دەسوەڵێوزو گەلی هەرێو سەرنیشت و وەرکەوتو سوریاینە ٩و شوباتی ڕاو کۆنفڕانسێوی ڕۆنامەوانییوە شارو قامیشلۆینە هەڵمەتەو کۆکەردەیۆ ئیمزایاش دەس پەنە کەردێبێ. چوارچوەو هەڵمەتەکێنە هەرێمو سەرنیشت و وەرکەوتی سوریا، حەلەب، شام، حەما، حومس، لازقیە، سویدا، قونەیتەرە، سەلامیە و تەرتوسینە کوێ کریێوە.

دەسوەڵێوزو گەلی  هەرێمو سەرنیشت و وەرکەوتو سوریاینە ئارۆ کۆنفڕانسێوی ڕۆنامەوانیینە ئەنجامەکاو هەڵمەتەکێش ئاشکرێ کەردێ. کۆنفرانسەکە مەیدانو گەشمەرداو ١٢و ئادارو قامیشلۆینە ساز کریا و لاو ئەندامو دەسوەڵێوزیەکەی ئاینور پاشایۆ ئەرەیاونایەکە ونیاوە.

ئەرەیاونایەکەنە ئانە ویر وزیاوە، کە هەڵمەتەو کۆکەردەیۆ ئیمزایا پەی ئازاڎیی عەبدوڵا ئۆجالانی ٩و شوباتی وەڵینی دەسش پەنە کەرد و ٤و نیسانینە کە ڕۆو پەیدابییەی ڕابەرو گەلو کوردی عەبدوڵا ئۆجالانین دماییش ئاما.

ئەرەیاونایەکەنە ئانەیچ وزیان ڕووە، کە گەلو سوریای بە گردو نەتەوە، ئاین و بەشەکاشەوە و چا وەختنە ڕۆو پەیدابییەی ڕابەرو گەلو کوردی عەبدوڵا ئۆجالانیشا مەبارەک کەرد و داواکارییەکەشا ئیمزا کەرد و پینەیچە پەیامێوەشا ئاراسەو هێزە پیلانگێڵنەکا کەرد. هەرپاسە ئەرەیاونیا کە ئا پەیامە هەمان وەختنە ئاستو وەشەسیای، پەشتیوانی، بڕوامەندبییەی بە فەلسەفەو ڕابەرو گەلو کوردی عەبدوڵا ئۆجالانی و پاگێرتەیرە گەلین سەرو دەسەبەرکەردەی ئازاڎیی عەبدوڵا ئۆجالانی.

درێژەو ئەرەیاونایەکەینە ئامان، کە هەڵمەتەکێ جە هەرێمەکاو سەرنیشت و وەرکەوتو سوریاینە بە شێوێوی وەرفراوان دەسش پەنە کەردەن و شارەکاو پێسەو دیمەشق، حەڵەب، سەلامیە، حومس، حەما، سویدا، لازقیە و قونەیتەرەینە وەڵا بیێنۆ. ئانەیچ بەروزیان کە وەرفراوانبییەی هەڵمەتەکێ ئاستو لکەدریای سەرجەمو نەتەوە، ئایینەکا و بەشەکاو گلێرگەی بە فەلسەفەو ڕابەرو گەلو کوردی عەبدوڵا ئۆجالانیش سەلەمنان و ئانەیچ  وزیان ڕووە، "فەلسەفەو ڕابەر عەبدوڵا ئۆجالانی، پەی سەرجەمو ئاڵۆزییەکا و کەردەیۆ لکەکۆرەکا وەرکەوتو دلێڕاسەینە بەتایبەتی سوریانە ڕاچارەن".

ئەرەیاونایەکەنە ئامان، "بۆنەو بڕوابیەیما بە گرنگیی دەورو ئەنجوومەنو یۆبییەی ئەورووپای، ڕێکوزیا میاننەتەوەییەکاو مافەکاو ئینسانی جە چارەسەرکەردەی دۆسیەو ڕابەر ئۆجالانی و دەسەبەرکەردەی ئازاڎیی جەسەییشنە  ئێمە داواشا وەنە مکەرمێ، کە دەوری کارا بگێڵنا و ئیرادە و داواکاریی سەرجەمو گەلا، کە بڕواشا پا دۆزەیە هەنە، وەرچەم بگێران".

ئەنجامو کۆکەردەیۆ ئیمازاکا ئینەن:  

منبج: ٧١١،١٨٠

رەقا: ٧٠١،٨٤٥

قامیشلۆ: ٦٢٥،٣٤٣

حەسەکە: ٦٠٣،٨٠٠

دێرەزور: ٣٣٧،٧٠٠

تەبقا: ٢٨١،٣٣٢

فورات: ١٣٤،٥٧٠

حەڵەب: ١٠٣،٨٥٧

عەفرین و شەهبا: ٥١،٢١٢

دلێ سوریای: دیمەشق، حەڵەب، لازقیە، سوەیدا، قونەیتەرە، سەلامیە، تەرتوس، حەما، حومس: ٦،٢٤٣

کۆچبەراو کوردی  لوبناننە: ١٢،٠٠٠

هێزەکاو پارێزنای کۆمەڵایەتی: ١٠٠،٠٠٠

کۆی گردینو ئیمزایەکا: ٣ ملوێنێ و ٦٦٩ هەزارێ و ٩٠ ئیمزێ

ئاخروو ئەرەیاونایەکەینە سپاسو گردو ئانیشا کریان، کە بەشدارییشا هەڵمەتەکێنە کەردەن و داواکارییەکەشا ئیمزا کەردەن.