاوە. ژەنیش جە کەسێ پەراۋێز ۋزیێۋە و ئیرادە مەڕیاوە کەردەشەوە بە ئاکتۆرێ و ڕۆڵگێڵێ سەرەکییە جە گردو بوارەکان ژیۋای و کۆمەڵگەیەنە. کارێش کەرد، جە خەبات و کۆشایەنە ژەنی ئیتر نەک پەراۋێز ۋزیا نەبۆنە، بەڵکو ببۆنە پێشەنگە.
 
درێژە جە بەشی دوەمینەنە بوانەوە...