کۆمیتەو گەشمەرڎا پژاکی بۊنەو هەشتەم ساڵیادۇ گەشمەرڎەبیەو کەمال پێنجوێنی و سدیق ساڵیاواییۆ سەرەڕاو بەرز ڕاگېرتەی یاڎۇ ئا دووە گەشمەرڎاوە ئەرەیاۋناش، ئاوات و ئامانجە ئازاڎیوازانەکاشا مارمېنە دی.
٤/١٣/ ٢٠١٦ یەنەکەمال پێنجوێنی و ئۊسا سدیق ساڵیاوایی جە تەرەفۇ کەسانۍ بەکرېگرتەو سەر بە دەوڵەتۇ ئێرانی پێنجوێنەنە تیرۆر کریۍ، بۊنەو هەشتەم ساڵیاڎۇ گەشمەرڎەبیەیشاوە کۆمیتەو گةسمەرڎا پارتوو ژیۋای ئازاڎیی کوردسانی (پژاک) ئەرەیاۋنېوەش وەڵاکەردۆ و چنەشەنە جەختش جە درێژەدای بە رێبازوو گەشمەرڎا و بەدیئاردەو ئاوات و ئامانجەکاشا کەردۆ.
دەقۇ ئەرەیاۋناکەو کۆمیتەو گەشمەرڎا پژاکی
"ئاوات و ئامانجۇ ئازاڎیوازانەو گەشمەرڎا کەمال پێنجوێنی و سدیق ساڵیاوایی مارمېنە دی"
جە هەشتەم ساڵیاڎۇ گەشمەرڎەبیەو هەڤاڵاما "کەمال پێنجوێنی و سدیق ساڵیاوایی"نە سەرۇ دەسۇ بەکرێگرتا سەر بە رژێمۇ ئێرانی جە ١٣/٤/ ٢٠١٦، کۆمیتەو گەشمەرڎا "پارتۇ ژیۋای ئازاڎیی کوردسانی (پژاک)" یاڎ و ویرەوەری ئاڎیشا ئېژا نرخنۆ. پژاک گرڎ وەختۍ درێژە پنەدەروو ڕاو گەشمەرڎا جمیەرۇ ئازاڎیی وازیا.
گەشمەرڎە کەمال پێنجوێنی بە ئیراڎە و بڕوای هېقمۆ پابەنڎۇ کۊشیای گەلەکەیش بۍ و بە عالی فەلسەفەو ئازاڎیوازی جە رابەر ئاپۆی و ئەندێشەکاشۆ فێربی. پەشتیش بە هێزۇ کۊشیای ۋېش بەستەبۍ و تاوابېش ئەنایاوېوە دروس جە رابەر ئاپۆی و گەلۇ کوردیۆ بەدەسبارۆ و جە ڕاو ئازاڎیی گەلینە سڵ جە هیچ جۆرە گیانبازیێوە نە کەرېوە. هەڤاڵ کەمال بە ئەندێشە و رۆح و کردەوە و وتەکاش سەرۇ ڕاو کۊشیای ۋېش یاوابۍ بە قەناعەتېوە شۆڕشگێڵنانە، هەرپۊکەی باوەڕی تەمامش بە کۊشیای ئازاڎیوازانەی جە هەر چوار پارچەو کوردسانینە بۍ. ئاڎ بە ئشناسای و قووڵبیەیۆ پێویسی جە جمیەری ئاپۆیی رەوتۇ ژیۋای ۋېش فاڕا و بە ئازاڎیی و ئیراڎە و گیانبازییوە رەنج و مانیایۍ فرەش کێشا و خزمەتی گەورەش بە گەلەکەیش کەرد. حەرپاسە سڵش جە هەڕەشەکاو دوژمنا و بەکرێگرتا نەکەردۆ و بە ئامانجۇ پەرەپنەدای بە ورەو کۊشیای پەی ئامای دی یۊبیەی نەتەوەیی گەلۇ کوردی زیاتەر جە جارانی کۊشیایش کەرد.
هەڤاڵ کەمال چنی هەڤاڵ سدیق ساڵیاوایی جە مەحاڵەو پێنجوێنېنە بیۍ بە ڕەمزۇ کۊشیای پەی ئازاڎیی گەلۇ کوردی و بە بێ هیچ چەمەڕایێوە بێ مردای چالاکیێشا کەردۍ. دوژمن کە وەرگەو ئا ئاژەیە نەگېرۍ، جە ڕاو پیلانگێلنیێوە گەشمەرڎېش کەردۍ. هەردووە هەڤاڵېما بە راسگۆیی و دروسی پابەنڎۍ کۊشیای پژاکی بیۍ و وەشەسیایشا پەی ئازاڎیی گەلی ڕانومایۍ کۊشیایشا بۍ.
ئارۊیچەنە دوژمناو گەلەکەیما زیاتەر جە جارانی جە پانیشتۇ کوردسانینە درێژە بە کردەوە تیرۆریستییەکاشا مڎا و بە ئامانجۇ جینۆسایدی و قڕکەردەی گەلەکەیما هجۇمەکېشا زیاتەرۍ کەردېنۍ. هەرپۊکەی حۊڵەکا ئێرانی و تورکیای پەی تیرۆرکەردەی و گەشمەرڎە کەردەی چالاکا ئازاڎیوازی و وڵاتپارێزنا کۊششکاری ئانەی بەروزۆ کە وەرگەو وینای یەکڕیزی گەلۇ کوردی جە هەر چوار پارچەو کوردسانینە مەگېرا. ئارۊنە ورەو کۊشیای گەلەکەیما و ئازاڎیوازا و چالاکا یاوان قولەپۊپە و جە ۋەرا ۋەروو سیاسەتۇ کۆمکوشکارانەو دوژمنینە زیاتەر جە گرڎ وەختۍ ۋېڕاگری مکەرۆ.
کۆمیتەو گەشمەرڎا "پارتۇ ژیۋای ئازاڎیی کوردسانی (پژاک)" جە هەشتەم ساڵیاڎۇ گەشمەرڎەبیەو هەڤاڵاما "کەمال پێنجوێنی و سدیق ساڵیاوایی"نە بە پابەنڎبیەی هېقم بە رێبازۇ کۊشیایشا، یاڎۇ ویرەوەری ئاڎیشا بەرزڕاگېرمۍ. قەسەم موەرمۍ کە پارتەکەما بە ئامانجۇ بەدیئاردەو ئاواتە ئازاڎیوازانەکاشا، ڕا نەڎەیمۍ رەنج و مانیایی و کۊشیایشا بە زایە بلۆ و تا ئازاڎیی یەکجارەکی گەلۇ کوردی، زیاتەر پەرە بە کۊشیای مڎەیمۍ. بێگومان ئارۊنە جە ئاکامۇ ۋەرفراوانبیەو کۊشیای گەلەکەیمانە سەرۇ رێبازۇ گةسمەرڎا، رژێمۇ فاشیستی سوک و رسواتەر بیەن و پژاک بە بەدیئاردەو ئازاڎیی گەلەکەیما حەقەو ۋنەو هەڤاڵا کەمال پێنجوێنی و سدیق ساڵیاوایی و گرڎوو گەشمەرڎا مکەرۊوە. هەردووە گەشمەرڎەکېما ڕەمزۇ کۊشیای گەلێوەنۍ پەی یۊبیەی نەتەوەیی هەر چوار پارچەو کوردسانی و هیواڎارێنمۍ کە گەلەکەما، بەتایبەتی ئازاڎیوازا و وڵاتپارێزنا هەوڵی زیاتەر پەی درێژەدای بە رێبازۇ ئا گەشمەرڎا وزانە گەڕ و قەناعەتما پاسەن کە بە یۊگېرتەی گەلەکەیما متاومۍ پلانە و هەڕەشەکا دوژمنی بە شێوېوە بەقوەت پوچەڵ بکەرمېوە.
کۆمیتەو گەشمەرڎا پارتۇ ژیۋای ئازاڎیی کوردسانی (پژاک)
١٣/٤/ ٢٠١٦".
