پەروین بوڵدانە سەبارەت بە قەرارەکا کۆنگرەو پەکەکەی چنی ئاژانسو مێزۆپۆتامیای  قسێس کەردێ و ئەرەیاوناش: "ڕووەدایێ تاریخییا. بە ماناو دمای ئاردەی بە جەنگی جە تورکیانە و سەرەتاو سەردەمو دیموکراتیکبییەین. ئینە قۆناغو دیموکراتیکبییەو تورکیاین. کاتو ئانەین ئەوەکۆشای چنین ساڵەو گەلوو کوردی بە ئاشتی تاجدار کریۆنە."

'دەورو ئێژا ئۆجالانی گرنگ و کاریگەرا'

جە بەردەوامی قسەکاشەنە پەروین بوڵدانە واتش: "ئیتر مشۆم گرڏ لایێ ئەرک و وەرپرسیارێتی وێشا گێرانە ئەستۆ، پەکەکە قەرارو وێش دان  و لوان دلێ قۆناغێوە تەری. پۆکەی چی قۆناغەنە ئەرک و وەرپرسیارێتی گنۆنە سەر و شانو گرڏ کەسێ. مشۆم گرڏ کەسێ ئەرکو وێش جابەجێ بکەرۆ. بێگومان مشۆم ئیژا ئۆجالان چی بەینەنە دەورو وێش گێڵنۆ. چونکە جە بنیات نیاو سیاسەتو دیموکراتیکینە دەورو ئێژا ئۆجالانی فرە گرنگ و گۆرەن. پۆکەی مشۆم دیدارەکێ بەردەوامێ بانە، هەرپاسە هەلومەرجو ئێژا ئۆجالانی خاستەر کریۆنە و سەر ونەدای پەی ئیمرالی و گفتوگۆو ئاشتی چنی ئێژا ئۆجالانی دەس پنەکەریۆنە."

پەروین بوڵدانە جە دما دماینە داواش جە پەرلەمانی کەرد دەورو وێش گێڵنۆنە و ئەرەیاوناش:

"بێگومان مشۆم پەرلەمان دەورو وێش گێڵنۆنە. چی ڕوانگۆ بڕێ ئەرک و وەرپرسیارێتی گنۆنە ئەستۆو پەرلەمانی. بەرکەردە و هەموارکەردەیۆ چنین یاسایا... من ئینشا جە چوارچێوەو دیموکراتیکبییەی باس مکەرو. وەرو ئانەی جە تورکیانە بێ مافی و ناداپەروەریێ فرە هەن و جە دژو گرڏ بەشەکا گلێرگەی ئەنجام دریان. ئەر چی بێ هیوا نییەنا بەڵام پەنەوازیش بەکاتی هەن. پەنەوازا جە ماوێوە کوڵەنە گرڏ و کەس و لایەنێ وەرپرسیارێتی وێش جە ئەستۆ گێرۆنە."