ئەرەنیشتا شارو قامیشلۆی پەی ٦ گەشمەرڎا هێزەکاو قەسەدەی، کۆماندۆسی و مەدەنییەکا هەرێمەکەی جە قەبرسانو گەشمەرڎە دەلیل ساروخانو قامیشلۆی مەڕاسیمێوە جەماوەرییشا ڕاوەبەرکەرڎ. جە مەراسیمو بە خاک ئەسپارای گەشمەرڎا، بەهەزاران کەسۍ و ئەنداماو هێزەکا ئاسایشو دلێینەی، کۆنگرەو ئیسلامی دیموکراتیکی، کۆنگرە ستار، ڕێکوزیاکا گلێرگەی مەدەنی، تەڤگەرو گلېرگەو دیموکراتیکی (تەڤ-دەم)ی و پارتو یۊبیەی دیموکراتیکی (پەیەدە)ی بەشدارۍ بێنۍ.

نامۍ ئا گەشمەرڎا کە ئەسپەردە کریۍ: "گەشمەرڎە عەهید باران قامیشلۆ، بەسام ئەحمەد، یاشار ئیبراهیم، شێرزاد قامیشلۆ، ئاگری قامیشلۆ و چیا ڕوس"ـەنۍ.

دماو ڕێزگێرتەی جە یاڎو گەشمەرڎا شۆڕشی، بە نامۍ ئەنجومەنو بنەیانەو گەشمەرڎا شارو قامیشلۆی جەواهێر عوسمان قسێش کەردۍ و سەرەوەشیش جە کەسوکارو هەر ٦ گەشمەرڎەکا کەرد.

عوسمان واتش: "حەجگیز ۋنەو گەشمەرڎەکاما سەرو زەمینیۆ جیانمازمۍ و خاوەنداری جە گەشمەرڎەکاما مکەرمۍ. هەرپاسە بەشداربیەی ئا بنەیانا جە مەجلیسو بنەیانەو گەشمەرڎانە پیرۆز مکەرمۍ. درێژە بە ئەرەکۊشای گەشمەرڎاما مڎەیمۍ و دژو دژمنی ئەرەپڕمۍ".

'جە سەیەو گەشمەرڎانە مېیاومۍ بە سەرکۊتەی'

دماتەر بە نامۍ هێزە سەروازییەکاوە نوری مەحمودی قسێش کەردۍ و واتش: "ئارۆ ٦ وڵاتپارێزنا مسپارمۍ بە خاکی. پرسە و سەرەوەشی ۋێما ئاراسەو گرڎو گەلی مکەرمۍ کە ئازادییشا گەرەکا. سەرنیشت و ۋەرکۊتوو سوریای شۊنەماو قارەمانا و مڎرامانی و ئەرەکۊشاین. دۆڵەتو تورکی ئەرەگیری بە گرڎ جۆرۍ گەرەکشا گەلوو سەرنیشتی و ۋەرکۊتوو سوریای دلێنەبەرۆ. هەرپاسە با شام بزانۆ کە سەرنیشت و ۋەرکۊتوو سووریای هینو گەلو سوریایا و نمەبۆ چەکو سوریەکا ۋەرا ۋەر بە گەلو سوریای بەرز بکریۆوە. ئەر چی بەشەو جەهانینە یاگۍ شۆڕشی بۊنە، ئانە سەرنیشت و ۋەرکۊتوو سوریاین. سەرنیشت و ۋەرکۊتوو سوریا شۊنەماو پارێزنای و بیەی و دیموکراسییا. ئا مڎرامانەی گەشمەرڎەکێما ڕابەریشا کەرد، مڎرامانێوە شەرەفمەندانەن. پی هێزەیە سەرۍ گنمۍ و ئیدارەو ۋێڕاوەبەری پەی تەمامو سووریای مەبۆ بە ئایندە. جە دمایینە قەولو سەرکەوتەیما  جە سەیەو گەشمەرڎەکاماوە سەرکۊتەی بە دەس بارمێنە".

'بە ئەرەکۊشای جوابو گەشمەرڎا مڎەیمێوە'

دماتەر شێخ مورشید خەزنەوی ئەرەیاۋناش کە نمەبۆ گەلەکەما خەمبار بۆ بە ئەسپەردەکەردەو گەشمەرڎا چونکی گەشمەرڎۍ نمەمرا. شێخ مورشید خەزنەوی واتش: "گەشمەرڎۍ هێزو ئێمەنۍ و ئا هومێڎەنۍ کە سەرش مژیومۍ. هەرپاسە هیچ چێوۍ جە گەشمەرڎەبیەی بە شەرەفتەر نییا. پۊکەی گرڎ سەرو ئا ئەرکەیە گەشمەرڎۍ با، بەڵام گەشمەرڎەبیەی بەرزتەرین ئاست و بەقیمەتتەرینا جە بیەینە. گرڎ کەسێ نمەتاوۆ بیاوۆ بە ئاستو گەشمەرڎەبیەی، تەنیا ئانێنۍ کە گیانو ۋێشا پەی خاکی فیدا مکەرا. گەلەکەمان ئینا قۆناغێوە فرە گرنگەنە، هەر پۊکەی جە گرڎ کاتێ زیاتەر پەنەوازا پێوەرەبیمۍ و خاوەنداری جە ۋنەو گەشمەرڎەکاما بکەرمۍ. جە گرڎی زیاتەر پەنەوازا پەشتگیری هێزو قەسەدەی بکەرمۍ. ۋەرو ئانەی قەسەدە شەرەف و هیواو ئێمەن. جە دما دماینە جارێوەتەر سەرەوەشی ۋێما پەی کەسوکارو گەشمەرڎا موازمۍ و قەول مڎەیمۍ کە بە ئەرەکۊشای و مڎرامان جوابو گەشمەرڎەکاما مڎەیمێوە و ۋنیشا سەرو زەمینیۆ جیانمازمۍ".

جە دمادمایینە ئشناسنامەو گەشمەرڎا ۋنریاوە و بە هەلهەلە و دروشمەو جوانا، گەشمەرڎەکێشا ئەسپەرڎۍ کەردۍ.