ئەگەر بەقۆلۇ حکومەتی ۱.۳٥۰۰۰۰ یەک ملوێن و یەرە سەڎۇ پەنجا هەزار مەعاش ۋەرێش با و ڕێژەو فرەینەیش هۆربگێرمۍ کە نزیک بە ملوێنێوە مەعاشەکەش بۆ پەی هەر مەعاش ۋەرۍ ۲٥۰۰ دووۍ هەزارۍ و پەنسەڎ دینارۍ هۆربگیریۆ کەرۆنە ۳.۳۷٥۰۰۰.۰۰۰ یەرۍ ملیارۍ و یەرە سەڎ و حەفتاوپەنج ملوێنێ پەی یەک مانگی، پەی ساڵێوەیچ کەرۆنە ٤۰.٥۰۰.۰۰۰.۰۰۰ چل ملیارۍ و پەنسەڎ  ملوێن دینارێ، کە پەی کیسەو حکومەتی نییاو پەی چن بازرگانێوە بێویژدانیا.

*نەبیەی متمانەی بە حکومەتی پاسشە کەردەن بەشێوە فرەو مەعاش ۋەرا  پرۆژەو (هەژمارۇ من)ی ڕەڎ بکەراوە چونکی ماوەو ۳۳ ساڵانە نەتاوانشا متمانەی ئابوری لاو هامووڵاتیاوە وەش بکەرا، هەرچیێشا کەردەبۆ جە چوارچێوەو بازرگانینە بیەن سەرۇ حساب و هامووڵاتیا بەڵگەیچ پەی ئانەی کۆشک و تەلار و کەیف و سەفاو وەشگوزەرانی ژیۋایشانە.

*پرۆژەکە هین و کۆمپانیاین نەک حکومەتی هامشێوەو کۆمپانیاکاو دەمامکۇ سەردەم و کۆرۆنای و شیشا و ئاسنی و چیمەنتۆی..!

پرسارە جەوهەریەکۍ ئانېنە پەی چی حکومەتی هەرمانڕاییکەر پۆکەی مەواچۇ تەنیا پەدەکە، چونکی

 بێدەنگی تەمامۇ لایەنەکا بە ڕسمی نیشانۍ ڕازیبیەین پەی چی گەرەکشانە سەپنانەش؟ 

بە پەیلوواو من نەوتە و سامان و ۋنەو هامووڵاتیا ئی هەرێمەیە چۆڕێش مەنەنۆ پۆکەی چەسپناو ئا هەژمارەیە سەرۇ مەعاش ۋەرارە عالتەرین کەسابەتا.

پۆکەی قەرارە دروسەکە ئانەنە ڕەڎ بکریۆوە چونکی هامشێوەو کۆمپانیکاو عادل موتەحیدەی و برایم تاتڵیسازی و چنانی تەری بۆنە بە بڵقەو سەرۇ ئاوۍ

ئینە تەنیا بەشێوەشا ئیتر وردەکاری مانگانەو ئاوۍ و کارەبۍو غەرامە و سەرانەکا پەی وەختېوە تەری، پەی ئیفلاسبیەیچش با چەولاوە مردۆ  کە سیناریۆکێش فرێنۍ...