پەکەکە ئەرەیاوناش، یۊ جە سەرمەشقەکاو جمیەروو ئازاڎی و کۊشیای گەریلایی "فازیل بۊتان" گەشمەرڎە بییەن. پەکەکە ئەرەیاونایچش: "ئێمە پێسە هامڕایۍ یاڎش کەرمێوە، کە گرڎوو خانەکاو جەسەیش پێوەسۍ ڕاسیی ڕابەرایەتی، کۊشیای، جەنگوو گەریلای و پەکەکەی بێنێ".
کۊمیتەو ناوەنڎیی پەکەکەی بۊنەو گەشمەرڎەبییەی "فازیل بۊتان"یوە ئەرەیاوناێش وەڵا کەرڎۊ و دلێشنە ئامان، "فازیل بۊتان جە ساڵەو ١٩٨٨ینە بەشڎاریی جمیەروو ئازاڎی بییەن، جە ساڵەو ٢٠١٢ینە جە بەرەو وەڵی جەنگیوو دژوو داعشیوە بییەن، جە ساڵەو ٢٠١٥ینە برینڎار بییەن، پەی وەشبیەیۊ ڕوانەو ئەورووپای کریان و جە ١٥و حوزەیرانوو ٢٠٢٢ ێنە گەشمەرڎە بییەن.
دەورۍ گەورەش جە وەڵێوەبەرڎەی سوپاو گەریلاینە بییەن
گەشمەرڎەی گەورەما "فازیل بۊتان" دماو بەشڎاربییەیش پەی دلۍ ڕیزەکاو حیزبی، بە یۊ بە یۊ خانەکاو لەشیشۊ پێوەسوو ڕاسیی ڕێبەرایەتی، کۊشیای، جەنگیی گەریلای و حیزبەکەیما بییەن. گرڎ یەسۍ خاکوو کوردسانینە گەریلاییش کەرڎەن. پێسە فەرمانڎێوە وەرپەرسی هەرمانەکێش بەسەرکەوتەییوە کەرڎێنۍ، وەڵێکەوتەی گەورەش خولقنان. بە چەنەئامای وێش دەورێوە گەورەش جە وەڵێوەبەرڎەی سوپاو گەریلاینە بییەن. بە تاکتیکە بێهامتایەکاش گورزی قورسش وەنەو دوژمنی دان و تا دمایی پا فشار و کۊیلایەتییە بارۊ، کە سەڎان ساڵێن سەروو گەلوو کوردی و گەلاو وەرکەوتوو دلێڕاسەیرە سەپیان.
گابار-نە گورزی قورسش شانا ئۊو دوژمنی
هامڕا "فازیل بۊتان" ساڵەو ١٩٦٨ینە جە دامنەو کەشوو جودی-نە جە بۊتان-نە دلۍ عەشرەتوو گێتە-ینە پەیڎا بییەن. فەرمانڎەی بەهەیبەت و شکۊمەنڎ هامڕا فازیل بە پەیوەنڎیی قووڵی کۊمەڵایەتی، جوانی و پاکی، بە هۊشمەنڎی وەڵاتپارێزنیی قووڵۊ، ڕێبازوو حیزبەکەیماش قبووڵ کەرد و جە ساڵەو ١٩٨٨ ینە بۊتاننە بەشڎاروو ڕیزەکاو گەریلای بی. ماوەو ٢ ساڵا جە جودینە مەنۊ. بە ئەزموونی فرە و توانایی فرەوە جە ساڵەو ١٩٩٠ینە گابارنە گورزی قورسش ئۊو دوژمنی شانا، جە ئەرەمەرزنای هێزە گێڵیایەکانە بی بە سەرمەشق.
ساڵەو ١٩٩٣ێنە پەی کامڵتەرکەرڎەی تواناو کرڎارییە سەربازییەکاش، پەی پەروەرڎەی ئایدۊلۊژی و تیۊری لوا پەی مەیڎانوو ڕابەرایەتی.
جە ساڵەو ١٩٩٤ینە چەنی هامڕا گەشمەرڎە "ساکینە جانسز"ۍ و "ئەڤین گۊیی"یۍ بەستانە فەرمانڎەیی هێزەگێڵیایەکا کەرێنۍ. چا ساڵانە گورزی فرە گەورە و کاریگەر دێنۍ دوژمنی.
ساڵەو ١٩٩٧ی جارێوە تەر لوا پەی مەیڎانوو مدرامانوو ڕابەرایەتی و هاموەخت چەنی پەروەرڎەی ئایدۊلۊژی، قورساییش وست سەروو قوڵبییەیۊی تەمامەتی.
جە ساڵەو ١٩٩٨ینە جە مدرامانوو کاتۊ ژیرکای و شاخێ-نە فەرمانڎەیی گەریلایش کەرد. دلۍ گەریلاینە و هەم جە دلۍ خەڵکینە پێسە فەرمانڎێوە نموونەیی پەکەکەی ئشناسیۍ و نامییە بیەبۍ. وەشەویسوو گەلی و گەریلای بۍ، جەنگ و چالاکییەکانە بیەبۍ بە نموونێوە پەڕ جە ورەی و ئازایەتی پەی گەلەکەیما.
دماو کێشیایۊ پەی ماوێوە بۊتاننە مەنۊ، ساڵەو ٢٠٠٠ینە قەنڎیل و خواکورک-نە فەرمانڎەیی کەرۍ.
بە دەسپەنەکەرڎەیی هەڵمەتەو ١وو حوزەیرانوو ٢٠٠٤ی بۊتاننە بی بە فەرمانڎە و جە ئاستی ستراتیژینە هەرمانەکاو ویش خاس پۊڕنۍ. هجوومەکاو دەوڵەتوو تورکینە پەی سەروو زاپی، هامڕا فازیل پێسە فەرمانڎەو بەرەی بەشڎارییش جەنگەکەنە کەرد. بەرەو زاپینە بە تاکتیک و ستراتیژوو وێش جە ساڵەو ٢٠٠٨ینە ماوەو جەنگی ٩ ڕوەینە سەرکەوتەی گەورەش بەدەس ئارد، جە ماڕای سوپاو تورکینە دەورێوە سەرەکی و گرنگش جە زاپ-نە گێڵنا.
جە وەشکەرڎەی و پارێزنای هەرێمەکاو پارێزنای مەدیاینە دەوری سەرەکییش گێڵنا.
دماو ئانەی بی بە ئەنڎاموو دەسەو ڕاوەبەریی قەرارگەو ناوەنڎی و دەسەو فەرمانڎەیی هەپەگەی، هەرمانەکاش قەنڎیل-نە پۊڕنۍ.
ساڵەو ٢٠١٢ێنە پەی وەرگێریی هجوومەکاو داعشی پەی سەروو وەرنیشتی بەشڎاریی جەنگوو دژوو داعشیش کەرد.
ساڵەو ٢٠١٥ینە وەختوو مەبارەککەرڎەی نەورۊزی مەبارەکینە بەسەختی برینڎار بی و پەی خاسبییەیۊش یاویا ئەورووپا، وەلێم بەداخۊ جە ١٥و حوزەیراوو ٢٠٢٢ینە لوا ڕیزوو کارەوانوو گەشمەرڎە نەمرەکاماوە.
بەدڵنیاییەوە ڕاش وەرە مەڎەیمۍ و پەشتیوانی جە ئامانجەکاش کەرمێ
حیزبەکەما ٢١وو ئازاری ڕۊو چالاکیی گەورەو فیداییانەو هامڕا "مەزڵوم دۊغان" کاوەی هامچەرخی تا ٢٨وو ئازاری ڕۊو گەشمەرڎەبییەی فەرمانڎەی گەورەو گەریلای هامڕا "مەعسوم کورکماز"ی بە حەفتەو قارەمانی ئشناسان و مەبارەکش کەرۊ. چی حەفتەنە ئێمە شەهادەتوو فەرمانڎەی گەورە و ئەنڎاموو کۊمیتەی ناوەنڎیی حیزبەکەیمان هامڕا "فازیل بۊتان"ی ئەرەیاونمۍ. هاموەخت قەراروو ئانەیە مدەیمۍ، کە بە پاگێرتەیرەیۊ وێما بە ساعیبوو ئامانجەکاش مزانمۍ. جارێوە تەر ئەوەخواش کەرمێوە، ئا قەسەمە شەرەفمەنڎانە کە دێنێما پەنە، حەرگیز مەوزمێش. بە پاو قەرارەکەیما بیمۍ بە شمشێرەی تیژەو هەقسانایۊ "مەزڵوم دۊغان، مەعسوم کۊرکماز، هامڕا فازیل"ی و گرڎوو گەشمەرڎای تەری، ئێمە قەرارەکەیما بەرمۍ سەر و جارێوە تەر ئینەی بە گەلەکەیما و گەلاو دنیۍ مدەیمێ".
س.ز
