پەرلەمانتاروو سویسرای جیان تشۆپ ئاماژەش پانەی کەرد کە گۆشەگیری ئیمرالی بە هیچ نەوعۍ یاسایی نییا و ئەرەیاۋناش پەرلەمانوو سویسرای و ئەنداماو سی پی تی پێویسا دەموو دەس سەبارەڎ بە گۊشەگیری ئیمڕاڵی هەنگامە هۊرگێرا.
ئاژەو ترسناکوو پنەنەیاوای زانیاری جە ڕابەروو گەلوو کوردی عەبدوڵا ئۆجالانی کە ماوەو ٢٥ ساڵان ئینا چېروو گۆشەگیریی قورسینە، ماوەو ٣ ساڵان بەردەواما. کۆمیتەو ڕاگێرتەی جە ئەشکەنجەی ئەوروپی (CPT) کە متاوۆ بلۆ ئیمرالی، بە هەڵوێسوو ۋێش سیستموو ئەشکەنجەدای ئیمرالی زیاڎ کەرۆ.
جە لېوەتەرۆ کەمپینوو "ئازاڎیی پەی عەبدوڵڵا ئۆجالانی، چارەسەری سیاسی پەی قۊرتەو کوردی" بەردەواما، کە جە ١٠/١٠/٢٠٢٣ ێوە سەروو ئاستوو جەهانی دەسشپنەکەرد. جگە چانەیچە ئا جمیەرە ڕۆ دماو ڕۆی جە بەشە جیاجیاکاو گلېرگەینە تەشەنە مکەرۆ و توڕەیی ۋەرا ۋەر بە گۆشەگیری ئیمرالی زیاتەر بۆ.
یۆ چا کەسا کە ناڕەزایەتیش ۋەرا ۋەر بە گۆشەگیری ئیمڕاڵی بەربڕی ، داواو چارەسەری سیاسی کێشەو کوردیش کەرد سیاونوسێوەش جە بارەو گۆشەگیری ئیمراڵیوە پێشکەش بە پەرلەمانوو سویسرای کەردەن و ئیمزاش پەی دمایی ئاردەی بە گۆشەگیری کەردەن، پارێزنەر و یاساشناس جیان تشۆپا کە ئەنداما جە پارتوو سۆسیالیست فیدراڵی سویسرای.
تشۆپ ڕەخنەش جە هەڵوێسوو سی پی تی جە بارەو گۆشەگیری ئیمراڵیوە گێرت و واتش: سویسرا کە ئەنداما جە سی پی تینە، هەنگامە بنیۆ، وە جە دادگاو مافەکاو مرۆڤوو ئەوروپاینە(DMME) پەیوەس بە زینڎانیا کوردی، زانیاری هۊرگێرۆ، ئی مژاریچە جە تەرەفوو چنڎین ئەرەمەرزیاوە بیەن بە ڕۆژەڤ. حەرپاسە پەنەوازەن سویسرا بە هەمان بەهانۍ هەڵوێسش بۆ چا ئاژەیە کە تورکیانە گوزەر کەرۆ. ماوەکا وەڵینینە (DMME) جە بارەو ئاژەو دەمیرتاشیوە تورکیاش شەرمەزار کەرد. (DMME) ماچۆ جە دیموکراسینە مەبۆ فرەدەنگی ئاستەنگکریۆ و ڕەخنە جە ڕاو جاکا تورکیای ۋەرا ۋەر بە ئۆپۆزسیۆنی سیاسینە مگێرۆ. هەڵبەت قەرارەکۍ (DMME) پەیوەندیدارێنۍ بە ئاژەو گرڎوو زینڎانیاوە."
'جە چارەسەرکەردەی پرسوو کوردینە ئۆجالان کاریگەرتەرین کارەکتەرا'
جیان تشۆپ ئاماژەش پانەی کەرد ڕابەروو گەلوو کوردی عەبدوڵا ئۆجالان جە مژاروو چارەسەری پرسوو کوردینە کاریگەرتەرین کارەکتەرا و واتش: "وەڵتەر ئۆجالان جە مژاروو چارەسەری پرسەکاو کوردینە دلۍ گفتووگۆیەکانە دەورێوە گۊرەش گێڵنا. گۆشەگیری ئیمراڵی ئانەی بەر وزۆ کە تورکیا ویستوو ئانەیش نیا کە گفتووگۆ بکەرۆ. ئی گۆشەگیرییە نیشاندەروو ئا چێوانە کە ۋەرنیشتەنە پێک مەیا. کارەکۍ دەوڵەتوو تورکی هەڵوێسێوەن یاگۍ قبوڵکەردەی نیا. پێویسا دەوڵەتوو تورکی ئا ڕەخنۆۍ کە ئاڕاسەش کریا بە جدی هۊرشا گێرۆ و سەروو مژاروو چارەسەری پرسوو کوردی ڕشد بۆوە."
'سویسرا متاوۆ دەوروو میانجیکەری گێڵنۆ'
جیان تشۆپ کاریگەرییە خراپەکۍ پەیماننامەو لۆزانیش سەروو گەلوو کوردی و کوردسانی یاڎ ئاردۍ و جە بەردەوامی قسەکاشەنە ئاماژەش پانەی کەرد: "سویسرا جە چارەسەرکەردەی پرسوو کوردینە ۋەرپرسیارا. سویسرا کە وەڵینێوەش جە نیازپاکی و میانجیکەردەینە هەن، متاوۆ جە پرسوو چارەسەرییەکا کوردینە دەور گێڵنۆ و دەوروو میانجیکەردەی و نزیککەردەیۆ لایەنەکا گێڵنۆ."
