پژاک بە شێوێوە سەرکۆتانە حەوتەم کۆنگرەش بە دروشمەو "بە فەلسەفەو ژەنۍ، ژیۋای، ئازاڎیی کوردسانی ئازاڎ مکەرمۍ و نەتەوەی دیموکراتیکی ئەرەمەرزنمۍ" سازکەرد. ئەمیر کەریمی و پەیمان ڤیانە پێسە هامسەرۆکا تازەو پارتەکەی هۆرچنیۍ.
پارتوو ژیۋای ئازاڎیی کوردسانی (پژاک) حۆتەمین کۆنگرەو ۋێش بە دروشمەو ئێمە بە فەلسەفەو "ژەنۍ، ژیۋای، ئازاڎیی کوردسانی ئازاڎ مکەرمۍ و نەتەوەی دیموکراتیکی بنیاڎ منیەیمۍ" و بە ئاماڎەبیەو نوێنەرا گردوو بەش و پێکئامایەکا جە کەشەکا کوردسانینە بە شێوێوە سەرکۆتانە بەرد ڕاوە. جە ئەنجامنامەو کۆنگرەکەینە قەراروو، "ئازاڎیی جەستەیی پەی رابەر ئاپۆی و چارەسەری پرسوو کوردی، پێسە پلانێوە بنەڕەتیەو هەرمانکەردەی جە ماوەکا ئایندەو پارتەکەینە پەسەن کریان. حەرپاسە ئاماژە بە "ئاخێزوو ژەنۍ، ژیۋای، ئازاڎی"یچ کریان و ئانە وزیان ڕووە؛ "ژەنی، ژیۋای، ئازاڎیی فەلسەفەو بیەی و بناغەو پارادایموو کۆشیایمانە".
ئەرەیاۋناو لووایڕاوەو کۆنگرەو حەوتەموو پارتوو ژیۋای ئازاڎیی کوردسانی (پەژاک):
"پەی ڕای گردی وڵاتپارێزنی
دماو ویەرڎەی چوارساڵا سەرو کۊنگرەی ششەمو پارتو ژیوای ئازاڎو کورڎسانی (پەژاک)یرە، کۊنگرەی حەوتەمینو حیزبیما کەشە ئازاڎەکاو کورڎسانینە گێرت. پەژاک کۊنگرەی حەوتەمنە بە دروشمو " بە فەلسەفەو ژەنی، ژیوای، ئازاڎی، کورڎسانی ئازاڎ بکەرمۍ و نەتەوەی دێموکراتیک بونیاد بنیەیمێ" ئاسۊو خەباتو ئایندەیش دیاری کەرد. وەختێونە ئینایمۍ هەستیارتەرین قۊناغی تارێخییمانە و گردو کورڎسانینە کۊشیاێوی قەوەت هەن ئارانە و گەلما بە گردو هێز و توانایشەوە پەی بەڕسمی ئشناسای بییەی و شناسنامەی کولتوری و سیاسییش مدرامان مکەرۊ و هاموەخت وەرکەوتو دلێڕاسەی تووشو گێجاوێوی قووڵۍ بییەنۊ، پارتیما، کۊنگرەی حەوتەمینش گێرت. کۊنگرە بە بەشداریی نوێنەراو سەرجەمو مەیدان و بوارەکاو خەباتی و کۊشیای و بە ئامادەکاریێوی وەرفراوان و بەرنامێوی ڕێکوپێک بی بە هەنگامێوی گرینگە جە کۊشیای چند ساڵەو دماییمانە. کۊنگرە جگە یادکەرڎەیۊ و بەرزئرمانای کۊشیایی سەرجەمو گەشمەرڎا و بەتایبەت گەشمەرڎە ڕێزان، بەرخودان، سارا، ئاریەن و تۊڵهەڵدان و بە پاگێرتەیرە سەروو ڕێبازو گردوو هامڕا گەشمەرڎا کریا. کۊنگرە بە پاگێرتەیرە سەرو ڕێبازو خەباتیشا هەوڵێش دۍ پەی یاوای پا ئامانجاو ئا گەشمەرڎا پەیشا گیانشا فیدا کەرد قووڵ بۊوە و پەی ئا مەبەسەیە بەرنامێوی ڕێکوپێک بمجۊرە و پەسەندش بکەرۊ.
سووربییەی جە بەرڎەوامیی خەباتینە، پێویسیش بە ورسەنگنای هەرمانۍ و کۊشیایما، پێویسییش بە ڕەخنەی و ڕەخنەداین بە مەبەسو تازەبییەیوە و دماییئارڎەی وادەو ئەرکداری ڕاوەبەریی ورچنیەی جە کۊنگرەی وەڵینو حیزبەکەیمانە، پاسەش کەرد بە قەرارڎاری و ئیرادێوی پتەوو ورقوڵیا جە خەباتو ئا چند ساڵەیە دمای، کۊنگرە بگێرمۍ. کۊنگرە جە هەلومەرجی نالەباری ئەمنینە و چێرو فشاری و هجوومی بەرڎەوامینە، سەخت و دوژمنکارانێوی چانەنە کریا، کە جە وەختی چانەنە چەمەڕوانی هەرمانۍ ئاساییچ نەکریۍ ئاسایێچ. چوارساۍ سەرو کۊنگرەو ششەمو پارتیمارە ویەرڎەبۍ، ماوەو ئا چوارساڵەینە بە قۊناغێوی کۊشیایرە ویەرڎێبێنمۍ، کە پێویسییش بە لوایۊپۊرە و ورسەنگنای بۍ. پێویس بۍ کە کەموکوڵییەکاو ئا سەرڎەمەیە تاوتۊ بکریانۍ و جە ڕۊشنایی ئەنجامەکا قسەوباسێوی بونیادنەرنە، ڕێبازو کۊشیایی ئایندەیما دیاری بکەرمۍ. کەنارو ئا سەبەبایچنە، واوەی ڕێکوستەیوە ڕاوەبەری حیزبی پەنەوازیێوە بۍ.
هەلومەرجێوۍ هەستیاری چانەنە، پارتیما پەژاک حەوتەمین کۊنگرەش گێرت و ئانەشە کەرد بە هەنگامێوی تاریخییە، جە کۊشیایی ئازاڎیوازانەو گەلو کوردینە وەرکەوتو کورڎسانینە. کۊنگرە بە لەیکدایۊێوی قووڵ و وەرفراوان جە هەلومەرجی سیاسیی جیهانی و ناوچەیینە سەرو وەرەچەمگێرتەی سیاسەتو خەتۍ یەرەمۍ و چارەسەری دێموکراتیکو پەرسەو کوردی پا گێرێرە. هەرپاسە کۊنگرە پارێزنای و پارێزگاری جە بییەی و بەرژەوەندییەکاو گەلو کوردی و گەلاو ئێرانی پێسەو سەرتۊپو سیاسەتەکاو وێش نیارە و هاموەخت سووربییەی جە چارەسەری دێموکراتیکو پەرسەکاو ئێرانینە، جە ئەگەرو هەڕەشانە سەرو بییەی گەلیما جەختش جە ئیسفادەکەرڎەی جە مافو پارێزنای ڕەوای کەردۊ.
کۊنگرەنە بەوردی بارودۊخی سیاسی سەرڎەمی وەڵینی بە بەشداریی هامڕایاو گردو مەیدانەکاو خەباتی و بە سەرنجدای جە دۊخو گەلەکەیما گردو بەشەکاو کورڎسانینە ورسەنگییا. بارودۊخی سیاسی و خۊفناکو سەرڎەمی، دۊخو گەلیما گردو بەشەکاو کورڎسانینە، دۊخو شۊڕشی وەرکەوتو کورڎسانینە و ئێراننە و یاگۍ هێزە جەماوەرییەکا و ئەگەرەکاو وەرڎەمیما دماتەرنە قسێشا سەرۊ کریا. سەرو کرڎەوەو هێزە دژبەرەکا، بارودۊخو سەرڎەمو شۊڕشی و کارڎایوەکاو ڕژێمی واتەواچ کریا. حەرپاسە فاڕیایە هەرێمییەکۍ و بارودۊخو ڕابەر ئاپۊی جە زیندانو ئیمڕالینە و هەڵوێست و یاگۍ بەڕێزیشا وەراوەرو هێزە نکۊڵیکەرەکانە و ئا مدرامانە تارێخییە مکەراش، پێسەو بنەماو مدرامانو گەلاو یاگا و هەوڵداۍ پەی دەسوستەی ئیرادەی سەربەوۍ و وێڕاوەبەری گەلا لەیەک دریاوە. پەوکای کۊشیای بەمەبەسو ئازاڎیی جەسەیی ڕابەر ئاپۊی و پێوەسبییەی دۊخو کوردی بە دۊخو ڕابەریما پاش سەرۊ گیریارە. ئا گۊشەگیرییە زەحمەتە جە زیندانو ئیمرالیینە وەراوەرو ڕابەر ئاپۊی مکریۊ لەیەک دریاوە و ئا گۊشەگیری و هجوومۍ سەرو ڕابەریمان پێسەو هەڵوێست و ڕوانگەو ڕژێمی سیاسی ئیساتۍ وەراوەرو پەرسەو کوردیوە وینیا. ئا زەختە سەرو ڕابەریما، نموونەو زەختی و فشاری هەمەلایەنەو وەراوەرو گەلەکەیما حەر چوار بەشو کورڎسانینە. هامتەریبو ئانەیچە، مدرامان و وێگێری تارێخی ڕابەر ئاپۊی وەراوەرو فاشیسمی و تۊتالیتاریسمی، ئامیانی سەرەکیی کۊشیای گەلیما کورڎساننە و گەلاو جیهانینە. سەرو ئا بنەمۍ کۊنگرە سوور بۍ جە بەشداریێوی چالاکی کەمپینو "ئازاڎیی جەسەیینە پەی ڕابەر ئاپۊی و چارەسەرو پەرسەو کوردینە" و پێسە بەرنامێوی سەرەکی پەسەند کەرد.
حەرپاسە هەڵوێستی سیاسیی پارتیما سەرڎەمو شۊڕشو ژەنی، ژیوای، ئازاڎی و هەوڵداینە پەی وێناکەرڎەی ڕووەو ئۊپۊزیسیۊنێوی هەقەتینی ورسەنگنیا و کەم و کووڵییەکاو ئا سەرڎەمەیە بەڕۊشنی و دیاریکریای باسۍ کریۍ. سەرجەمو ئا ڕەخنا گەل، ویرمەندۍ، ڕۊشنویرۍ، هۊگرۍ، لایەنگیرۍ و دۊسێما باسشا کەرڎەبۍ قسێشا سەرۊ کریا و بیۍ بە دلێنەو قسەکاما. هەوڵۍ دریۍ سەرڎەمی تازەنە و جەنگو هێزە هەرێمی و جیهانییەکانە پێسەو وێش ورسەنگنایش پەی بکریۊ و حەرپاسە یاگۍ و پلۍ گەلو کوردی پێسەو فاکتەرێوی کاریگەری چا دۊخەنە بەوردی باسش کریا و هەڵوێستی دروسی سیاسییچ دیاری کریا. سیاسەتەکاو ڕژێمی دژو خەباتی نەتەوەیی کوردی و سەرجەمو نەتەوەکا و حەرپاسە تەرسەکاو سەرو جمیەرەکەیچما بەشێوی گرنگ چا بابەتە سیاسییانە بیۍ، کە کۊنگرەی حەوتەمو حیزبەکەیمانە ئامۍ وەرو باسی.
حەوتەمین کۊنگرەو ئێمە دمابەدماو سەرەورڎای و شۊڕشو ژەنی، ژیوای، ئازاڎی-ینە کریا. بنەڕەتیتەرین باسەکاو کۊنگرەی، سەرو شۊڕشی تازەو گەلو کوردی وەرکەوتو کورڎسانینە و گەلای تەرو ئێرانینە و تاوتۊکەرڎەی خەباتو پارتیمانە و هامڕایامانە چا سەرڎەمو شۊڕشەینە بۍ. بوو. پەوکای بە دیاێوی کریاوە و دوور جە دەمارگرژیی هزری، هەرماننامە و کەموکووڵییە سیاسی و کرڎەییەکاو وێماما ورسەنگنۍ. خاڵە قەوەتەکۍ وزیۍ باس و کەمکارییەکۍ بەڕاشکاوی باسی و ڕەخنۍ کریۍ. دلۍ بابەتەکاو کۊنگرەینە باس جە دەسکەوتەکاو گەلی سەرڎەمو شۊڕشی تازەینە کرییۍ و بە بەشداریی ئا هامڕایا مەیدانو کۊشیایینە ڕێکوستەی و کرڎاری خەباتیوە کۊنگرەنە بەشدارییشا کەرڎەبۍ بە شێوێوی واقعیتەر سەرو ڕێبازی کرڎاری، ڕێکوستەی گەل و کەموکووڵیە جۊراوجۊرەکاو ڕێکخوستەی و خەباتی وەختو سەرەورڎایەکانە تاووتۊ کریا. دژەکرڎاریی ڕژێمی چا سەرڎەمەنە لەیەک دریاوە. بە جەختکەرڎەیوە سەرو قەرارو گەلیما پەی ژیوایێوی ئازاڎی سەرو بنەماو ئازاڎیی ژەنا و پێوەژیوایی ئاشتییانەو گەلا، بۊ شێوازەکاو خەباتی وەڵێنیارۍ فرۍ کریۍ. سەرو بنەماو ئا حەقیقەتەیە کە ژەنی، ژیوای، ئازاڎی فەلسەفەو بییەی و پاڕادایمو خەباتیمانۍ، ڕاوەبەری و ئەنداماو پارتیما سەرو چەنیەتی هەرمانۍ و خەباتیشا جە وەختو شۊڕشو ژەنی، ژیوای، ئازاڎیینە ڕەخنەدایێوی بنەڕەتیشا دا. کۊنگرە بە کۊدەنگی ددانش پا ڕاسییارە نیا، کە سەرکەوتەی شۊڕشی تازەی، ئامایدی سەرجەمو داوا و داواکارییە دێموکراتیکەکاو گلێرگەکاو ئێرانین و چایچۊ پەژاک بە وەرفراوانکەرڎەیوە هامکاری چەنی سەرجەمو هێزە ئازاڎیوازەکاو گەلاو ئێرانی، بەتایبەت ژەنی و گەنجۍ، پەی ئارەیدیی ئا سەرکەوتەیە سەرجەمو هەوڵ و کۊشیاییشا بوزانۍ هەرمانە.
کۊنگرەو حەوتەمیما بە بەشداریێوی وەرەچەمو هامڕا ژەناما لوەا ڕاوە. کۊنگرەو حەوتەمی، بە پاو پاڕادایمی هزری-فەلسەفی حیزبیما، ئازاڎیی ژەنێشا پێسەو چێرخانو خەباتی و کۊشیای ورسەنگنا و جەختش کەردۊ، کە ئازاڎیی ژەنا، مەرجو ئازاڎیی گلێرگەین و پێویسیی سەرەکیی بونیادنیای گلێرگێوی دێموکراتیکین، کۊشیای وەراوەرو چەمک و بەرکەوتەیەکاو پیاسالاری و دەسەڵاتین.
پەرسەو گەنجا یوە جە پەرسە سەرەکییەکاو کۊنگرەو حەوتەمی بۍ. بەشداریی چالاکانەشا کۊنگرەنە ڕووێوی گەنجانێش دا بە کۊنگرەی. بە تاوتۊکەرڎەی پەرسەکاو گەنجا و نەوەی تازەو گلێرگەی و تواناکاشا، ڕێزگێرتەی جە ماتەوزەو گەنجا و پارێزنای و یۊوستەی ئا ماتەوزەیە چەنی ڕەوتو خەباتی و کۊشیای پێسەو ئەرکی حیزبیۍ جەختش سەرۊ کریاوە. گەنجۍ نیشانەشا دا دەسبەرڎارۍ ئامانجەکاو ژیوایی ئازاڎی نمەبانۍ و ئینەیچە هۊکارێوی قەوەتا پەی خەباتی بە ڕووحێوی گەنجانەوە. چا ئاراستەنە کۊنگرە بڕیو قەرارێش پەسەندۍ کەرڎۍ.
کۊنگرەو حەوتەمی بە وستەی باسو بارودۊخی قەیراناوی ژیوگەو وەرکەوتو کورڎسانی و ئێرانی و سیاسەتە وڕنەرەکاو ڕژێمو ئێرانی، جەختش کەردۊ، کە کاریگەرییەکاو ئا سیاسەتا سەرو بییەی گلێرگەکاو دلۍ ئێرانی کێشێوی جدییا. کۊنگرەکەما پاش گێرتەرە سەرو هامکاریی هەمەلایەنەی چەنی سەرجەمو جمیەرەکا و خەباتکاراو ژیوگەپارێزا بەمەبەسو وەرفراوانکەرڎەیوە خەباتی ئیکۊلۊژیکی وەراوەرو سیاسەتەکاو دژایەتی ژیوگەی و حەرپاسە سەرو فراوانکەرڎەی کولتوری ئیکۊلۊژیکی و هاندای ژیوایی تاکی و گلێرگەی سەرو بنەماو ژیوگەپارێزی جەختش کەردۊ. جەختیچش کەردۊ پێویسییش بە چەمەڕوانیی سەرکەوتەی قوژبنەکای تەرو کۊشیای نییا و پێویسا پێسەو ئەرکێوی سەرەکی ژیوای و خەباتو حیزبی و ئەنداماش وەش ببۊ.
درێژەو کۊنگرەینە ڕاپۊڕتەو هامسەرۊکایەتی پارتی وزیا وەرو باسی و ئەوەکۊڵیای کریا بە بڕێو دیایێوە لاو نوێنەراو کۊنگرەیوە چوارچوەو بەڵگەکاو کۊنگرەینە پەسەندۍ کریۍ. جە کۊنگرەیمانە بە سەرنجدای ئا بابەتا وزیۍ وەرو باسی و ئا ئەنجامۍ ڕاپۊڕتەکانە ئاماژەشا پەنە کریابۍ جە وەڵیوستەی کۊشیاینە و لە چوارچوەو وەڵێنیارەکاو وەڵۍ کۊنگرەینە و هاموەخت کۊنگرەنە کریێبێنۍ، چند قەرارێو جە گردو بەشەکاو خەباتینە ورسەنگیۍ و پەسەندۍ کریۍ و بیۍ بە قەرارۍ کۊنگرەی وزیی دلۍ بەرنامەو کۊشیایی دماییوە.
بە پاو دماییئامای هامسەرۊکایەتیی هامسەرۊکاو حیزبی، نوێنەرۍ بەشدارۍ کۊنگرەنە میانەو ورچنیەێوی ڕاستەوخۊین هامڕا پەیمان ڤیانە و هامڕا ئەمیر کەریمی پێسەو هامسەرۊکە تازاو حیزبی ورێچنیۍ و سپاسو ڕەنج و کۊشیای هامسەرۊکە وەڵینا کریا. حەرپاسە جە ورچنیەیوۍ جیاوازتەرنە ئەنداماو مەجلیسو پەژاکی ورچنیۍ و حەرپاسە ئەندامۍ یاگەدارۍ جیای ئەنداماو مەجلیسی ورچنیۍ. کۊنگرە جە کەشوهەوایێوی شایەنو خەتەو گەشمەرڎانە و شۊڕشو ژەنی، ژیوای، ئازاڎی-ینە کریا و سەرکەوتانە دماییش ئاما.
سەرو ورڎەکارییەکا و دلێنەو ڕاوەلوای کۊنگرەی دماتەرنە، زانیاریی زیاتەر پەی ڕای گردینی و گەلەکەیما ئەرەمیاونمۍ.
بژیوۊ خەباتی ئازاڎیوازانە و دێموکراتیک پەی کورڎسانی ئازاڎی و ئێرانێوی دێموکراتیکی و کۊنفێدراڵی
ژەنی، ژیوای، ئازاڎی
٠٢/٠٤/٢٠٢٤
مەجلیسو پارتو ژیوای ئازاڎو کورڎسانی (پەژاک)"
