قائیمقاموو چەمچەماڵی رەمەک رەمەزان ئەرەیاۋناش، جە هجوومەکەو هېزی ۋێرەگاو سەروو کۆرمۆرینە چوارکەسۍ گیانشا جە دەسدان و دووۍ کەسېچ زامڎارۍ بیۍ، داوایچش جە حکومەتوو عێراقی کەردە پەی ڕاگێرتەی جە هجوومی پا جۊریە پارێزگاری جە ئاسمان و وڵاتەکەیش بکەرۆ.
ڕەمەک ڕەمەزان قایمقاموو قەزاو چەمچەماڵی، جە بارەو هجوومەکەو هېزی ۋێرەگاو سەروو کۆرمۆری جە ناحیەو قادرکەرەمی سەر بە قەزاو چەمچەماڵی کۆنگرێوە ڕۆنامەوانیش ئەنجام دا.
جە سەرەتاو کۆنگرەکەینە واتش: جە هجوومەکەو هېزی ۋێرەگاینە چوارکەسۍ گیانشا جە دەسدان و دووۍ کەسېچ زامڎارۍ بیېنۍ، کە تەماموو قوربانییەکا جە کۆمپانیاو پترۆئۆیڵ-ینە هەرمانەشا کەردێنە، وەش بەختانە زامڎارەکۍ زامشا سوکا و چارەسەری پەنەوازشا پەی مکریۆ.
ئاماژەش پانەیچ کەرد، کە هجوومەکە جە ڕاو درۆنیۆ ئەنجامدریان و بیەن بە مەڵامەتوو کوشتەی و زامڎار بیەی ئا ژمارە قوربانییە، تەماموو قوربانییەکا کارمەندۍ کارامۍ و پسپۆڕۍ کۆمپانیای نامبریای بیێنۍ.
سەبارەت بە درووس بیەو قۊرتەو کارەبۍ بە مەڵامەتوو هجوومەکەیۆ واتش، حەرپاسە جە ئەرەیاۋنای هامبەشوو وەزارەتوو کارەبۍ و سامانە سرووشتییەکانە باسکریا، بە مەڵامەتوو هجوومەکەیۆ ٢٥٠٠ مێگاواتۍ کارەبا کەمش کەردەن، قەرارا جە نزیکتەرین وەختەنە حۊڵوو چارەسەرکەردەیش بڎریۆ.
جە دمادمایی قسەکاشەنە قایمقاموو چەمچەماڵی واتش: داوا جە حکومەتوو عێراقی مکەرمۍ پارێزنای جە ئاسمانوو وڵاتەکەیش بکەرۆ تا جارێتەر کارەساتی پی جۊریە واوەی نەبۆوە، هومېڎەوارێنمۍ لایەنە سیاسییەکۍ پانیشتی یۆگێرتۍ با پەی ڕاگێرتەی چی ڕووەدایا.
