چیدەم کلچگون ئوچارە هامسەرۆکەو پارتو هەرێمە دیموکراتیکەکا (دەبەپە)ی جە گلێرۆبییەیۆ "ئازادی پەی ئاشتی" جە ئامەدەنە کە بەهەزاران کەسێ بەشدارییشا دلێنە کەرد قسێش کەردێ و ئەرەیاوناش؛ ئانێ پنەشا چانەن بە تیرۆرکەردەو عەزیز کۆیلوئۆغڵو ئەوەکۆشای دمایش مێ، پەنەوازا زانانە کە بەهەزاران نازمێ، جیهانێ و عەزیزیێ درێژە بە ڕێگێشا مڏانە.

چیدم کلچگون ئوچارە جە گلێرۆبییەکەینە ئانەش وات؛ "کاتو ئانەین باس جە سەختی و ئیسفادەکا ئاشتی بکەرمه. ئاشتی بریتییا جە بنیاتنیاو ئایندێوە دیموکراتیک و پێوەرە ژیوای. ئەوەکۆشای بەساڵانە پەی پارێزناو شوناسی، زوانو، بڕوا و ئازادی کە جە جەهانەنە نموونەن. پەی ئانەی ژەنی جە نیشتمانەکەمانە نەکوشیا، کرێکارێ دمای بە ژیوای وێشا نارانە و زاڕۆڵێ جە کوردەسان و جەهانەنە نەکوشیا، پەنەوازا دیموکراسی، ئاشتی و دادپەروەری جە وڵاتەکەمانە بنیات نریۆنە. عەبدوڵا ئۆجالان  ٢٦ ساڵێن جەدژو گۆشەگیری ئیمرالی مڏرامان مکەرۆ. گەلوو کوردی و تورکیا و وەرکەوتوو دلێڕاسەی دەورو ویرۆکەکا عەبدوڵا ئۆجالانی گلێرێ بیێنێ. پەنەوازا گۆش چا کەسا گیریۆنە کە داواو ئاشتی مکەرا و پەی ئانەی هەرمانەش پەی کەرا. ئارۆ ۆو بێدەنگ بییەی نییا.

ئێژا ئۆجالان ئەرەیاوناش کە پەی چارەسەری هەر ئامادەکاریێ پەنەواز بۆنە ئەنجامش مڏۆ. بەیدێ جە ١٥و شوباتینە مافو هیوای پێک بارمێنە و ئا ئاشتیەیی کە گەلا وەرکەوتوو دلێڕاسەی تامەزرۆشەنێ بنیاتش بنییەیمێ. پەنەوازا هەرکەسێ گۆش جە گەلوو کوردی و مافەکاش گێرۆنە. بەیدێ با پێوەرە سەدێوە تازە بە ئاشتی بنیات بنییەیمێ. ئیسە کاتو ئانەین ئێژا عەبدوڵا ئۆجالان ئازاد کریۆنە. بە ڕێزدارییۆ ئەوەکۆشایتا موبارەک مکەرو. هەرپاسە ئا مۆدێلەی جە وەرنیشتەنە جابەجێکریان، بییەن بە ڕۆشنای پەی گرڏو جەهانی. پۆکەی پەنەوازا چارەسەرو دیموکراتیکی جە تورکیانە چنی ستاتۆو وەرنیشتی ناکۆک نەبۆنە."