پەیەدە وەرا وەرو هرووژمەکا پەی سەرو عەلەوییەکا ناڕەزایش نیشانەدا و ئەرەیاوناش؛ "پەنەوازا هرووژمەکا مردندۍ، چونکی ئەوەمەڼنەکێش پەی گردو سوریای قورسێ بانە و ڕەنگاتی جەنگی دلێینەش چنە گنۆوە."
مەجلیسو گردی پەیەدەی سەبارەت بە پێشئامایەکا جە هەرێمو عەلەوییەکانە جە لێوارەکا سوریای، حومس، دیمەشقی و دەگایەکا حەماینە بەیاننامێوەشا وەڵاکەردۆ.
بەیاننامەکەنە ئامان: "هیزی جە لێوارەکا سوریای و، حومس و دیمەشقی، هەرپاسە دەگایەکا حەمای کە عەشیرەتو عەلەویش چنە ئەرەنیشتێنێ، وینیشاندای کریا، ئی وینیشاندایێ دماو وەڵابییەیۆ وێنەو پاشێلکارییەکا دژو پەرەستگاو عەلەوییەکا، شێخ ئەبو عەبدوڵا ئەل حوسێن بن حەمدان ئەل خەسیبی کە جە حەڵەبەنە ڕووەشدا، دیسان جە دیجیتاڵ میدیانە وەڵابیۆ کە تەقە جە وینیشاندەرا کریان جە ئەنجامەنە زامڎارێش چنەکەوتێنێ و قەڎەغەو هاموشۆی ئەرەیاویا. هەرپاسە جە حما دارو سەرو ساڵێشا ئێردا ئێمە بە نیگەرانییۆ شۆنیرە لوای پەی ئی ڕووەدایا مکەرمێ. ئێمە هەرجۆرە پاشێلکارییێ دژو هەر بڕوا، کلتوور، ئایین و هۆز و نەتەوێوە شەرمەزار مکەرمێ. هامکات هۆشداری مڎەیمێ کە ئی پاشێلکاریۍ وڵاتەکەیما سوریای بەرەو جەنگی دلێینەی بەرۆ. ئێمە پاگیری چانەیە مکەرمۍ کە پەنەوازا هەرچی زووتەرا دمایی بە دۆخو بەشکەردەو نیشتمانی بێنە."
هەرپاسە جە ئەرەیاوناکەینە داوا جە گەلو سوریای و گردو لایەنە سیاسییەکا و ئیدارەو سیاسی جە دیمەشقەنە کریان دمایی پا پاشێلکارییا بارانە و پی جۆرە ئەرەیاویان: "چارەسەر ئانەن گەلو کەناراوەکا پەی وێشا هەرێمەکا وێشا بەرا ڕاوە. پەی ئانەی ڕاگیری جە هەر جۆرە جەنگو و گرژیێ عەشیرەتی کریۆ، گەلو ئا مەنتیقەیە مشۆم وێشا ئەمنیەتو هەرێمو وێشا پارێزنا. پەی نوویسەیۆ پەیماننامێوە کۆمەڵایەتی کە دڎان بە مافەکا گرد پێکئاماکا سووریایرە بنیا بە شوناسو نەتەوەیی، کلتووری و ئایینی، مشۆم لوجنێوە جە گردو پێکئاماکا سوریای پێکبێنە. سەرو ئی بنەمێ داوا جە گرد کەسێ مکەرمێ کە ئیدانەو ڕووەدایە عەشیرەییەکا بکەرا و دمای بە قسێ و هەڕەشەکا بارانە، ئەرنا بەرەو جەنگێوە دلێینەی ملمۍ، کە ئەوەمەڼنەکێش فرە کاولکەرۍ بانە پەی گردوو سوورییەکا، پۆکەی بانگەواز جە گردوو هێزە دیموکراتیکەکا سووریای مکەرمێ کە پێوەرە پەی مردناو ئا پاشێلکارییا هەرمانە بکەرا، چی پرۆسەو ویەردەینە پێوەرە هەرمانە بکەرا پەی ئانەی سوریای بەرەو ئارامی بەرمۍ."
