ورسەنگنایەکاو ڕابەرو گەلو کوردی عەبدوڵا ئۆجالانی، کە ساڵانی وەڵیننە نەورۆزی شکۆدارو ئامەدینە ونیێبێنیوە، نەورۆزو ئێساڵینە ونیێنوە و زیاتەر جە یەک ملوێن کەسا بە واتەیۆ دروشما خێرامایشا وەنەو پەیامەکەی کەرد.
مەبارەکبایی نەورۆزی ئامەدنە بە دروشمو "ئەرەپڕدێ، وەختو ئازادی و سەرکەوتەین" بەردەواما. مەراسیمەکەنە پەیامو ڕابەرو گەلو کوردی عەبدوڵا ئۆجالانی کە ساڵانی ویەردەنە ئاراستەو مەراسیمەکاو نەورۆزی کریابێ، ونیاوە. هامسەرۆکو کۆنگرەو دیموکراتیکو گەلا (هەدەکە)، جەنگیز چیچەک پەیامەکەش واناوە:
پەیامەکەو ڕابەرو گەلو کوردی ئینەنە:
"نەورۆز ئازادیین، ئینە ڕاو ئازادیینە.
سڵام چا کەسا کە ڕای گەورێ ئازادی و یەکسانییشا گێرتێنەرە وەر.
سڵام جە گەلو کوردی کە یۆن جە گەلە دێرینەکاو ئی خاکەیە، نەورۆزش مانادار کەردەن و بنارو کەشەکاو زاگرۆس و تۆروسیوە تا دۆڵەو بەحرو دیجلەی و فوراتینە؛ خاکە مەبارەکەکاو میزۆپۆتامیای و ئەنادۆڵێوە تا شارستانیەتو کشتوکاڵی، ئەدایەتییش پەی دەگا و شارەکا کەردەن.
گەلو کورد و گەلە واڵە و برێکێش هەزاران ساڵێن دلێو ئی شارستانیەتە مەزنەینە بە نەژاد و ئایین و مەزهەبی جیاوازەوە ژیوێنێ. هەوڵێ دریێنێ بە فشاری سیاسی، دەسوستەینە بەری و باڵادەسکەردەی بەرژەوەندیی گرووپگەلێوە، ئا شارستانییەتە گەورەیە و گەلا پێوە بکەرانە دوژمنێ و سیستمگەلێوە بنیات بنیانێ، بێ ئانەیە کە ماف و یەکسانی و ئازادی بە بنەما گیریۆ.
جە دووەسەد ساڵی ویەردەنە بە ئەرەگیرکاری و دەسوستەینەی بەری و فشاری و وەڵێوستەی سیاسەتو نکۆڵیکەردەی و حاکمکەردەی دەسەڵاتگەلی چەوسنەری، ئیمپریالیزمی وەرنیشتی و هەوڵێش دێنێ، کە گەلاو عەرەب، تورک، کورد و فارس، بە سنووری دەسکەرد و بە وەشکەرەی کێشەگەلێ ساختێ و دەوڵەت-نەتەوەی گولانە گولانێ، سەرقاڵ بکەرانێ و ڕووبەڕوو یۆترینیشا بکەرانێوە.
سیاسەتو فشاری و دلێنەبەردەی و چەوسنایوە، کە سەرو مۆدێرنیتەی سەرمایەداریی سەدەی وەڵینیوە ئەرەمەرزیێنێ؛ گوزارشت جە هەوڵەکاو دەسەچنو دەسەڵاتی مکەرۆ، کە نکۆڵی مکەرۆ جە تەمامو تارێخوو یاساو واڵە و براڵەیی. بنیاتنیای جوگرافیای ئیتنیکی و نەتەوەیی بەرهەمو ئامانجەکاو مۆدێرنیتەی سەرمایەداریی نائینسانانەینێ، کە نکۆڵی جە بنەچە و جەوهەریما مکەرۆ.
گەلاو وەرکەوتو دلێڕاسەی و ئاسیاو دلێڕاسەی ناوینی ئیتر هۆشیاری باوە. مگێڵاوە پەی وێشا و بنەچەیشا. پەی مەرزنایرەی سیستمێوە مۆدێرنیتەی ئەڵتەرناتیڤی و دیموکراتیکی گێڵا، کە بناغەکەش جە جەوهەری تاریخیی هەقەتینوو وێشانە هەن. ئیتر گەرەکشا سەروو ڕیشەو وێشۆ بژیوۆوە، شان بە شانەو یۆترینی گنا سەروو پایا.
ئیتر وەختو شکسو ڕژێمە چەوسنەرەکا و زیهنیەتە فشارکەر و یەکپەرسەکان.
یاگێ "ئێمە" دلێ تارێخوو ئا خاکانە مانێوە گرنگە و فراوانەش هەنە. بەڵام دەسەڵاتدارێ ئی یاگێشا وەرتەسکە کەردینۆ و پەی "یۆی" گولانێشا کەردێنۆ، ئیساتێ وەختوو ئانەیە ئامان ڕۆح و پراکتیکی وەڵینی بدەیمێوە بە یاگێ "ئێمە".
ئێمە دەیان ساڵێما تەرخانێ کەردێ تەنیا پەی سەلەمنای بییەی گەلوو کوردی، کە بە نامێ یەکپەرسییوە حسابیش پەی نەکریان. گرد فیداکاری و کۆشیایەکێ پەی ئینەیە بێهوودێ نەبینێ. گەلو کوردی جارێوە تەر خاوەنداری جە جەوهەر و شناسنامەو وێش کەرد. پارادایمو مۆدێرنیتەی کە حساب نمەکەرۆ و نکۆڵی و جیاکاری مکەرۆ، سەرەوچێر بییەن.
تا پێوە جە گەمارۆو ستەمی بەربشمێ، کە خاس مزانمێ دژو یاساو واڵە و براڵەیی تارێخییمانە، داوا مکەروو وەرکەوتو دلێڕاسەی سەرو بناغەو جەوهەر و شارستانییەتو وێش و مۆدێرنیتەی دیموکراتیکو ئێمە ئەرەمەرزیۆ.
جەنگو ئێمە هەرگیز دژو نەژادی و ئایین و مەزهەب و گرووپێوە نەبییەن و نمەبۆ. جەنگو ئێمە دژو ستەمی و نەفامی و ناعەدالەتی ودماکەوتەیی و گرد جۆرە ستەم و چەوسنایۆێوەن. سەرەڕاو گردو غەڵەت و کەموکوڵی و غەڵەتاو سەدەی وەڵینی، ئێمە گردو گەل و چین و چاندەکا، کە تووشو کارەساتی گەورەی ئامینمێ، هامشانەو گردو قوربانییەکا هەوڵێما دێ سیستمێوە مۆدێرنیتەی دیموکراتیکی بنیات بنیەیمێ. بانگەوازو ئێمە پەی نوێنەرو گردو گەلە بندەسا و چین و چاندێوەن؛ بانگەوازو ئێمە پەی ژەنان، کە دێرینتەرین چینی چەوسیاوێ و بندەسێنێ، پەی مەزهەبە چەوسیاوەکا و گردوو بییەیە چاندییەکا، نوێنەرو کرێکارا و گردو ئا کەسا سیستەمەکەنە جیاکارییشا وەراوەرۆ کریان، گرد لاێ دەورو سیستمو مۆدێرنیتەی دیموکراتیکینە کوێ بیدێوە و تازەش بکەردێوە و زیهنیەت و فۆڕمێوە تازە دەس وزدێ.
ئەرەمەرزنای سیستمو مۆدێرنیتەی دیموکراتیکی یاگەدارا گرد یاگە و هەرێمێو و جیهانێونە، نەوەک بەس پەی گەلو کوردی، پەی گردو وەرکەوتو دلێڕاسەی و جیهانی ئازادی مارۆ. سەروو ئی بناغەیە، جەژنەو نەورۆزی وەنەو گرد کەسێوە، گرد گەلێوە مەبارەک مکەروو.
وەخت، وەختوو ئازادیین.
سڵام وەنەو ئا کەسا کە قوە پی پڕۆسەیە مبەخشانێ،
بژیوۆ نەورۆز!".
