پژاک بە بۆنەو ٤و نیسانی ڕۆو پەیڎابییەی ڕابەرو گەلو کوردی عەبدوڵا ئۆجالانی و ئەرەمەرزنای پژاکیوە ئەرەیاوناێوەش وەڵا کەردۆ و ماچۆ: " ڕۆو پەیڎابییەی ڕابەر ئاپۆی و ئەرەمەرزنای پژاکی، وەهارو گەلین".
پژاک بە بۆنەو ٤ نیسانی ڕۆو پەیڎابییەی ڕابەرو گەلو کوردی عەبدوڵا ئۆجالانی و ئەرەمەرزنای پارتو ژیوای ئازاڎو کوردستانی (پژاک) ئەرەیاوناێوی نویسیاش پەلیانەی ڕسمیی وێشنە وەڵا کەردۆ و ئی ڕووەیە بە وەهارو ئازاڎیی گەلی نامێ مبەرۆ.
پژاک ئەوەخوایش مکەرۆوە، چی ساڵانە دوژمن پەشتی بە سیاسەتو ئاسیمیلایۆنی و جینۆسایدو چاندی بەستەبێ، بەڵام بەرکەوتەی پژاکی پێسەو شکۆفەو وەهاری و نەورۆزو کوردی، بی مایێ ژووژنایۆ ژیواێوی پەڕهومێدی وەرکەوتو کوردستانینە.
ئەرەیاونایەکەو پژاکینە ئامان: "پایەکاو پژاکی سەرو چەمکە گەورەکاو پێسەو دیموکراسی و ئازاڎیی مجیێنێرە، پەوکای ئەرەمەرزنای پژاکی ٤ نیسانو ٢٠٠٤، مگێڵۆوە پەی پێویسیی گەلو وەرکەوتو کوردستانی پەی دەسپەنەکەرڎەی قۆناغێوی تەرو ورستەیۆ، کە پەی ڕۆڵە دلێرەکاو گەلەکەیما، بە پێوەسبییەی بە ڕیزەکاو پژاکیوە، فەلسەفەو گیانفیڎایی و فیڎاکارییشا کەرڎەن قەلاپۆپەو ڕێبازی ڕۆشنو وێشا".
هەرپاسە پژاک مواچۆ: "هاموەختو یەرەمین پەیڎابییەی ڕابەر ئاپۆی چەنی ئەرەمەرزنای پارتەکەیما (پژاک)ی، ڕووەداێوی گەورەن جە چارەنویسو گەلەکەیمانە وەرکەوتو کوردستانینە، چونکم پەیڎابییەیۆ و زیندەبییەیۆ نەورۆزیشانە و پەیڎابییەی ئازاڎی گێرۆ وێ. هەرمانەو پژاکیچ خولقنای حەماسەین جە کۆشیای ئازاڎیوازانەو گەلەکەیمانە دژو ستەمکاری".
چا دیارگەوە پژاک یادو گردو ئا گەشمەرڎا بەرز مرمانۆ، کە جە ئەرەمەرزنایشۆ تا میاوۆ بە درەوشیایۆ شۆڕشو "ژەنی، ژیوای، ئازاڎی" و نەورۆزو ئێساڵی، درێژەپەنەدەرو ڕاو خەباتی بێنێ.
پژاک ئەرەمیاونۆش نەورۆزو ئێساڵی وەرکەوتو کوردستانینە شێوەو سەرەورڎاینە کریا و ماچۆ: "ئینەیچە هومێدا بە ئایندێوی ئازاڎی و سەرکەوتەی گەلەکەیما ورچنیەیەکاو سەرنیشتو کوردستانی و تورکیاینە، ئی هومێدەش یاونا قەلاپۆپە و ئیساتێچ سەروبەندو ٤و نیسانینە، پێویسا ویرێ جە کۆشیای قەوەتتەری بکریۆوە دژو سیستمە ستەمکارەکا".
پژاک یۆگێرتەی گەلی و گەریلای بە کرۆکو کۆشیای مزانۆ و سەرمەشقایەتیی ژەنایچ بە بناغەو کۆشیای ئازاڎیی، جە وەرکەوتو کوردستانی مشناسنۆ، مواچۆ: "ژەناو کوردی جە سەرمەسقایەتیی کۆشیاینە وەرکەوتو کوردستانی و ئێراننە پەیامێوی گرنگشا ئینا سەرو شانەیۆ و خەتەو سیاسەتو پژاکیچ کە سەرو بناغەو فکری ئازاڎیوازانەو ڕابەر ئاپۆی ئەرەمەرزیان، گەورەتەرین ڕانیشاندەرا".
ئاخرۆ ٤و نیسانی وەنەو گەلو کوردی و بنەیانەو گەشمەرڎا و گەریلای و گەشمەرڎاو شۆڕشو "ژەنی، ژیوای، ئازاڎی"ی و ئەداو گەشمەرڎا مەبارەک مکەرۆ، وەعد مدۆ بە درێژەدای بە کۆشیای تا بەدیئارڎەی ژیواێوی ئازاڎ و دیموکراتیکی پەی گەلو کوردی.
