"پەیمان ڤیان"ە ئەنڎامەو کۆردیناسیۆنو گلېرگەو ژەنا ئازاڎیی ۋەرکەوتوو کورڎسانی (کەژار) ی بەبۆنەو ٤و نیسانی ڕۊو جە ئەڎابیەو "عەبدوڵلا ئۆجالان"ی ڕابەرو گەلوو کورڎی پۍ ئاژانسەکەیما (ANF)ی قسېش کەرڎۍ. "پەیام ڤیان"ە ئەرەیاۋناش؛ کە ٤و نیسانی ڕۊو رزگاری ژەنا کورڎی و گەلی ئازادیوازیا و ۋاتش،" پۊکەی ٤ و نیسانی پۍ ئێمە خۊتان مەعنېۋەن کە ژیۋایۊ گرڎو زیندەوەران."

ڕۊو ژیۋایۊ گەلوو کورڎیا'

"پەیمان ڤیان"ە ئەنڎامەو کۆردیناسیۆنی کەژاری باسو ئانەیش کەرڎ، جە راسینە ڕۊو جە ئەڎابیەو "عەبدوڵلا ئۆجالان"ی ڕابەرو گەلوو کورڎی، بە مەعناو جە ئەڎابیەو مرۆڤایەتی ئازاڎی مۍ و ۋاتش، " سەرەتا ڕۊبیەو ڕابەرایەتی جە ڕابەر ئاپۊی پیرۆز کەرمۍ، جە هەمان ۋەختەنە ئی ڕوۋەیە جە گەلوو کورڎی و ژەناو، گەلا ئازادیوازی ۋەرکەوتوو دلېڕاسەی و حەر کەسێۋە کە دڵش پۍ ئازاڎیی مرۊۋەنە پیرۆز مکەرا. بە تایبەتی ئی ڕوۋە پیرۆزەیە جە ئەڎا ئووەیشۍ و جە گرڎو ئەڎایا ئاشتی پیرۆز مکەرمۍ. حەرپاسە جە ساڵەو ٢٠٠٤ینە و جە ٤و نیسانیەنە پارتو ژیانی ئازاڎیی کوردستان (پژاک)ی جە ۋەرکەوتوو کورڎسانی ئەرەمەرزیا. سەرو ئی بناغەیە ئێمە ئەرەمەرزناو پژاکی جە گرڎو گەلو کورڎی، بە تایبەتی جە ۋەرکەوتوو کورڎسانی و ئێرانی پیرۆز مکەرمۍ. پۊکەیچ ئی ڕوۋە پۍ گەلوو ۋەرکەوتوو کورڎسانی و ئێرانی خۊتان گرنگیێۋی گۊرەن. هەم ڕوۋێۋی تاریخی و هەم ڕوۋێۋی ژیۋایۊ گرڎو گەلوو کورڎیا."

' ٤و نیسانی ڕۊو رزگاری ژەنا و گرڎو گەلا ئازاڎیوازی'

"پەیمان ڤیان"ە باسو ئانەیچش کەرڎ کە چنی ڕۊ بیەو عەبدوڵلا ئۆجالانی، ژەنۍ و گەلوو کورڎی جە ئەڎۍ بیۍ و ۋاتش،" پۍ چی ئێمە ماچمۍ ژیۋایۍ تازەن. ۋەرو ئانەی چنڎین ساڵۍ بۍ، ھجومو دلېنەبەرڎەی سەرو گەلوو کورڎی بۍ. سیستمو ئەرەگیری کە نیازش بۍ گەلو کورڎی بە گرڎ رێبازێۋە دلېنە بەرۊ، چنی جە ئەڎابیەو ڕابەر ئاپۆی، گەلوو کورڎی جارێۋیتەر بی بە خۊتان ئیراڎە و بیەی و ھجومەکۍ دلېنەبریۍ. ژەنۍ کورڎی پۍ بیەو ۋێش ئەرەکۊشایش کەرڎ، جە هەمان ۋەختەنە متاۋمۍ ۋاچمۍ کە ژەنی بیەو ۋێشا بە دەس ئارڎەن. جە ئەڎا بیەو ڕابەر ئاپۆی ڕۊشنین پۍ گەلوو کورڎی و گرڎو نەتەوەکا تەریچش جە تاریکی نەجاڎ دا. ٤و نیسانی ڕۊو رزگارکەرڎەو ژەنا کورڎی و گەلا ئازادیوازیا. پی بۊنۊ ٤و نیسانی پۍ ئێمە خۊتان مەعنېۋی پی جۊرەنە و ژیۋایۊ گرڎ زیندەوەرێۋەن. جە کەسایەتی ڕابەر ئاپۆینە کورڎ ئاماۋە سەرو جەھانی. پۊکاتی هێزە ئەرەگیر و پیلانگێڵەکۍ گەرەکشابۍ جە کەسایەتی ڕابەر ئاپۆینە گەلوو کورڎی قڕ بکەرا. گەرەکشا بۍ پی ئامانجیە هزر و فەلسەفەو ڕابەر ئاپۆی دلېنە بەرا. ئی ھجوم و کرڎەۋۍ حەتا ئارۊیچ ۋەردەوامېنۍ. ٢٥ ساڵېن جە دژوو ڕابەر ئاپۊی گۆشەگیرێۋە کە جە تاریخەنە جۊرش نەبیەن ملۊڕاۋە. جە سایەو مدرامانو ڕابەر ئاپۆی و گەلوو کورڎی، گرڎو سیاسەتە قێزەونیەکا دوژمنی پووچۍ بیېۋە. ڕابەر ئاپۆ پرۆسەو ئیمڕالی پېسە زینڎانێۋی تازەی شی مکەرۊۋە و هزرو ۋێش جە گردو جەھانیەنە ۋەڵا کەرڎۊ. جە ئەڎابیەو ڕابەر ئاپۊی پېسە ۋەرهەمۍ جە کورڎسان و تەمامو جەهانی ۋەڵا بیۋە. حەرپاسە گرڎو مرۆڤایەتی بەشو ۋێش چی ۋەرهەمو ئازاڎیە ورگېرتەن."

مەتاۋا هزر و فەلسەفەو رابەر ئاپۆی دلېنە بەرا

"پەیمان ڤیان"ە ئاماژەش بە چالاکیەکا پۍ ئازاڎیی جەستەیی رابەرو گەلوو کورڎی کەرڎ و پی جۊرە ۋەردەوامیش بە قسەکاشدا، " ئازاڎیی رابەر ئاپۊی، ئازاڎیی نەتەوەکا، ژەنا و گرڎو گەلا چێردەسەین. بە تایبەتی چی ساڵانەو دماینە مزانمۍ کە گرڎو گەلا ئیسفاڎەشا جە هزرو رابەر ئاپۊی ورگېرتەن و سەرو ئی فکرەیە ئەرەکۊشایشا کەرڎەن. حەرپاسە ئاخېزو ''ژەنی، ژیای ئازاڎیی'' کە جە ۋەرکەوتوو کورڎسانی و ئێرانی دەسش پنەکەرڎ، جارێتەر  پۍ جەهانیش ئاشکرا کەرڎ کە هزرو رابەر ئاپۆی زینڎانی مەکریۊ. چانەنە رابەر ئاپۆ جە رووی جەستەییوە جە ئیـمڕالی زینڎانی کریابۊ، بەڵام پەیلواکۍ رابەر ئاپۆی گرڎو جەهانیەنە ۋەڵۍ بیېنۍ. ئیسەیچ ئەرەگیرەکۍ جە گرڎ ۋەختۍ زیاتەر چینەی متەرسا. ۋەرو ئانەین گۆشەگیری قورس سەرو رابەر ئاپۆی بەرا ڕاۋە. ۋەرو ئانەی رابەر ئاپۆ ئەرەمەرزنەرو فەلسەفەو "' ژەنی،  ژیای، ئازاڎی''ن. پۊکەی ئیسە جە ۋەرکەوتوو کورڎسانی و ئێرانی، جە گرڎو جەهانی گرد کەسێۋە ۋێش چا فەلسەفەینە ۋینۊۋە. گرڎ کەسێۋە ژیایی ئازاڎیی چی فەلسەفەنە ۋینۊۋە. پۊکەی پێویسا ئاخېز فراوانتەر کەرمۍ. جە هەمان ۋەختەنە گەلوو کورڎی جە کورڎسان جە نەورۆزنە پەیامێۋی بەقوەتش بە هێزە ئەرەگیرەکا و خۊتانکەرڎەیشا جە رابەر ئاپۆی کەرڎ. جە ۋەرکەوتوو کورڎسانی و ئێرانی بە دروشمەو ''ژەنی،  ژیای، ئازاڎیی" خۊتانکەرڎەیش جە خەتەو رابەر ئاپۆی کەرڎ. جە نەورۆزنە پەیامێۋی گۊرەو سەرھوردای و سەرکەوتەی دریا. بە تایبەتی جە ماکۆ حەتا وەکو ئیلام بە رۆحێۋی سەرھوردای نەورۆز پیرۆزکریا و پی هەڵوێسیە ئاشکراشا کەرڎ کە گرڎ کەسۍ ئازاڎیی ۋێش جە ئازاڎیی رابەر ئاپۆینە ۋینۊۋە."

' حەتاوەکو رابەر ئاپۆ ئازاڎ نەبۊ، ئێمە ئازاڎۍ مەبیمۍ

"پەیمان ڤیان"ە ئەندامەو کۆردیناسیۆنی کەژاری جە دما دمایی قسەکاشنە چڕیەیش جە گرڎو گەلا کەرڎ و ۋاتش،" بە بۆنەو ٤و نیسانیۋە، پێویسا گرڎما کۆڵانەکا ۋەرکەوتوو کورڎسانی و ئێرانی پۍ مەیڎانو مدرامانی فاڕمۍ و پۍ ئازاڎیی رابەر ئاپۆی ئەرەکۊشایما بەرز بکەرمېۋە. ئێمە ساڵەو ٢٠٢٣ۍ بکەرمۍ بە ساڵەو ئازاڎیی جەستەیی رابەر ئاپۆی. بە ئازاڎیی رابەر ئاپۆی نەتەوە رزگار بۊ، ژەنی ئازاڎە بۊ و گرڎو مرۆڤایەتی ئازاڎ بۊ. گرڎو مەیڎانەکا بکەرمۍ بە مەیڎانو ئەرەکۊشای، بە ئەرەکۊشای ئێمە متاومۍ سەرگنمۍ. پێۋیسا گەلوو ۋەرکەوتوو کورڎسانی و ئێرانی جە ٤و نیسانیەنە هەڵۋێسېۋی رادیکال نیشانە بڎا و ئەرەکۊشای بەرزتەر بکەراۋە. جارێۋی تەر پۍ ئەرەگیرا ئاشکراش بکەرا کە بۍ ئازاڎیی رابەر ئاپۆی، ئێمە ئازاڎۍ مەبیمۍ."

ھ.ش