ڕۊو جومعەی ٣٠ ئەیلول و ٢٠٢٢، جە سەرەتاو دەسپنەکەرڎەو سەرهۊردای "ژەنۍ، ژیای، ئازاڎیی"نە، ۋېنیشاندایۍ گۊرە جە شاروو زاهیدانی لواڕاوە، چنەشەنە هېزەکۍ دۊڵەتی بە زەبروو چەکی و تنووتیژی حۊڵ و ۋڵاوە پنەکەرڎەو ۋېنیشاندەراشا دا و جە ئاکامەنە نزیک بە ١٠٠ ۋېنیشاندەرا کوشیۍ و ئا ڕووەیچە پېسە جومعەی سیاوی یان جومعەی ۋناوی نامۍ بریا. بۊنەو یۋەمین ساڵوەگېڵ و ئا کوشتارە گۊرەیۊ پارتوو ژیۋای ئازاڎیی کورڎسانی (پژاک) ئەرەیاۋنېوەش ۋەڵاکەرڎۊ.

دەقوو ئەرەیاۋناکەی پی جۊرەنە:

"جومعەی ۋناوی زاهیدانی کوشتارېوەبۍ دژ بە گرڎوو گەلا چەوەسیای"

کوشتەی ژمارېوە جە هاموڵاتیا ئازاڎیوازوو بەلوجی جە ڕۊو جومعەی ٣٠ ئەیلوول و ٢٠٢٢، جە شارەکا زاهیدانی و خاشی، بە دەس و هېزە فاشستیەکا ئېرانی، جە تەرەفوو گلېرگەو بەلوجی و سەرمەشقا ئاخېزوو "ژەنۍ، ژیای، ئازاڎیی"وە پېسە جومعەی ۋناوی نام زەند کریان. پارتوو ژیۋای ئازاڎیی کورڎسانی (پژاک)، یاڎوو  گیان بەخشایا گەلوو چەوەسیاو بەلوجیشا چا جومعە سیاوەنە بەرز ڕاگېرۊ. ئېمە پاڵپەشتی جە کۊشیای گەلا چەوەسیای ئېرانی بەتایبەتی گەلوو بەلوجی کەرمۍ.

ڕووەداو ڕۊو جومعەی ٣٠ ئەیلول و ٢٠٢٢، جە سەرەتاو دەسپنەکەرڎەو سەرهۊردای "ژەنۍ، ژیای، ئازاڎیی"نە،ڕووەشدا، بە عالی ڕووەەی قیزەونەو سیستم و فاشیستی ئېرانیش ئاشکرا کەرڎ. جە وەختېنە ئاخېزۍ چېروو نامۍ ئازاڎیی گەلاو ژەنانە دەسش پنەکەرڎ، ۋەرپەرسا فاشیستی ئېرانی جە شاروو ڕاسکی دەسدرېژیشا کەرڎ سەروو کناچۍ بەلوجۍ و گەرەکشابۍ شکۊو هەیمەنەو ئا گەلەیە ماڕانۍ. جارېوەتەر سەلەمیا کە قولەپۊپۍ ئاخېزوو ژەنا پەی ئازاڎیی، ئەنجامدای دەسدرېژی جە لاو کاربەدەساو فەرمانڎەکا ڕژېمی، دوژمنایەتیۍ ئاشکران ۋەران ۋەر بە گرڎوو ژەنا. حەرپۊکەی سەرهۊرداو گەلوو بەلوجی دژ بە دەسەڵاتۍ چانەی خراپەکاری ڕەوابۍ و کوشتەی و ۋن متەی جە لاو ڕژېمی دەسەڵاڎداریۊ جە زاهیدان و خاش نمونېوە زەق و کۊکوشی بۍ دژوو گرڎوو گەلا چەوەسیای ئېرانی و ۋەرکەوتوو کورڎسانی. جوابوو سەرهۊردای دیموکراتیکی زاهیدانی و خاشی بە گولۍ جەنگی نیشانۍ دڕنڎەیی ڕژېمی بە ئامانجوو پەرەپنەدای سیاسەت و جینۊسایدی دژ بە گەلوو بەلوجی و تۊقنای گرڎوو ئا گەلا بۍ کە ڕووەشا جە جاڎەکا کەردېبۍ. کوشتەی نزیک بە ١٠٠ ۋېنیشاندەرا بەلوجی کە بەشېۋېوە دیموکراتیکی ناڕەزایشا ۋەران ۋەر بە دەسدرېژی ئاشکراو بۍ باکانەو ۋەرپەرسا ڕژېمی بەربڕی، ۋېش جە ۋېشەنە نمونېوە ئاشکراو تاوانۍ دژ بە مرۊڤایەتینە تا ئا وەختەی چەوەسیایۊ و ستەم دمایش پنە نۍ، مشۊم بە ئازاڎییوازی کۊشیای گەلی ئیڎانەو شەرمەسار کریۊ. پەنەوازەن گەلا ئېرانی و بەتایبەتی گەلوو بەلوجی چانەی بیاوانە کە ڕاسەوخۊ دماو کوشتاروو ٣٠ ئەیلولی، بەرکەرڎەی سزاو جە قەنارەدای، حەرپاسە ئەشکەنجەو دەسدرېژی کەرڎەی سەروو ژەنا جە زینڎانەکانە، جوابوو دەسەڵاتی فاشیستی تارانی پۍ کۊششکارا سەروو جاڎەکا و گەلا بیەن، حەرپۊکەی ئی تاوانۍ شیاوو چنە وەش بیەی نیەنۍ. شېوازوو کوشتەی "خودانور لەجەیی" جە ڕاسینە سوکایەتی کەرڎەی بە گەلا چەوەسیای بۍ. حەق کەرڎەیۊ ئا کوشتاریە تەنیا جە ڕاو ئازاڎیی گەلوو بەلوجی و بەدیئامای دیموکراسیۊ مسۊگەر بۊ.

پارتوو ژیۋای ئازاڎیی کورڎسانی (پژاک)،سەرەڕاو شەرمەسارکەرڎەو ئا کوشتاریە جە تەرەفوو ڕژېموو ئېرانیوە، یاڎوو ئا گەشمەرڎا کە گەشمەرڎۍ جمیەری شۊڕشگېڵنی"ژەنۍ، ژیۋای، ئازاڎیی"نۍ بەرز ڕاگېرۊ. ئېمە پاڵپەشتی تەماموو هەمەلایەنەو ۋېما پۍ گەلوو چەوەسیاو بەلوجی ئەرەیاۋنمۍ، کە فرەتەرین ناداڎی و ستەمشا ۋەران ۋەر کریان. داوایچ جە ئازاڎیی وازاو دیموکراسی وازا کەرمۍ کە گەلوو چەوەسیاو بەلوجی بەتەنیا جیا نازا و گرڎ کەسۍ جە هەڵمەتەو ئا گەلە کۊشش کەرەیە دژ بە سستمی ستەمکاری و فاشیستی ئېرانی پاڵپەشتۍ و پەشتیوانۍ با. بېگوومان یەکڕیزی و یۊبیەی بەینوو گەلا چەوەسیای جە ئېران و ۋەرکەوتوو کورڎسانی بۊ بە مەڵامەتوو دەسەبەربیەی ئازاڎیی و دیموکراسی. کۊشیای گەلا میاۋۊ بە سەرکۊتەی.