پەژاک سەرەڕاو شەرمەزارکەردەی هجومە قڕکارییەکا دۆڵەتو تورکی و چەتەکا پەی سەرو وەرنیشتی ئەرەیاوناش: " پەی پارێزنای وەرنیشتو کوردەسانی و ئایندێوە ئازادی و دیموکراتیکی جە وەرا وەرو پلانەو قڕکاری دۆڵەتو تورکی و چەتەکاشەنە، مشۆم جارێوە تەر ئەرەپڕمێ".
پارتو ژیوای ئازادی کوردەسانی (پەژاک) جەبارەی هجومو گروپە چەتەکا سەر بە دۆڵەتو تورکی ئەرەگیری پەی سەرو مەنتیقەکا وەرنیشتی و سوریای بە تایبەتی حەڵەب و شەهبای ئەرەیاونێوەش وەڵاکەردۆ.
دەقو ئەرەیاوناکەی پی جۆرەنە:
"هجومو گروپە چەتەکا سوریای بە پەشتیوانی تەمامەتی دۆڵەتو تورکی پەی سەرو مەنتیقەکا وەرنیشتی و سوریای بە تایبەتی حەڵەب و شەهبای جە ئیسەنە بە ئامانجو جینۆسایدو گەلا ئا وڵاتەی بە تایبەتی کوردەکا ئەنجام مڎریۆ. ئەنجومەنو پارتو ژیوای ئازادی کوردەسانی بە تنی ئی هجومێشە شەرمەزار کەردێ.
بە هجومو گروپە چەتەکا و تاوانکاریەکا تورکیای بە تایبەتی گروپەکا قاعیدەی و داعشی و گروپەکا تەرێ جە وڵاتا ئاسیایی سەلەمیان کە ئەنقەرە پلانەی وەروەڵاوە و مەترسیڎارەش پەی کۆمکوژی گەلا جە سوریا و وەرنیشتو کوردەسانی متەنەرە. ئەردۆغان بە گلێرەکەردەیۆ گروپو چەتەکا جە وڵاتە جیاجیاکاوە هەوڵمڎۆ وێڕاوەبەری دیموکراتیکی وەرنیشتی و سەرنیشتو و وەرنیشتو سوریای دلێنە بەرۆ، چونکی مزانۆ کە بۆنە مایەو ئازادی گەلا هەرێمەکەی. بێدەنگی گلێرکەو جەهانی بەتایبەتی هێزە هەژموونگەراکۍ بەروستەو پەشتیوانی و گڵۆپی سەوزشانە پەی درێژەدای بە جەنگی و کۆمکوژی جە وەرکەوتو مېیامینینە. وەرنیشتو کوردەسانی پێسەو قەوارێوە دیموکراتیکی ئەزمونێوە گەورە پەی گەلا مەنتیقەکەی و جەهانی، بەڵام دۆڵەتو تورکی و بڕێ جە پەشتیوانا چەمشا پا وەڵېوستە مرۆییا هۆرنمێ. ئی هجومێ ئنەی پەی کوردەکا یاگێ تەرسێ و قڕکارییا، پەی گەلا عەرەبی، سوریای، کلدانی و هتد جە سوریانە بە تەمامەتی مایۍ تەرسێن.
وەڵتەرێ گلێرکەو جەهانی جە رەوتو مڏرامانو کۆبانێنە درکش بە قیمەتو شۆڕشو وەرنیشتی و سوریای کەردەبێ، هەر وەرو ئانەی ئازادیوازا و دیموکراسیوازا جەسەرانسەرو جەهانی پەشتیوانییشا چنەکەرد. ئارۆیچ پەنەوازا کە بە هەمان حەماسو کۆبانێوە پەی سەرتاسەرو وەرنیشتو کوردەسانی و گەلا سوریای کە وەرەو ڕوو قڕکەردەی و کۆمکوژی مەترسیڎاری بیێنۍ، سەرو ئاستی مییاننەتەوەیی بە تایبەتی جە ئەوروپانە واوەی کریۆوە. بڵێسەداربیەی ئێرو جەنگو جەهانی یەرەمی جە سوریا بە مەڵامەتو وەڵێکۆتوەی گروپەکا قاعیدەی و داعشی سەر بە تورکیای بە دڵنیاییۆ پەی تەمامو وەرکەوتو مېیامینی مایۍ مەترسی بۆنە. هەرپۆکەی پەنەوازیش بە هەڵوێسهورگێرتەی مییاننەتەوەیی هەن.
ئا جەنگەی تورکیا جە سوریانە هۆرشگیزنان و هەوڵ مرۆ حەڵەب چیاتی رەقای جارانی کەرۆنە یاگێ زیاکەردەو هێزو تەحریرو شام و گروپە چەتەکا تەرێ، نەک هەر بە تەنیا جە دژو کوردەکاو وەرنیشتو کوردەسانی و سوریا، بەڵکووم گردو گەلەکەیما جە هەر چوار بەشو کوردەسانی وەرەو ڕو کۆمکوژی مکەرۆوە. فاڕاو دیموگرافیا، کوشتەی بە کۆمەڵ و دلێ بەردەو وێڕاوەبەری وەرنیشتو کوردەسانی سەرەکیترین ئامانجەکا ئی پەلامارێنێ. هێز و دۆڵەتا هەژمونگەرا هەوڵمرا جارێوە تەر جە دیزاینکەردەیۆ تازە وەرکەوتو ناوەڕاستینە کوردەکا کەرا قوربانی، کە ئەگەر گەلەکەما وشیار بۆ و پەشتیوانی جە جمیەرەو ئازادیوازی وێش کەرۆ، تاوۆنە جارێوە تەر ئا سیناریۆیا ماڕۆ. پەشت بەستەی گەلەکەیما بە ئیرادەو وێش سەرکەوتەی چی ئەرەکۆشانە یەکلای کەرۆوە. یەکڕیزیی یۆبییەی گەلەکەما جە هەر چوار بەشو کوردەسانی هەر پێسەو ویەردەی، سەرکەوتنی تەر هامشێوەو ئازادی کۆبانێ جە دژو چەتەکا قاعیدە و داعشی سەر بە دۆڵەتو تورکی تۆمار مکەرۆ.
مەجلیسو پارتو ژیوای ئازادی کوردەسانی (پەژاک) سەرەڕاو شەرمەزارکەردەی هجومەکا گەلەکەیما جە دژو گروپو چەتەکا سەر بە دۆڵەتو تورکی پەی سەرو وەرنیشت و سەرنیشتو سوریای، پەشتیوانی تەمامەتی وێش جە گەلەکەیما جە وەرنیشتی و گەلا قوربانی جەنگی جە سوریانە ئەرەیاونۆ. داوا جە تەمامو گەلەکەیما جە هەر چواربەشو کوردەسانی و ئەوروپای مکەرمێ کە جە تەمامو مېڎانەکانە پەی پەشتیوانی جە گەلەکەیما جە وەرنیشتو سوریای ئەرەپڕا. پارێزناو قەوارە و ستاتۆ کوردەکا جە وەرنیشت و سەرنیشتو سوریای پەی ئایندێوە ئازادی و دیموکراتیکی وەرکەوتو مېیامینی یەکجار گرنگیۍ ژیوای و تاریخی وێش هەن. پەنەوازا جارێوە تەر بەرنامەو فاشیستو تورکیای پەی دلێنەبەردەی ئا قەوارا پوچەڵێ کریاوە و بڕواما چانەنە کە جارێوە تەر گەلەکەما هامشێوەو گرد کاتێ تواناو خوڵقنێوە حەماسەتێ هەرێمایەتی ومییاننەتەوەیش جە کوردەسانۆ تا ئەوروپا هەن".
