بە بۆنەو جەژنەو ڕەمەزانیوە چندین شارانە قەبرەو گەشمەردا و گیانبەختکەرداو ڕاو ئازادی و دیموکراسی و هەرپاسە بنەیانەو زیندانییە سیاسییا کریێوە سەر

ئیستەنبوڵ

بە سەرمەشقایەتیی کۆمەڵەو هاریکاری و پەشتیوانیی جە بنەیانەو کەسە بێسەروشۆنکریایا ئانادۆل (ئانیاکای-دەر)نە قەبرەو ئا کەسا کە پەی ئازادی و دیموکراسی گەشمەردێ بیێن قەبرسانو غازیی سوڵتان غازیی ئیستەنبوڵینە کریێوە سەر. چالاکێ تەژەئای، ئەنداماو دەبەپەی، کۆمەڵەو هاریکاری و پەشتیوانی وەنەو بنەیانەو زیندانییا و سزادریایا مارمارە (ماتوهای دەر)نە، هامسەرۆکو ئیستەنبوڵو دەم پارتی گۆنجا یانگوز، ڕاوەبەراو مەنتێقەکا ئا پارتەی و چندین کەسای تەری ئامادێ بێنێ.

سەربارو حەوڵەکاو پۆلیسی پەی ڕاگێری چا چالاکییە بەڵام بەشداربیێ بە دروشمو "گەشمەردێ نمەمرا" لوێ قەبرسانەکە و دمای دەیەقێوە بێدەنگی پەی ڕێزوەنەنیای ئۆو یادو گەشمەردا، دمایی دۆعێشا کەردێ.

هامسەرۆکەو ئانیاکای-دەری ئەمینە ئارسلانە سەرو قەبرەو گەشمەرداو پرسوسی و گارای ئەنقەرەینە واچێوەش پشکەش کەرد و واتش، "گەشمەردێ شکۆو ئێمەنێ. تەنانەت وەراوەرو کێلەو قەبرەو گەشمەردەکایچماوە ددانێ وێشاوە نمەگێرا و لجێ و پرسوسنە کێلەکێشا تێکێ دێنێ. چونکوم وەنەو کێلەکایچشا متەرسانێ".

هامسەرۆکو ئیستەنبوڵو دەم پارتی گۆجا یانگۆزیش واتش، "سڵام چا هامڕایاما مکەرمێ، کە پەی ئازادیی گەلا کەوتێ ڕا، سڵام جە ئەدا سەرپۆش چەرما مکەرمێ، کە داواو ئاشتی مکەرا و هەرپاسە سڵامما هەن پەی ئا هامڕایا، کە زیندانەکانە وێگێری مکەرانێ، وەعدشا پنە مدەیمێ کە پەرە بە کۆشیا بدەیمێ. جگە جە کۆشیای هامبەشی هیچ ڕاێوی تەرەما نییەنە".

بەشداربیێ دەسەولیشا سەرو قەبرەو گیانبەختکەرداوە نیێرە.

جۆلەمێرگ
ڕاوەبەراو دەمپارتی و هامسەرۆکاو شارەوانی و ژمارێو وەرچەمێ جە پارت و ڕێکوزیایەکا یوەم ڕۆو جەژنەو ڕەمەزانینە سەرێ قەبرسانو سەرێ سۆلانی گەڕەکەو تەکسەرێییشا دا و سەرو قەبرەو گەشمەرداو ڕاو دیموکراسی و ئازادییوە دۆعێشا کەردێ.

گەڤەریچنە قەبرسانەکێ باژارگە و گەڕەکەو ئۆرمانینە کریێوە سەر. ڕاوەبەرانی دەم پارتی و هامسەرۆکاو شارەوانی دماو سەردای قەبرەو گەشمەردا، خەڵکو مەنتێقەکەیشا کەردێوە سەر.

ئەدەنە

 ئەدەنەیچنە ڕاوەبەراو ئایکایدەری و ئائاتوهای دەری بە بۆنەو جەژنەو ڕەمەزانیوە سەرێ بنەیانەو گەشمەرداو ڕاو ئازادی و دیموکراسی و زیندانییە سیاسییاشا دا و جەژنەشا وەنەو بنەیانەکا مەبارەکە کەردە.

سەردایەکەینە ئەداو زیندانییێ سیاسیی فاتمە ئارسلانە واتش، کناچەکێش ئینا زینداننە و ئیساتێنە پەی ئازادیی جەسەیی ڕابەرو گەلو کوردی عەبدوڵا ئۆجالانی ئینا چالاکیینە. ئارسلانە مەبارەکبایی جەژنێش جە  ڕابەرو گەلو کوردی عەبدوڵڵا ئۆجالانی، زیندانییە سیاسییا و سەرجەمو گەلا کەردە و هومێدش واست جەژنە بۆ مایێ ماڕای گۆشەگیری و هەرپاسە چەسپنای ئاشتی.

مێرسین

ڕاوەبەراو کۆمەڵەو هاریکاری و پەشتیوانی وەنەو بنەیانەو زیندانییا و سزادریایا چوکورۆڤا (چوکورۆڤا توئای دەر) و کۆمەڵەو پەشتیوانی وەنەو ئا بنەیانا کەسوکارشا بێسەروشۆنێ بێنێ (چوتای-دەر) بە بۆنەو جەژنەو ڕەمەزانیوە لوێ سەرێ بنەیانەو گەشمەرداو ڕاو دیموکراسی و ئازادی و هەرپاسە بنەیانەو زیندانییە سیاسیا و مەبارەبایی جەژنێشا وەنە کەردێ.