قەرەیلان: پەنەوازا گرڎ کوردێۋە خەبات پۍ ئازاڎیی و ڕزگاریی گەلوو کورڎی کەرۊ

موراڎ قەرەیلان فەرمانڎەو قەرارگەی نەپەگەی داواش جە گرڎو کورڎا کەرڎ خەبات پۍ ئازاڎیی و ڕزگاریی گەلوو کورڎی بکەرا و ۋاتش:"با ئێمە ڕۆحیانەتو گەشمەرڎا حەر چوار پارچەو کورڎسانی شاڎ بکەرمۍ و کورڎسانێۋی ئازاڎ بنیاڎ بنیەیمۍ. ئانە ئا چېۋەنە، کە جە ئێمە داوا کریۊ".

موراڎ قەرەیلان فەرمانڎەو قەرارگەو ناوەنڎی پارێزنای گەلی (نەپەگە)ی پۍ گەریلاکا و ۋینەراو گەریلا تیڤی قسېش کەرڎە.

واچەکۍ قەرەیلانی بەبۊنەو جەژنەو نەورۆزی و حەفتەی قارەمانیۊ جە گەریلا تیڤینە ۋەڵاو کریێۋە و پی جۊرەنۍ:

"گرڎو هەڤاڵا گەریلاکا ئازاڎیی کورڎسانی، گرڎو جوۋانا کورڎسانی و مەنتیقەکەی، سڵامتا ۋنە بۊ. گەلەکەما و گەلا مەنتیقەکەی بە حەماسەتێۋی فرۊ پێشوازیشا جە نەورۆزو ٢٠٢٣ ۍ کەرڎ. بە تایبەتی بەشڎاری شمەی جوۋانا، ژەنا جە کورڎساننە جە ئاستێۋی بەرزەنە بۍ و دەورو ۋەڵێۋەبیەیشا گێڵنا. گرڎو مەیڎانەکا نەورۆزی بە دروشمەکا "بژیۊ ڕابەر ئاپۆ" و "ئازاڎیی جەستەیی پۍ ڕابەر ئاپۆی" دەنگ دێۋە. ئی دروشمۍ، داواکەرڎەیۍ  بەرز بۍ. دیارا ئا چېۋۍ گەلەکەیما چی سەردەمەنە گەرەکېنۍ، زیاتەر ڕۊشنۍ بیېۋە و ئانەی گەرەکشا بۍ جە نەورۆزنە فرە بە جوانی ڕۊشن بیۆ. سڵام جە گرڎو ئا کەسا مکەرمۍ،  کە بە جۆش و خرۆشێۋە فرۊ بەشڎاریی ئی نەورۆزە یشا کەرڎ. جە ھەرمانو کار و خەباتشانە سەرکۊتەیشا پۍ وازو.

هەڤاڵا ئازیزی، ئێمە ئینایمۍ حەفتەی قارەمانینە. پېسە مزانیۊ جە ٢١و ئازاری، واتە جە نەورۆز حەتا ٢٨و ئازاری، ڕۆو گەشمەرڎەبیەو فەرمانڎەی نەمری هەڤاڵ عەگید (مەعسوم کۆرکماز)یا کە بە حەفتەی قارەمانی ئەرەیاۋیان. جە ڕاسینە چی سەردەمەنە مدرامانۍ گۊرە بۍ، ئەرەکۊشاو خەبات کریا، داستانۍ قارەمانانۍ خولقیۍ. جە ۋەڵینگەو گەلەکەیمانە قارەمان، "عەگید"ی جوامێرو پاڵەوان هەن، بەڵام بە ۋەشبیەو هزر و ڕامان و فەلسەفەو ڕابەر ئاپۆی ئی قارەمانێتییە جە دلۍ گلېرگەی کورڎینە گۊرە بی. ئینسان متاۋۊ واچۊ، قارەمانێتی و ئازایەتی جە کەسایەتیی کورڎینە چنی فەلسەفەو ڕابەر ئاپۆی ئامێتە بیەن. بی بە ئیراڎێۋە گۊرەو پۆڵاین. بی بە هێزو ئازایەتیۍ جە بنەنە ناما.

گېرتەخانەکۍ دەوڵەتی یاگۍ هەژموونەو دەوڵەتینۍ و ئا یاگېنە فرەتەرین هەژموونو دەوڵەتیش چنە سەپیۊ. جە زینڎانو ئامەدیەنە جە ۋەختېنە، کە زوڵم یاۋابۍ لوتکە، تۆقنای یاۋا لوتکە، هامڕا "مەزڵوم دۆغان" ھورئېستۊ و جە نەورۆزو ١٩٨٢ بە ئەنجامداو چالاکیۍ فیدایانەو ۋێش هەنگامېۋی تاریخیەش نیا. دژوو ئا زوڵمەیە، سەرھوردای و یاخیبیەی و مرڎایۊ بۍ. بە پاو ڕۆحو نەورۆزی پیرۆزکەرڎەی نەورۆزی بۍ. جە ١٨و ئایاری هەڤاڵ "فەرهاد کورتای" و ٣ هەڤاڵۍ تەرێش، واتە ٤ هەڤاڵۍ ئېرشا جە جەستەو ۋێشا ۋەردا، پا شکڵە دژوو دوژمنی مرڎێۋە و دوژمنشا شەرمەسار کەرڎ و مدرامانشا بەقوەتتەر کەرڎ. ڕۊو ١٤و تەمووزی ئا چالاکییە گۊرە بە وەلێۋەبیەو هامڕایاما " محەمد خەیری دورموش، کەمال پیر و عاکیف یەڵماز و عەلی چیچەک"ی  ئەنجامدریا و پا شکڵەو جە ۋەران ۋەرو دوژمنی و دلۍ قەڵاو ستەمیەنە مردێۋە و دوژمن دلۍ قەڵاو ستەمو ۋێشەنە مەڕیاو شەرمەزار کریا. ئیراڎەو ئاخېزی و شۆڕشگێڵە ئاپۆییەکا ئەنجامش بە دەسئاورڎ و سەرکۊت. دلۍ زینڎانینە بە جەستەو ۋێشا و بە ورە و ئیراڎە و ئازایەتیی ۋێشا ۋەرنگاریشا کەرڎ، یاخیبیەیشا ۋەڵۍ وستو چا ڕێوە بە ئەنجام یاۋۍ.

جارێۋەتەر جە ساڵەو ١٩٨٤ینە وەڵېۋستەو هەڵمەتەو ١٥و تەباخی جە دژو ڕژێمی فاشیستیی ١٢و ئەیلوولی بی بە سەردەمێۋی تازە جە تاریخو بیەو خەباتو گەلەکەیمانە. ئانە فرە مەعناڎاربۍ. بەڵام چا ۋەختو ئاژەنە بەرڎەی ۋەڵېش هەنگامېۋی پاسە ئاسان نەبۍ،  کوڕانە ئەرەکۊشۍ و خەباتۍ چانەیچ ئاسان نەبۍ. ئی ئازایەتییەو فەرمانڎە هەڤاڵ عەگید (مەعسوم کۆرکماز)ی بەرزش کەرڎۊ و وەڵێۋەبیەیش پۍ کەرڎ. بە وەڵێۋەبیەو ئاڎی، ئا چالاکی و جوڵە جە دهۍ و شەمزینان ئەنجامدریا، بی بە سەردەمێۋی تازە جە ئەرەکۊشاو بیەی و ئازاڎیی گەلوو کورڎینە. جە دهۍ بە فەرمانڎاری هەڤاڵ عەگیدی و بەدران (محەمەد سێەڤگات)، ئەرداڵ (مستەفا یۆندەم) مۆرەو ۋێشا چا چالاکییە و جە چالاکیی ئا سەردەمیە دا. هەڤاڵ عەگید، حەر تەنیا چالاکیێۋەش نەکەرڎەن، بەڵکم چالاکیی سەرڎەمۍ تاریخیش کەرڎ.

ئانەی خەباتی چەکڎارینە ئا هەڤاڵەیە بە دەسئارڎەبۍ و خۊتان ڕەنجۍ فرەبۍ چنەشەنە، پەروەرڎەو مەیڎانو فەلەستینی، گېڵېۋە، جارێۋەتەر واوەی کیشیېۋە پۍ فەلەستینی و جارێۋیتەر گېڵېۋە، وەڵێوستەو بناغەو خەباتی جەنگی چەکڎاری، ئەرەمەرزناو بنکەی گەریلایی، چەسپناو خەتەو گەریلای، تاکتیک و شێوازیی گەریلایی، دەورو فەرمانڎەی ۋەشەۋیسی هامڕا عەگیدی جە وەڵېۋستەی گرڎ ئانیشانە فرە دیاربۍ. جە یاڎو ٣٧ ساڵەو گەشمەرڎەبیەو هەڤاڵ عەگیدینە جارێۋەتەر جە کەسایەتیی ئاڎینە بەڕێزۊ یاڎو گرڎو قارەمانا ئاخېزی و، گەشمەرڎە قارەمانەکا مکەرووە و سەرەو ڕێزی پۍ یاڎیشا منامنمېرە. ئا ۋەعدەی پایشاما دان واوەیش کەرمېۋە، ئێمە ئاڵاکېشا بە بەرزی و بە شۊکیایۊ ڕاگېرمۍ، نمازمۍ چەکەکېشا سەرو زەمینیۊ مەناۋە. جە ۋەشکەرڎەو ژیایۍ ئازاڎیی ، کورڎسانۍ ئازاڎیی، ڕابەرایەتی ئازاڎیینە یاڎشا بە زینەیی ڕاگېرمۍ.

بێگومان جە حەفتەی قارەمانینە فرە داستانۍ قارەمانانۍ هەنۍ. پۍ ئانەی نەورۆز بۊ بە نەورۆزو پیرۆز کریۊ، پېسە ئانەی کە وازیۊ نەورۆز پیرۆز کریۊ، هەڤاڵا ۋەشەویسیما؛ "زەکییە ئالکان، ڕەهشان دەمیرەل، ڕۆناهی و بێریڤان"، حەرپاسە "سەما یوجە" و گرڎو ئا هەڤاڵا، کە ۋێشا فیدا کەرڎ، بە جەسەو ۋێشا ئاۋېرو نەورۆزیشا گەشکەرڎۊ، پا جۊرە نەورۆزشا پیرۆز کەرڎ. جە درێژەدای بە راکۍ هامڕا "مەزڵوم دۆغان"ی و درێژەدای بە ڕاکۍ کاوەی هامچەرخینە، پا جۊرە ڕۆحو نەورۆزی و ئېرو نەورۆزیشا گەش کەرڎۊ. حەرپاسە پۍ پیرۆزکەرڎەو نەورۆزی جە جزیرە، نسێبین و فرەو یاگۍ و مەنتیقۍ تەرۍ کورڎسانی سەڎان گەشمەرڎۍ و قارەمانۍ  پۍ نەورۆزی گیانو ۋێشا بەخشا.

حەفتەی قارەمانی پی جۆرە بیەن بە حەفتەو قارەمانی و ئازایی. جە حەفتەی قارەمانینە ژمارەێۋی فرە جە هەڤاڵاما گەشمەرڎۍ بیۍ. چا هەڤاڵای چی چن ساڵاو ویەرڎەینە گەشمەرڎۍ بیۍ حەریۊ جە هەڤاڵاما "سینان، ناڤدار، سەرحەد ڤارتۆ" خۊتان حەوڵ و مانیایۍ و شکۆمەنڎیېۋە فرەی بېنۍ. هەڤاڵ سینان (عەلی ئاکتاش) هەڤاڵێۋە بۍ کە چنی هەڤاڵ عەگیدی ئەوەڵجار بەرەو مەنتیقەو بۆتانی هەنگامەشنیا، جە بەستا و شڕنەخ  دەسش بە خەباتی کەرڎ. ئا هەڤاڵۍ گرڎ پی جۆرە جە ئەرەکۊشای ئێمەنە خۊتان رەنجو، دەور و پەیام بېنۍ. یاڎو گردیشا مکەرمېۋە.

حەرپاسە جە ئەنجامو ھجومی عاسمانی دوژمنیەنە حەر یۊ جەهەڤاڵاما " زنار تاتوان، شاهین گەڤەر، جەمال ئامەد"و ئا هەڤاڵێچە کە چنیشا بېنۍ گەشمەرڎۍ بیۍ. قارەمانۍ گۊرۍ بېنۍ، حەر یۊ چایشا خەباتشا کەرڎەبۍ، چی جەنگەنە بەشداربېنۍ و رەنجشا کێشتەبۍ. ئا ھەڤاڵێچە کە تازە گەشمەرڎەبیەیشا ئەرەیاۋیان ۋەرو ئانەی سەرە ۋەشی جە خانەۋاڎەو ئا هەڤاڵە بەنرخاما و خانەۋاڎەکاشا مکەرو. هەڤاڵا رەنج و حۊڵدایما بېنۍ، ئا ۋەعدەی پایشاما دان پۊشۊ پابەنڎۍ بیمۍ و ئاوات و ئاڎیشا مارمېنە دی. ئانۍ قارەمانۍ سەردەمینۍ.

هەڤاڵ جەمال ئامەد فرە حەزش پانەی بۍ بلۊنە مەنتیقەو ئامەڎی. هەڤاڵێما بۍ کە جە خانەۋاڎێۋی خۊتان تاریخ و خۊتان رەنج و مانیایۍ فرەی بۍ. راسی ۋێچش بەهېۋە فرە بەنرخ بۍ. فەرمانڎێۋی خۊتان رەنج و دەور بۍ. بێگومان گەشمەرڎەبیەی ئا هەڤاڵا پۍ ئێمە کۆستێۋی گۊرەن، بەڵام ئێمە جە ڕاو یاڎو ئاڎیشاۋە گیانی قارەمانی، گیانبازی، ئاپۆگەری زیاتەر گەشکەرمێۋە و پی جۆرە ئێمە زیاتەر بە بەقوەتتەر پێشوازی جە ئاۋېرو نەورۆزی و گیانو حەفتەی قارەمانی مکەرمۍ.

هەڤاڵاهێژای، جە حەفتەی قارەمانینە گرڎو ئا مدرامنەی ئاما ئاراوە، جە ئەرەکۊشای ئازاڎیی کورڎسانینە ئەۋەڵ و دەسپنەکەرڎەین. ۋەرو ئانەی پېسە مزاندۍ لاو ئێمۊ نەورۆز ڕوۋۍ تازەن، ساڵۍ تازێنە. ڕۊو بەرزکەرڎەیۊ مدرامانیا، سەرھورداین، رێکوستەو هەڵمەتېن، ئەرەکۊشای و یۊبیەیا. ۋەرو ئانەی فرەو هەڵمەتا جمیەرەکەیما نەورۆزنە وزیېنۍ ڕا و جە حەفتەی قارەمانینە وزیېنۍ ڕا. حەفتەی قارەمانی سەرترۊپکو ھامڕا مەزڵوم دۆغانیا، سەرترۊپکیچش ھامڕا مەعسوم کۆرکمازا. چا بەینەنە ژمارەێۋی فرە قارەمانۍ بەشداربېنۍ. ئانەیچ پۍ ئێمە شکۆمەندیین. شکۆمەنڎی بەنرخا. پا جۆرەنا  کە بەعزۍ ئیسە پۍ زەڕی و، پۍ شان و شەوکەتی و نامبانگی جوڵیاۋە و ژیایشا ساز کەرا. ئا هەڤاڵۍ تەنیا و تەنیا جە پاو ئازاڎیی گلېرگەکەیشا، جە پاو هزر و ۋیرکەرڎەیۊشانە گیانو ۋێشا بەخشان. گیانو فیڎاکاری، ۋۍ بەختکەردەی، مەعنەویەتی بەرز. ژیای چېشا؟ ژیای ئازاڎ چېشا؟ چنی پێویسا کە مرۆڤ ۋێش پۍ ژیای ئازاڎیی، گلېرگەی ئازاڎیی، وڵاتی ئازاڎیی بێ دوودڵی ۋێش بەخشۊنە، پۊکەی ئانۍ نمونەنۍ. ئا هەڤاڵۍ کەسانۍ پا جۆرە بۍ تەحمولۍ نەبېنۍ کە جە ئاژۍ  دژوارنە ناچار پا ھەرمانۍ بیێبا. نا پۍ نمونەی "زەکیە ئاڵکان"ە. هەڤاڵېۋەنە خەڵکو کورڎسانینە، بەڵام خانەۋاڎەکەش ئینۍ ئیزمیر. ئاڎە جە ئامەڎ زانکۆو پزیشکینە ۋەنۍ. کریۍ بۊ بە دکتۊرە. بەڵام گەرەکشا خۊتان هەڵوێسێۋی ئەخلاقی و شکۆمەنڎانەی بۊ. ۋەرو ئانەی بە ھەرمانەو ۋێش مزانۊ کە سەرو شوراو ئامەڎیۊ ئاۋېر جە ۋێش ۋەر بڎۊ. ئاڎە ۋێنەو جەوهەری ژەنا کورڎی، کناچا کوردی و مرۆڤو کوردی مکەرۊ. چنی متاۋۊ ۋێش بە دۆزو ۋێش و گەلەکەیش بەخت بکەرۊ. ئینۍ بەرزکرڎەیۊ مەعنەویەتینۍ، بەرزکرڎەیۊ گیانو ئازاڎییا. ژیای ئازاڎ پی جۆرە ۋەش کریۊ. ئێمە بە مەڵامەتو ئانەی هامڕاو هامڕایا پی جۆرەینمۍ سەربەرزێنمۍ. ئێمە سەربەرزێنمۍ کە وەڵېۋەبیۊکېما کەسۍ پی جۆرەنۍ و پی جۆرە جمێنېۋە. پی جۆرە بە شەرەف و شکۆو مرۆڤایەتیۊ ژیۋێنۍ، ئەرەکۊشای ئەفسانەیی پی جۆرەیشا ئەرەمەرزنان.

قارەمانۍ پی جۆرەیما فرە ۋینۍ، جە ئەرەکۊشایمانە قارەمانۍ یەکجار فرۍ پی جۆرەیما هەنۍ. بەڵام گەرەکما گەشمەرڎا تازۍ ئېساڵی و چن هەڤاڵۍ کە نەک یەکجار بەڵکم فرەو جارا رۆزانە قارەمانێتی ئاڎیشاما دیەن پېسە نمونۍ ئاماژە ش پنەکەرو. پېسە مزانیۊ هەڤاڵ "یاشار بۆتان" جە ١و ئاداری جە دێرسیم گەشمەرڎەبی. فەرمانڎەو دێرسیمی بۍ. هەڤاڵێۋی خۊتان رەنج، خۊتان دەور، خۊتان ۋەرپەرسیاری بۍ. جە نزیکۊ ئەشناساما و ۋیناما. نزیک بە یەرۍ ساڵا چنیما پېسە فەرمانڎێۋی پارێزکاری و ئاسایشی بۍ. هەڤاڵێۋە خەڵکو بۆتانی، خەڵکو سلۆپی بۍ. جە عەشرەتو زێڤکی بۍ. نوێنەرایەتی جەوهەری وڵاڎپارێزی و بۆتانی کەرۍ. بە ئازایەتی ۋێش، بە گیانبازی ۋێش، بە راسی و دروسی ۋێش نوێنەرایەتی ئاگەی کەرۍ. جە نزیکۊ ئەشناساما کە چ ئاڵتونېۋەن. بەراسیچ جە تەمامو تاریخو ۋێشنە دلۍ ئەرەکۊشایمانە گرڎ چرکېۋە ئا تایبەتمەندیەو ۋێش نیشانە دا. خانەۋاڎەکەش وڵاڎپارێزێنۍ ئیسە ئینۍ مەخمور، من سەرەۋەشی جە خانەۋاڎەکەیش و جە تەمامو گەلەکەیما مەخمورنە مکەرو. بەدڵنیایۋە کۆستێۋی گۊرەن پۍ ئێمە، بەڵام ئەرکو ئێمەن ئا قارەمانا جە ئەرەکۊشاینە بە زینەیی ڕاگېرمۍ.

جارێۋی تەر هەڤاڵا "دەلیل زاگرۆس و باران چراڤ" ئا دوۋە هەڤاڵێچە پۍ ماۋێۋی فرەی چنیما مەنێۋە. ئەرکشا گرتەنە ئەستۆ، گیانبازیشا کەرڎ، بیەیمۍ بە شایەتو راسی و دروسی ئاڎیشا، فیداییبیەو ئاڎیشا. بەتایبەتی هەڤاڵ دەلیل بە ئازایەتی ۋێش، چنە ئامایی ۋێش، ئەقڵ و مەخزو ۋێش پۍ دەسوەردای جە یاگېنە کە کەرڎش، پیلانۍ گۊرۍ دوژمنیش جە دژو ئێمە پوچۍ کەرڎێوە. ئەگەر ئێمە ئیسە مژیومۍ ئانە سایەو قارەمانا پی جۆرەینە، جە سایەو دەلیلەکاوەن کە مژیومۍ. ئا هەڤاڵۍ هەڤاڵۍ پی جۆرەی بێنۍ ئەرەکۊشاینە، جە ۋەختو ۋەردەوامی مدرامانو گۊرەو کەشو ئامێدینە ئا هەڤاڵەما گەشمەرڎەبی. فەرمانڎەو ئا گەی بۍ. جە بواری سەروازینە فرە دەورش گێڵنا. قارەمانو سەرڎەمی بۍ. تەمامو جوۋانا کەشی، وان و عەشرەت و ئالانی پایۊ سەربەرزۍ با کە قارەمانێۋی پا جۆرە دلۍ ئاڎیشانە سەرشھوردا.

هەڤاڵ بارانیچ پا جۊرە بۍ. خەڵکو مەنتیقەو چراوی بۆتانی بۍ. بە ڕۆح و هەڵوێسی فیدایی ۋێش خەتەو ئاپۆگەری نوێنەرایەتی کەرۍ. ئا هەڤاڵۍ حیچ ۋەختۍ جە ۋیر مەکریا. وا بەستەبیەیشا بە خەتەو ئاپۆیی و فیدایی بیەیشا جە ۋیر مەکریۊ کە ئەنڎامۍ هێزە تایبەتەکا بێنې. دەورو ۋێشا بە ئازاڎیی ئەنجام دا. حەر یەریشا خەڵکو بۆتانی بېنۍ. نەریتو عەگیدی ئاڎیشا جەوهەرو کۆمەڵایەتی بۆتانیشا جە تاریخو بۆتانیەنە نیشانەدا. ئازاڎی و فیڎاکاری یۊبۍ جە تایبەتمەندییەکا ئاڎیشا و نوێنەرایەتیش کەرێنۍ. من پی بۆنۊ چڕیەی جە گرڎو جوۋانا بۆتانی و سەرحەدی مکەرو. سەرو ڕاو ڕێبازو ئا عەگیدانە کۊشیانە. خوڵقە جە گرڎو جوۋانا کورڎسانی و گەلی وهەرێمەکەی مکەرو، نوێنەرایەتی ئا عەگیدا بکەرا. سەرو ڕاو ڕێبازو ئاڎیشا خەبات کەرا. ئینە نموونەو ئانەین کە حەر جوۋانۍ کەسێۋە چنی ژیای ۋێش مانا دار کەرۊ کە گەرەکش نیا ژیایش بە فیڕۆ بلۊ. پێویسا سەرو ڕێچکەو "یاشار، دەلیل و باران"ی خەبات کەرۊنە. چڕیەو من پۍ گرڎو جوۋانا ئانەن کە سەرو ڕێچکەو قارەمانەکا با. بەشداریی جە ئەرەکۊشاینە بکەرا. ۋەرھەنگامی پۍ سەرھوردای بکەرا. بەشڎارۍ دلۍ ڕیزەکا گەریلای با. بەشداربیەیما جە ڕیزەکا گەریلاینە هەڵوێسۍ وڵاڎ پارێزی و میلیتانی و لووتکەو شەرەفیا. ئێمە قەناعەتما چانەن جوۋانۍ جە نەورۆزنە بە جۆش و خرۆشێۋی گەورۊ دروشمۍ بەرز مکەراۋە. ئاڎۍ گرڎ جوۋانۍ جومېرۍ کورڎسانینۍ و ئاڎۍ بە ڕاسی متاوا بە گرڎ جۊرێۋە دەورو ۋێشا بۋینا. ئەنجامۍ گۊرۍ بە دەس بارا. ۋیرو قەناعەتو ئێمە ئانەن کە جوۋانېما پی جۊرە ئەرەکۊشانۍ. سەرو ئی قەناعەتیە ئێمە ئەرەکۊشای ڕاۋە بەر کەرمۍ سەرو ئ بناغەیە ئارۊ تەڤگەری ئازاڎی کورڎسانی مدرامانێۋی تاریخی ڕاۋەبەر مکەرۊ.

هەڤاڵا نەورۆزنە جە عەفرین کۆکوژیۍ ئەنجامدریا. عەفرین پەنج ساڵېن ۋەرەن ڕوو کوشتەی، ئەشکەنجەدای، ئەڕفانای و زوڵمی بۊۋە. حەتا ئیسە سەڎان کەسێما بە دەسو چەتە فاشیستەکا سەر بە دەوڵەتو تورکی گەشمەرڎۍ کریێنۍ. چی دماییەنە ٤ برۍ، ٤ کەسێما کە ئاۋێرو نەورۆزیشا کەرڎۆ، ۋەرەن ڕوو ھجومی بیێۋە و گەشمەرڎۍ کریۍ، ئێمە ئی کۊکوشیە بە تنی شەرمەزار مکەرمۍ و یاڎو ئا گەشمەرڎا مکەرمېۋە. سەرەوەشی جە خانەواڎەیشا و گرڎو گەلوو عەفرینی مکەرمۍ. ئاڎۍ گەشمەرڎۍ ئاخێزینۍ. تۆڵەشا مکەرمۍ.

حەرپاسە جە ١٥و ئازاریە نە، جە مەنتیقەو بادینانی و شارودهۆکیەنە ڕووەدایۍ هەلیکۆپتەری ڕوۋەش دا. ئەرەیاۋیا کە بە فەرمانڎەیی شەڕڤان کۊبانی و٩ ئەندامۍ قەسەدەی کە ئەندامۍ هێزەکا دژە تیرۆر (یات)ی بېنۍ، گەشمەرڎۍ بیۍ. بە پاو زانیارییەکاما ئەنڎامۍ دژە تیرۆری بێنۍ و جە جەنگو دژو داعشیەنە یاگە دەسشا دیار بۍ. بەعزۍ جوۋانېچ  کە پەروەردەشا دیەبۍ، بیێبێنۍ بە سایەق تەیار. ئێمە مزانمۍ کە جە سەردەمو شێخ مەحمووڎو بەرزنجەیۊ حەتا ئیسە هێزە ئەرەگیرەکۍ  بە تەیارە گەلەکەیما بۊمب ۋاران مکەرا و ئەچی ڕوایچەنە ئەرەگیرۍ ئێمە بۊمبۋاران مکەرا. بە تەیارە ھجومما جە دژ ئەنجام مڎا. حیچ ئامێرێۋی پا جۊرە نیا دەسو گەلەکەیمانە. بەڵام دیارا کە ئیسە ژمارێۋە جوۋانۍ کورڎی فێرو سایەق تەیارەی بیێنۍ و ئامێرو فڕای بە کار مارانۍ. ئینە یاگۍ ۋەشحاڵین. ئێمە گەشمەرڎەبیەو ئا فەرمانڎە و شەڕڤانا بە زەرەرۍ  گۊرە ۋینمۍ. پېسە زەرەرۍ پۍ گرڎو کورڎا ۋینمێش سەرەۋەشی ۋێما ئاڕاسەو گرڎو فەرمانڎەکا قەسەدەی و خانەواڎەو گەشمەرڎاو  گەلوو ۋەرنیشتوو سەرنیشتوو  ۋەرکەوتو سووریای مکەرمۍ. ئی ڕووە دایە خەمبۍ فرەبۍ پۍ گرڎیما. تەماشە کەرمۍ، ژمارێۋە ۋەرپەرسۍ پانیشتوو کورڎسانی ۋەختۍ باسو ئی ڕووەدایە مکەرا بە زوۋانێۋی بۍ ڕێزی کە حیچ خەمگینیێشا پۊۋە دیار نییا قسۍ مکەرا. حەر کێشېۋە دلێینەیچ بۊ، بەڵام پێویسا هەڵوێستێۋی پی جۊرە بە تایبەتی پۍ ڕووەداکا ئی جۊرە زوۋانە بە کار نێنە. دژایەتی کەرڎەی بۊ بەڵام ئی جۆرە جە دوژمنایەتی یاگۍ سەر سووڕمانیا. ئی جۆرە هەڵوێسا بە ڕاسی مەوینمۍ. حەر کوردۍ بە گەشمەرڎەبیەو شەڕڤانو کورڎی ئێش نە چەشۊ، گومان جە کورڎ بیەیش کریۊ. ئینە زەرەرێۋەن  کە جە گرڎو گەلوو کورڎی کەوتەن. ئا مرۆڤۍ پەروەردە کریێنۍ. یاگێشا جە جەنگو دژبە داعشینە دیارا. گنا ڕا ، ۋەرەن ڕوو ۋارانی و سیاوای باوە. ڕاکێشا ۋنە تێک مشۊ و پی جۊرە ڕووەداکەی روۋە مڎۊ. ئینە یاگۍ خەمباریا. پێویسا بە شێۋێۋی ئەخلاقی و مرۆڤی هەڵوێست ھورگێرمۍ. پانەوازا ۋەڵۍ گرڎ چێۋێنە خەمباری ۋێما بەربڕمۍ.

ھومێڎەوارێنمۍ حەر کەسێۋی کورڎ ئارۊ چی سەردەمە گرنگەنە، بە تایبەتی پا گیری سەروو رزگاری و ئازاڎیی گەلوو کورڎی بکەرۊ و رۆحیانەت وڵاڎپارێزنای بە قوەت کەرۊ. پی جۊرە رۆحو گرڎو گەشمەرڎا حەر چوار پارچەو کورڎسانی شاڎ بکەرمۍ و کورڎسانێۋی ئازاد بنیاڎ بنیەیمۍ. ئانەی جە ئێمە داوا کریۊ، ئینەنە.

هەڤاڵا هێژای؛ پېسە مزانیۊ ساڵەو ٢٠٢٢، ساڵەو ئەرەکۊشای و مدرامانی گەورەو گەریلاکا ئازاڎیی کورڎسانی بۍ. چا ساڵەنە بە ۋەڵێکەوتەی مدرامانی و بە تایبەتی جە "زاپ، ئاڤاشین ومەتینا" پیلانەکۍ دوژمنی پۍ قڕکەرڎە و ئەرەگیرکەرڎەی تێکۍ شیۍ و ئەنجامشا بەدەس ناورد. بێگۆمان باجیچ دریان. داستانۍ قاڕەمانیۍ فرۍ ۋەشۍ بیۍ. بەڵام دەستکەوتۍ فرۍ پې گەلو کورڎی بە دەس ئامۍ. و ئێمە پی جۊرە کەوتیمۍ دلۍ ساڵەی تازێۋە، ساڵەو ٢٠٢٣. ساڵەو ٢٠٢٢ پېسە ساڵێۋی گرنگۍ ۋیەردە، دیارا ساڵەو ٢٠٢٣ پېسە ساڵەی ویەردۍ گرنگە و تاریخیە بۊ، چی ساڵەنە ئەنجامی زیاتەر بەدەس مێنە. بەشداربیەو گەلەکەیچما جە نەورۆزنە ئانەش نیشانە دا. ئۍ ساڵ ساڵێۋی ئاسایی مەبۊ. سەرو ئی بناغەیە بە رۆحیانەتو حەفتەی قاڕەمانی، سڵامما پۍ گرڎوو هەڤاڵا کیانمۍ و جە ساڵەو ٢٠٢٣ێنە و جە ٥١مین ساڵەو ڕاپیماو ڕابەر ئاپۆینە، بە دڵ و بە گیان هومێڎو سەرکەوتەی پۍ هەڤاڵاما وازمۍ و. جارێۋیتەر سڵام پۍ گرڎ لایۍ."

ھ.ش